Read Siyin Chin Ezekiel 9 Bible Online

Ezekiel 9 - Siyin Chin bible

Ezekiel 9

¹Tua zawkciang Pathian sia hi bangin a au ka za hi, “No, khuapi daan a pia tute awng, hi sungah hong pai tavun. Na ngalhiamte hong keng tavun” ci hi.

²Thakhatin pasal luk sia Biakinnpi ii saksang kongpi puanung pan hong pai a ngalhiam khat tek toai uh hi. Amate taw lai at natu khat toai a, puanneal a silh pasal khat om hi. Amate a vekpi hong pai in, taau biaknatau hui ah ding uh hi.

³Israel te ii Pathian ompuina a lak, khuavak taang velvol sia a om ngeina ah a om cherub te kung panin kikhaangto in, Biakinnpi tumna ah kikhiin hi. TOPA in puanneal a silh pasalpa sam a,

⁴“Jerusalem khuapi bup sungah va pai ta'n a, khuapi sungah a kivawt, a kiihuai nate theampo hu in, a khuangai a thinngim theampo ii talki tungah tepteena vawt ta'n,” ci hi.

⁵Tuaciangin a dang pasalte munah Pathian in, “Khuapi sung theampo ah ama zui in that tavun. Kuama khoaikhe heak vun; kuama hesuak heak vun.

⁶Pasal huaite, tangvalte, ngaknute, nute le patangte thatlum siat vun. Ahihang a talki tungah tepteena a om pawpote thutha heak vun. Hi lai ka Biakinnpi panin pan vun,” a ci ka za hi. Tua ahikom amate in tua Biakinnpi ah a ding lampuite panin pan uh hi.

⁷Pathian in amate tungah, “Biakinnpi ninsak vun. A suumsung sia mithi luang taw kidimsak vun. Nasep kipan vun!” ci hi. Tua ahikom, amate in khuapi sungah khua mite thatlum tu in kipan uh hi.

⁸A kithalup saan hun sung tengin, tua munah keima bek ka om hi. Thakhatin lei ah pukin ka boksuk a, “Vaanglianpipa TOPA awng, Israel ngam sungah a kinusia mite theampo thalup tu dongin Jerusalem tungah na thin uuk ziam?” ci in ka au hi.

⁹Pathian in, “Israel le Judah mite in a lauhuai mama mawna khialnate nei uh hi. Amate in ngamsung theampo ah mihing that a, Jerusalem sia khialna lian taw kidimsak hi. Amate in Keima TOPA in amate ngam nusia zo a, amate mu ngawl hi hong ci hi.

¹⁰Ahihang amate tungah hesuakna nei ngawl tu khi hi; amate ii ngual tungah a vawt uh bangin, amate tungah ka vawt tu hi,” ci in hong zo hi.

¹¹Tua zawkciang, puanneal silh pa heak kik a, TOPA tungah, “Nong thupiak bangin ka seam zo hi,” ci in thu puak hi.