Read Siyin Chin Ezekiel 47 Bible Online

Ezekiel 47 - Siyin Chin bible

Ezekiel 47

¹Tua pa in Biakinnpi sung tumna ah hong heakpui kik hi. Tua tumna nuai pan tui hong phul a, Biakinnpi maingatna nisuana sangah luang hi. Tuasia biakinn thangsang a nuai pan biaknatau thangsang tawnin luangsuk hi.

²Tuaciang tua pa in saksang kongpi lam tawnin biakinn mun pua sangah kei hong paipui a, nisuana sang a ngaa kongpi ah hong paipui kawkoai hi. Luino khat sia kongpi thang sangah luang hi.

³Tua pa in a piciang taw nisuana sang luidung zuisuk in metre 590 tee a, tuaciang ama in tuak ah luitui tan tu in hong sawl hi. Tui sia ka siakmit ciang bek pha hi.

⁴Tua zawkciang ama in a dang metre 500 tee a, tuaciang tui sia ka khup ciang pha hi. A dang metre 500 tee suk lai a, tui sia ka kawng ciang dong pha hi.

⁵Ama in metre 500 tee thua a, tualai ah tuithuk mama ahikom tui ka tan zo bua hi. Tui thuk lei ahikom tui op ngawlin kikaantan zo ngawl hi.

⁶Ama in kei tungah, “A thithei mihing awng, hi thu theampo pha takin ciamtee in,” hong ci hi. Tua zawkciang tua pa in ngunvaal ah hong heakpui kik a,

⁷tua mun ka thet ciang, thingkung tam mama ngunvaal lang le lang ah a om ka mu hi,

⁸Ama in kei tungah, “Hi tui sia nisuana sang tawnin Jordan Kuam le Tuipi Thi dongah luang suk hi. Tuipi Thi sungah a tum suk ciang, tua tuipi tui al sia tuithiang taw lai hi.

⁹Luitui luanna mun theampo ah nganhing namcin le ngasa namcinte om tu hi. Hi luitui in Tuipi Thi sungah tuite thiangsak tu a, tuaciang a luanna mun po ah nuntakna piangsak tu hi.

¹⁰Engedi Cik tuite panin Eneglaim Ciktuite dong tuipi vaalbo tungah ngasa mante om tu a, tua munah a ngeente a ko tu in phalh tu uh hi. Mediterranean Tuipi sungah ngasa namcin tam mama a om bangma in hi luitui sungah ngasa namcin tam mama om tu hi.

¹¹Ahihang vaalbo dungah a om buannawngte le tuicing note sungah tuite kithiangsak ngawl tu hi. Tua tuite ci al pian natu in tua munah om tawntung tu hi.

¹²Lui lang le lang vaalbo tungah an tu in thingkung namcinte po tu hi. A teete vul ngeingawl tu a, a nga pangh ngeingawlin nga tawntung tu hi. Tha simin tuate in nga thakte nga tu hi, banghang ziam cile Biakinnpi pan a luang luitui in tui pia hi. A thingkungte in an piangsak tu a, tuaciang a teete sia mihingte ciidamsak kik natu in kizangh tu hi,” hong ci hi.

¹³Vaanglianpipa TOPA in, “Hite in minam sawm le nii te sungah leitang a kihawm tute ii ngamngite hi a, Joseph minam in ngamkhen nii nga hi.

¹⁴Keima in na taanghpupite tungah hi ngam piak tu in a ciliaphuai takin ka kamciamsa hi; tu in noma sungah a kikim in hawm diimdiam vun.

¹⁵Saksang ngamngi sia Mediterranean Tuipi pan nisuana sangah pai a, Hethlon khuapi, Hamath Ciangh tawnin Zedad khuapi ah,

¹⁶Berothah le Sibraim khuapite (Tua khuapite sia Damascus kumpi ngam le Hamath kumpi ngam kilaklaw ah om hi), tuaciang Ticon khuapi dong (Hauran ngamkhen ngamngi hui ah om) hi tu hi.

¹⁷Tua ahikom saksang ngamngi sia Mediterranean pan nisuana sang Enon khuapi, a saksang pan Damascus le Hamath ngamkhente dong ahi hi.

¹⁸“Nisuana sang ngamngi sia Damascus le Hauran ngam kilaklaw mun khat pan thang sangah paisuk a, nitumna sang Israel ngam le nisuana sang Gilead ngam kilaklaw ngamngi ahi Jordan ngun taw. Tuipi Thi hui ah a om Tamar dong ahi hi.

¹⁹“Thangsang ngamngi sia Tamar pan nitumna thangsang ah pai in Kadesh Meribah ciktui ah, tua zawkciang nitumna saksang Egypt ngamngi dung, Mediterranean Tuipi dong ahi hi.

²⁰“Nitumna ngamngi sia Mediterranean hi a, saksang ah pai in Hamath Ciangh ii nitumna mun khat dong ahi hi.

²¹“Hi leitang sia na minamte sungah hawm vun;

²²tua sia a tawntungin noma neisa hi tu hi. Ngamdangmi noma taw a teang khawm te le hi lai munah a suak a tate zongh in leitang na hawm uh ciang a nga tu bang hawmtel saang tu uh hi. Amate sia Israel ngammi tatakte bangma in kivawt tu a, Israel minamte taw a kihawmna meetang sawk khawmin leitang nga tu uh hi.

²³Ngamdangmi hong teang khat simin a teen khoppui Israel minamte taw a kibangin ama ii tel nga tu hi. Keima, Vaanglianpipa TOPA ka pau zo hi,” ci hi.