Read Siyin Chin Daniel 10 Bible Online

Daniel 10 - Siyin Chin bible

Daniel 10

¹(Cyrus ii Persia kumpilian a sua zawk a kum thum kumin Belteshazzar a kici Daniel tungah thu khat kipualaak hi. Tua thu in thumaan ahihang telhak mama hi. Tua thu sia ama tungah mukholna taw in kisonthiang hi.

²Tua hun laitakin keima in, nipi thum sung mau in ka om hi.

³Nipi thum a cin mateng in keima in anlim ahizong sa ahizong sapittui ahizong ka ne bua a, ka sam zongh ka pot bua hi.

⁴Tua kum a tha masa tha, ni kul le ni li ni in Tigris ngun thahat sia hui ah ka ding hi.

⁵Ka etto le puannealte silh a, khamh ciitak kawngkhau a thua mihing khat ka mu hi.

⁶A pumpi sia suangmanpha khat bangin taang hi. A maitang sia khualeng bangin taang a, a mittangte sia mei kuang bangin a leng hi. A baan le a peangte sia taau kizut thiang bangin tee vakil a, a aw sia mi honpi au bangin nging hi.

⁷Tua mukholna a mu sia keima bek ka hi hi. Keima taw a omkhawm mihingte in bangma mu ngawl uh a, ahihang amate lau in tai a, buu uh hi.

⁸Tua munah keima bek ka taang a, hi a lamdang mukholna sia ka en hi. Ka tha om nawn ngawl a, ka meal kikheal ngawp ahikom, kuama in hong tel ngawl hi.

⁹Ama ii aw ka zaak ciang khua phawk ngawlin lei ah ka puk a, ka khuplam in ka om hi.

¹⁰Tuasia ciang khut khat in hong len in, ka khut le ka khup taw kikhuangkho in hong phongto a; ka liing vadil lai hi.

¹¹Tua vantunglalang in ka tungah, “Daniel awng, Pathian in nang hong it hi. Dingto in a, kong son tu thu pha takin ngai in. Na kungah keima hong thataak zo hi,” hong ci hi. Ama in hi thu a son zawkciang, liing vadil kawm ma in ka dingto hi.

¹²Tua zawkciang vantunglalang in, “Daniel awng, lau heak in. Telthiamna na nei natu in nangma mama kiniamkhiak tu in, na khensat ni masabel ni pan kipan Pathian in na thunget nate hong za zo hi. Na thungetna a zo tu in kong pai hi.

¹³Persia kumpi ngam a cing vantunglalang in ni kul le ni khat sung hong khak hi. Tuasia ciang vantunglalangte ii ukpi khat ahi Michael sia kei hong panpui tu in hong pai hi, banghang ziam cile tua mun Persia ngam sungah keima nguak hong kinusia hi.

¹⁴Mai lamsang na mipuite tungah a piang tu thute a telsak tu in hong pai ka hi hi. Hi sia in maisang thu tu mukholna ahi hi,” ci hi.

¹⁵Ama in hi bang hong son ciang, pau thei ngawlin lei ka sal hi.

¹⁶Tuaciang mihing taw a kibang tua vantunglalang in a khut hong thaak a, ka muk hong thamsak hi. Keima in ama tungah, “Syapa awng, hi mukholna in ka tha hong zawmsak mama a, ka ciliing a thai thei bua hi.

¹⁷A topa mai ah a ding sila khat taw ka kibang hi. Bangbangin hong paupui thei tu khi ziam? Thangui thatang ka nei bua hi, ka husamh hi,” ka ci hi.

¹⁸Ama in khatvei ma hong len kik lai a, tuasia ciang ka tha hatzaw ka sa hi.

¹⁹Ama in, “Pathian in nang hong it hi, tua ahikom bangma in na thinngimsak heak in a, lausak heak in,” hong ci hi. Hi teng a ci zawkciang ka tha hatzaw seseam ka sa a, “Topa awng nong son tu po hong son ta'n. Ka ci hong damsak zaw ni hi,” ka ci hi.

²⁰Ama in, “Banghangin na kungah hong pai khi ziam ci sia na he ziam? Thumaan thutak Laibu sungah a ki at thute a pualaak tu in hong pai ka hi hi. Tu in heak kikin Persia a cing vantunglalang sia ka do tu hi. Tua zawkciang Greece a cing vantunglalang hong kilangh tu hi. Israel a cing vantunglalang Michael simngawl kei hong hu tu kuama om ngawl hi.