Read Siyin Chin Ezekiel 45 Bible Online

Ezekiel 45 - Siyin Chin bible

Ezekiel 45

¹Minam sim tungah piak tu leitang khenin a kihawm ciang, khen khat sia TOPA tungah ki aap tu hi. Tuasia kilometre 12.5 sau in kilometre 10 zai tu hi. Hi mun bup sia thiangtho tu hi.

²Hi munah Biakinnpi atu a pangh a kikim king li nei khen khat om tu a, a pangh sim in metre 250 pha tu hi, a kiimkot ah metre 25 a zai mun awng khat om tu hi.

³Hi mun ii lang, kilometre 12.5 a sau, kilometre 5 a zai khen khat kitee tu a; a vekpi sung pan a thiangthobel mun ahi Biakinnpi om tu hi.

⁴Tuasia ngam ii a thiangthona mun khat hi tu a, TOPA Biakinnpi ah a seam thiampite atu a kikoituam mun ahi hi. Tua ii sungah amate innte le Biakinnpi mun atu leitang om tu hi.

⁵A dang a mun lang teng sia Biakinnpi ah a seam Levi te neisa in kikoituam tu hi. Tua munah amate teenna tu khuate om tu hi.

⁶A thiangtho mun ii zom ah kilometre 12.5 a sau, kilometre 2.5 a zai khen dang khat sia Israel mi pawpo teen thei natu mun, khuapi khat atu in kikoituam tu hi.

⁷Kumpipa atu leitang zongh kikoituam tu hi. Mun thiangtho ii nitumna ngamngi pan nitumna sang Mediterranean tuipi dong; nisuana ngamngi pan nisuana sang ngam mong dong hi tu a, Israel minamte atu a kipia mun khat ii a sauna za in sau tu hi.

⁸Hi mun sia kumpipa ii nga tu Israel ngam leitang hi tu hi, tua ahikom ama in mite zawthawk vawt nawn ngawl tu a, ahihang a om lai ngam theampo sia Israel minamte neisa hisak tu hi.

⁹Vaanglianpipa TOPA in, “No Israel ngamukte awng, mawna khialna na vawt uh khuangei lei zo hi! Na ngoltolna uh le ngual na zawthawk vawtnate tawlnga vun. A pha le a maan bek vawt vun. Ka minamte a ngam uh pan hawlkeak kik ngeingawl tu nu hi. Keima, Vaanglianpipa TOPA in hi teng kong son hi.

¹⁰“Mihing sim in a ngit teena maan le teena maante a zak kul tu hi.

¹¹“A ko teena ephahs sia a tui teena bath taw kibang tu hi. Homer sia zak maanbel teena ahi hi. Teenate a nuai a bang ahi hi: 1 homer = 10 ephahs = 10 baths

¹²“A ngit teenate a nuai a bang hi tu hi: 20 gerahs = 1 shekel 60 shekels = 1 mina

¹³“Hite doppha in na biakpiaknate na pia tu uh hi: Zungtaang: a piang theampo sung pan 1/60 Mangtaang: a piang theampo sung pan 1/60 Olive thau: a kungte pan a piang theampo sung pan 1/100 (Bath taw teena: 10 baths = 1homer = 1 kor ) Tuu: Israel lo hingna te pan a piangte 200 sung pan 1 “Antang taw biakpiakna, nganhing pum bup meihal biakpiakna, kipawlkhop biakpiakna atu nganhingte nong paipui tu uh hi, tua hile noma mawna khialnate hong kimaisak tu hi. Keima, Vaanglianpipa TOPA in thu kong pia hi.

¹⁶“Ngamsung mite theampo in hi biakpiaknate Israel ngamukpa kungah paipui nanak tu hi.

¹⁷Ama in Israel minam bup ii Thadet Poaite, Sabbath te le a dang poaite theampo atu in nganhing pum bup meihal biakpiak natu nganhingte, antang biakpiakna le sapittui biakpiaknate a piak tu sia ama vaipuak ahi hi. Ama in mawphel biakpiakna, antang biakpiakna, nganhing pum bup meihal biakpiakna le kipawlkhop biakpiaknate sia Israel mite ii mawna khialnate kiphel natu in pia tu hi,” ci hi.

¹⁸Vaanglianpipa TOPA in, “Tha masabel thadet ni in noma in khuital mealhem ngawl khat taw sangaw biakpiakna taw Biakinnpi thiansua tu nu hi.

¹⁹Thiampipa in mawphel biakpiakna pan a chi pawlkhat la tu a, Biakinnpi innkha khuamte tung, biaknatau king li te tung le suum sungnung kongpi vang khuamte tungah koi tu hi.

²⁰Tha sim ni sali ni in, a heak ngawl hu in ahibuale a ngaisut khol ngawl bulin mawna a vawt khat pawpo luangin tuasia a kibangin na vawt tu uh hi. Hi bangin Biakinnpi na thiangthosak tu uh hi.

²¹“Tha masabel ni sawm le ni li ni in noma in Paisan poai vawt tu in na kipan tu uh hi. mi simin ni sali sung teng tol saw ngawl anluum ne tu hi.

²²Poai ii ni masabel ni in ngamukpa in khuital khat sia ama mawna khialnate le a mite theampo ii mawna khialnate atu in mawphel biakpiakna in pia tu hi.

²³Ama in ni sali sung ni simin a mealhem ngawl khuital sali le tuutal salite TOPA tungah a pum bupin meihal biakpiakna in pia tu hi. Ama in ni simin kealtal khat taw zong mawphel biakpiakna nei tu hi.

²⁴Khuital khat le tuutal khat sangaw biakpiakna in a kingaw simin antang taw biakpiak natu in antang litre sawm le sali le a lang le olive thau litre thum pia tu hi.

²⁵“Tha sali tha ni sawm le ni nga ni a kipan Buk Poai atu sia a kibang ma in mawphel biakpiakna, a pum bup meihal biakpiakna le antang le olive thau taw biakpiaknate ni sali sung ni simin ngamukpa in pia tu hi,” ci hi.