Read Siyin Chin Ezekiel 46 Bible Online

Ezekiel 46 - Siyin Chin bible

Ezekiel 46

¹Vaanglianpipa TOPA in, “Suum sungnung tumna nisuana sang kongpi vang sia, ni luk nasep sung kikhak tu a, ahihang Sabbath le Thadet Poai ah kihong tu hi.

²Kumpipa sia suum puanung pan kongpi vang tawnin sungtanna inndoi sungah pai tu a, thiampite in ama ii pum bup sangaw biakpiaknate le kipawlkhop biakpiakna a vawt hun sung teng kongpi khuamte hui ah ding tu hi. Tua mun kongpi ah ama in biakna a vawt kul tu a tua zawkciang pusuak kik tu hi. Kongpi sia nitak dong kikhak ngawl het tu hi.

³Sabbath sim le Thadet Poai simin, mihingte theampo zongh in kunin kongpi mai ah TOPA bia tu uh hi.

⁴Sabbath ni in kumpipa in TOPA tungah a mealhem ngawl tuuno luk le tuutal khat, pum bup meihal biakpiak natu in paipui tu hi.

⁵Ama in tuutal khat simin antang litre sawm le sali le a lang biakpiakna in paipui tu a, tuaciang tuuno khat sim atu in a piak nop pawpo paipui tu hi. Tuabang antang biakpiakna a nei simin olive thau litre thum veu ama in paipui tu hi.

⁶Thadet Poai sungah a mealhem ngawl khuital moi khat, tuuno luk le tuutal khat ama in pia tu hi.

⁷Khuital khat le tuutal khat a piak simin, antang litre sawm le sali le a lang pia tu a, tuaciang tuuno khat a piak simin kumpipa in a piak nop po taw pia khawm tu hi. Tuabang antang biakpiakna a piak simin olive thau litre thum pia tu hi.

⁸Kumpipa in kongpi vang ii sungtanna inndoi sia a nusiat ciang a tumna lampi sia ma zui in a pusua kul tu hi.

⁹“Poai khat pawpo ah mihingte in TOPA bia tu hong pai ciang, saksang kongpi pan a tumte in, biakna a vawt zawkciang, thangsang kongpi pan pusuak tu a, thangsang kongpi pan a tumte in saksang kongpi pan pusuak tu hi. Kuama in a tumna lampi pan pusuak thei ngawl tu a, a kingalsai kongpi pan pusuak tu hi.

¹⁰Kumpipa sia mihingte pai ciang tum tu a, mihingte pusua ciangin pusuak tu hi.

¹¹Poai vawt nite le Poaite ah khuital, ahibuale tuutal khat a piak simin antang litre sawm le sali le a lang taw pia tu a, tuuno khat a piak simin biakpiakna a vawt pa in a piak nop pawpo pia tu hi. Olive thau litre thum sia tuabang antang biakpiakna taw veu pia khawm tu hi.

¹²“Kumpipa in TOPA tungah a thinzaw za biakpiakna sia pum bup meihal biakpiakna taw ahizong, kipawlkhop biakpiakna taw ahizong, a nei nop ciang suum sungnung paina nisuana sang kongpi kihon tu hi. Ama in Sabbath ni a biakpiakna a vawt bangin biakpiakna vawt tu a, kongpi sia ama pusua kik zawkciang kikhak tu hi,” ci hi.

¹³TOPA in, “Zing simin, a mealhem ngawl kum khat a pha tuuno khat sia TOPA tungah a pum bup biakpiakna in hal tu hi. Hi biakpiakna sia ni simin kinei nanak tu hi.

¹⁴Zing sim biakpiakna ah zungtaang vui kilogramme 2 le tua taw hel tu in olive thau litre khat taw zong pia khawm tu hi. TOPA tungah hi biakpiakna ngeinate sia a tawntungin zui tu ahi hi.

¹⁵Tuuno, zungtaang vui le olive thaute sia TOPA tungah zing sim a tawntungin biakpiakna in piak tu ahi hi,” ci hi.

¹⁶Vaanglianpipa TOPA in thupia hi: “Kumpipa in a neisa leitang mun khat pawpo a tapate khat tungah letsongin a pia le tua tapa in tang tu a, a innkuan ii neisa khat bang hi tu hi.

¹⁷Ahihang kumpipa in a neisa leitang khat pawpo sia a naseam khat po tungah a pia le Puakik Kum a thet ciang, kumpipa ii neisa suak kik tu hi. Tua leitang sia ama ii neisa hi a, ama le a tapate bek in a tawntungin nei thei tu hi.

¹⁸Kumpipa in a mite ii neisa te peuma laaksak ngawl tu hi. Ama in a tapate tungah a piak leitang khat pawpo sia ama atu a kikoisia sung pan bek hi tu a, tua hile, ama in ka mite khat pawpo sia amate leitang laaksakna taw zothaw ngawl tu hi.

¹⁹Tua zawkciang, tua pa in saksang a ngaa, suum sungnung thangsang kongpi mai ah a om inndoite tumna ah kei hong paipui hi. Hite sia thiampite atu a thiangtho inndoite ahi uh hi. Inndoite ii nitumna sang mun khat ama in kawk a,

²⁰tuaciang “Hi mun sia thiampite ii mawphel sangaw biakpiakna sate huan natu mun, ahibuale kitat natu biakpiakna le biakpiakna anvuite em natu mun ahi hi, tuabangin a thiangtho na khat pawpo mihingte ngim a piak thei natu mun suum puanung ah kipaipui ngawl tu hi,” ci hi.

²¹Tua zawkciang ama in a suum puanung ah kei hong paipui a, a king li sim ah suum nozaw metre 20 a sau metre 15 a zai khat tek a om sia hong lak hi.

²³Tuate khat sim sia suang pang taw ki um a, pang bealhin meikhukte kivawt hi.

²⁴Tua pa in kei tungah, “Hite sia mite piak sangaw biakpiakna a sate biakinn ah naseamte ii a huanna mun anbukte ahi hi,” hong ci hi.