Read Siyin Chin Daniel 1 Bible Online

Daniel 1 - Siyin Chin bible

Daniel 1

¹Jehoiakim ii Judah kumpi a sua zawk a kum thum kumin, Babylon kumpipa Nebuchadnezzar in Jerusalem khuapi simin uumci hi.

²TOPA in, Jehoiakim Kumpipa sia Nebuchadnezzar Kumpipa in mansak a, biakinn na manpha pawlkhatte laaksak hi. Ama in a mat mihing pawlkhatte Babylon khua ama ii pathiante biakinn ah ciapui a, a mat sum le vanh manphate biakinn vanh kholna inndoite sungah koi hi.

³Kumpipa in Israel saltaangte sung pan kumpi nam le nampite tangvalno pawlkhat teal tu in a khutnuai ulianbel Ashpenaz thupia hi.

⁴Tua a teal mihingte sia kumpi inn sungah naseam thiamte a sua thei natu in a mealhoi, a pilvang, pha tak nasep a kisinsak sa, thu a he pal le pumpi tung paubanna nei ngawlte hi tu hi. Amate sia Babylon kam taw lai a sim thei natu le a at thei natu in Ashpenaz in hil tu hi.

⁵Kumpi inn sungah a om mihingte bangma in amate sia ni simin an le sapittui a piak natu kumpipa in thupia si hi. Hi bangin kum thum a sin zawkciang kumpipa mai ah kilak tu uh hi.

⁶Tuabang a kitealte sung panin Daniel, Hananiah, Mishael, le Azariah kihel a, a vekpi in Judah nam ahi uh hi.

⁷A ulianbel pa in amate sia min thak phua in: Belteshazzar, Shadrach, Meshach le Abednego ci hi.

⁸Daniel in kumpi inn sung pan a kipia an le sapittui neakna taw in ama le ama biakna sangah a kininsak ngawl natu in a thin khensat ahikom ama in Ashpenaz tungah huna ngen hi,

⁹tuaciang Pathian in Ashpenaz sia Daniel tungah hesuakna thin neisak hi.

¹⁰Ahizong Ashpenaz in kumpipa kiita ahikom ama in Daniel tungah, “Kumpipa in na neak tu le na dawn tu see sa nei zo ahikom, tangvalno dangte bangza ban zo bua lete ama in kei hong thatlum tu hi” ci hi.

¹¹Tuasia ciang Daniel sia ama le a lawm thum teng a uk in Ashpenaz ii a koi a cingpa kungah pai hi.

¹²Ama in, “Ni sawm sung hong sin ta'n a, ka neak tu uh anteete le ka dawn tu tui hong pia ta'n.

¹³Tua zawkciang kumpi an a ne tangvalno dangte taw hong ettee khawm ta'n a, ka meal uh nong muna bangin thu hong khen ta'n” ci hi.

¹⁴Ashpenaz in ni sawm sung kisinsak tu in thukim hi.

¹⁵A hun a cin ciang amate sia kumpi an a nete theampo sangin a ciidam tuak zaw, a tha hat tuak zaw uh hi.

¹⁶Tua ahikom tua ni pan kipan amate a cing pa in kumpipa ii piak an luangin anteete ne suaksak hi.

¹⁷Pathian in tua tangvalno lite sia heak theina, lai thiam pilna le thuthuk ngaisut theinate pia hi. Tua bek dom ngawlin ama in Daniel sia mukholnate pheen theina le mang khiak thiamna pia hi.

¹⁸Kumpipa ii ciangtan kum thum a cin ciang, Ashpenaz in tangvalnote theampo sia Nebuchadnezzar kungah paipui hi.

¹⁹Kumpipa in amate paupui siat a, Daniel, Hananiah, Mishael le Azariah sia a dangte sangin lungkimhuai sa zaw hi. Tua ahikom amate sia kumpipa inn sungah a vaihawm pawlmi suak uh hi.

²⁰Kumpipa in a dok pawpo ahibuale bangbang thu haksa nawno dongh kale hi mihing lite in a kumpi ngam bup a om aisaan theite le mitbum thiamte khat pawpo sangin a sawmvei in he zaw uh hi.

²¹Daniel sia kumpi inn ah Persia kumpilianpa Cyrus ii Babylon zo in a uk dong om suak hi.