Read Siyin Chin Ezekiel 5 Bible Online

Ezekiel 5 - Siyin Chin bible

Ezekiel 5

¹TOPA in, “A thithei mihing awng, namsau hiam khat la in a, na khamul le na sam teng meet kol in. Tuaciang tua na sam le multe la in, khaikhin taw na tee zawkciang, khen thum in khen in.

²Khen thum sua khen khat sia hong uumcina a ven ciang, khuapi sungah hal in. A dang khen thum a khen khat sia khuapi puasang na va kawkoaina ah na namsau taw tan neen in. A om lai khen thum teng sia vui sungah the in a, ka namsau taw ka delkot tu hi.

³Samzam tawm keam in a, na puan mong ah tun in.

⁴Tua zawkciang samzam tawm la leleau in a, mei sungah vawk in kaanghtumsak in. Tuate panin Israel ngam bup ah kaanghmei hong kizel tu hi,” hong ci hi.

⁵Vaanglianpipa TOPA in, “Jerusalem en in, Ama sia leitung bup ii laizang ah ka koi a, a dang ngamte sia a kiimkot ah om hi.

⁶Ahihang Jerusalem in ka thupiakte hong langpan a, a dang ngamte sangin a ngitlo zawkna hong lak a, kiim le paam ngamte sangin thuni ngawl zaw hi. Jerusalem in ka thupiakte nial a, ka thukhamte zui ngawl hi.

⁷Tu in Jerusalem awng, kei Vaanglianpipa pauna hong ngai ta'n. Ka thukhamte ni ngawl a ka thupiakte na zui ngawl ciang, na kiim na paam ngamte sangin ngimna tam piangsak zaw ni hi. Ngamdangte ngeinate na zui zo ta hi.

⁸Tua ahikom Vaanglianpipa TOPA keima in na ngal khi hi ci in kong son hi. Minam theampo ii mu thei tu in na tungah thu kong khen tu hi.

⁹Ka ngaimawk nate theampo na vawt hu in, Jerusalem sia nidang a ka piak ngeingawl, mai sang zongh ah ka piak nawn ngawl tu daan ka pia tu hi.

¹⁰Tua hu in Jerusalem a om nute pate in tate ii sa ne tu uh a, tate in nute pate ii sa ne tu uh hi. No daan kong pia tu a, a nungta lai sun zongh mun theampo ah kong thethaang tu hi.

¹¹“Tua ahikom keima in a nungta Pathian ka hi bangma in — hisia in Vaanglianpipa TOPA ii kammal hi — nangma in ka Biakinnpi sia, a sia le a kiihuai ngamtatnate theampo taw ninsak na hikomin, hong hesuak ngawlin kong saatvawk tu hi.

¹²Na mite sung pan khen thum sua khen khat sia khuapi sungah natna taw le ngilkialna taw in thi tu hi; a dang khen thum sua khen khat sia khuapi pua sangah namsau taw kisaatvawk tu hi; tuaciang a khakbel khen thum sua khen khat sia hui sungah ka thethaang tu a, namsau taw ka zuizen tu hi.

¹³“Ka lung a kim dong ka thin uukna le ka thangsiatna te na tel tu hi. Hite theampo a pian ciang, na thumaan ngawlna hu in ka thinso a, TOPA keima in na tungah thu hong son zo ka hi hunlam na tel tu hi.

¹⁴Na kiim na paam pan a minamte, nang hong kaantan pawpo in nang hong selno tu a, a kiheam tu uh hi.

¹⁵“Nang tungah ka thin uuk in ka thinso a daan kong piak ciang, na kiim a om minamte lau vadil tu uh hi. Amate in nang sia hong kii et tu a, hong nunau tu uh hi.

¹⁶Na anneak tu hong paina ka khaktan tu a, kong pukthisak tu hi. Nang hong lalsak tu in, a kikap thaltang hiamte ii khak bangin, ngilkialna ii a natzia sia na thuak tu hi.

¹⁷Na tate thatlum tu in ngilkialna le ngamsa ngilote kong puak tu a, tuaciangin nangma thatlum tu in natna, ngoltolna le ngalte kong puak tu hi, Keima, TOPA in ka son zo hi,” hong ci hi.