Read Siyin Chin Daniel 11 Bible Online

Daniel 11 - Siyin Chin bible

Daniel 11

¹Ama in kei hong hu tu le hong dal tu in vaipuak nei hi.

²Tua hi a, tu a kong son tu thu in thumaan ahi hi,” ci hi. Vantunglalang in, “Kumpi thum in Persia ngam uk lai tu a, tua zomin a dang teng sangin a hau zaw kumpi a lina hong khang tu hi. Ama in a thahatbel laitak le a haubel laitakin Greece kumpi ngam thato tu hi.

³“Tua zawkciang ngalhang kumpi khat piang tu hi. Ama in kumpi ngamlianpi khat uk tu a, ama uuk pawpo vawt tu hi.

⁴Ahizong a tha a hatbel laitakin a kumpi ngamlian kitamhtham tu a, khen li kisua tu hi. Ama ii suan le paal ahi ngawl kumpite in ama taangin uk tu a, ahihang amate in ama ii vaangletna za in vaang nei ngawl tu uh hi.

⁵“Egypt kumpipa thahat tu hi. Ahizong a ngalkap mang lianbelte khat sia thahat zaw lai tu a, kumpi ngam a zai zaw uk tu hi.

⁶Kum tam mama zawkciang Egypt kumpipa in Syria kumpipa taw kipawl khopna vawt tu a, a tanu taw kiteangsak tu hi. Ahihang tua kipawl khopna sia kho ngawl tu a, tua tanu, a pasal, a ta le a tonpui naseamte theampo kithatlum tu hi.

⁷Tua zawk hai ngawlin Egypt kumpipa tanu ii mealheak khat kumpi suak tu hi. Tua kumpipa in Syria kumpipa ii ngalkaphonpi sim tu a, a kulh sungah tum in zo tu hi.

⁸Ama in amate ii pathian milimte le tua pathiante biak piakna in a ki aap khamh le ngunn taw kivawt nate sia Egypt ngam ah pua kik tu hi. Kum tam ma kilemin a om zawkciang,

⁹Syria kumpipa in Egypt ngam sim tu a, ahihang ama sia kinungkinsak kik tu hi.

¹⁰“Syria kumpipa ii tapate ngalsim tu in kinging tu a, ngalkap tam mama khawm tu hi. Kumpipa tapate sung pan khat in tui liim bangin ngalte ii kulh sim tu hi.

¹¹Egypt kumpipa in a thin uukna taw, Syria kumpipa sim tu a, a ngalkaphonpi matsak tu hi.

¹²Ama a ngalzawna le ngalkap tam mama a thalup hu in kiphasak tu a, ahihang ngalzo tan ngawl tu hi.

¹³“Syria kumpipa cia kikin a masa a nei ngalkap phaza sang a tamzaw ngalkap khawm tu hi. A hun cing a sak ciang ama in ngalhiam vanhte taw a kinging phitphet ngalkap tam mama taw kuan kik tu hi.

¹⁴Tuaciang mihing tam mama in Egypt kumpipa leedo tu uh hi. Tuaciang a mu sa mukholna khat hu in, Daniel awng, na minam sung pan a maitat mihing ngoltol pawlkhat in leedo tu uh hi, ahizong lel tu uh hi.

¹⁵Tua ahikom Syria kumpipa in kulh taw a ki uum khuapi khat uumci in la tu hi. Egypt ngalkapte in ngal do suak ngawl tu hi; amate sung pan a hatbel te ngawngawn zongh in thahatna a kicing nei ngawl tu hi.

¹⁶A nalh tu om nawn ngawlin Syria ngalkap pa in a uuk bang pawpo in amate vawt tu hi. Ama in Kamciamsa Ngam sungah ding tu a, tua ngam sia a khutnuai ah koi tu hi.

¹⁷“Syria kumpipa in a ngalkap buppi zanghin ngalsimin kuan tu ngeal hi. Tuasia zawkciang a ngal pa ii kumpi ngam a suksiat natu in ama in a ngalpa taw kipawlna khat vawtin a tanu taw kiteangsak tu hi; ahihang ama ngealna taangtung ngawl tu hi.

¹⁸Tua zawkciang ama in tuipi hui ah ngamte sim tu a, tam mama zo ngawp tu hi. Ahihang ngamdang lampui khat in ama zo tu a, a kisaktheina teng bosak tu hi; ama in Syria kumpipa ii kisaktheina sia ama tung ma ah tungsak kik nanak tu hi.

¹⁹Kumpipa in ama ngam kulhte zuan kik tu hi, ahihang ama in ngallel tu a, tuabangin ama bo tu hi.

²⁰“Kumpi dang khat in ama nungzui tu a, tua kumpipa in a kumpi ngam hauna khanto natu in phiangshia khonna taw mihingte a nengcip tu in ulian khat thataak tu hi. Tawmvei no sungin tua kumpipa kithatlum tu a, ahizong mihonpi mu na le hi ngal sungah hi ngawl tu hi,” ci hi.

²¹Vantunglalang in sonthiang tawto hi: “Syria kumpipa a suak kik tu sia kumpi tu in a kilawm ngawl mi ngilo khat hi tu hi, ahihang muanmawk khol ngawlin ama hong pai tu a, thimthelna taw kumpi za suan tu hi.

²²Ama a nalh pawpo, Pathian ii Thiampi Lianbel ahi keak zong kinil keakin, kibosak tu hi.

²³Kilemna vawtna taw, ama in minam dangte theam tu a, ama sia minam no khat bek uk hi napi thahat vaial tu hi.

²⁴Ama in hesak khol ngawlin ngamkhen hau khat sim tu a, a taanghpupite kuama ii vawt ngeingawl nate vawt tu hi. Tua zawkciang ama in ngal sungah a laak vanhte le nate sia a nungzuite hawmsak tu hi. Ama in ngal dalna kulhte sim tu in ngeal tu hi, ahihang ama hun bo pal tu hi.

²⁵“Ama in Egypt kumpipa sim tu in hang takin ngalkap tam mama khawm tu hi, Egypt kumpipa zongh in amate do kik tu in a thahat ngalkap tam mama taw kinging tu hi. Ahihang Egypt kumpipa sia kitheam tu a, ngalzo ngawl tu hi.

²⁶Ama ii a nai puibel a thudokte in ama siasak tu uh hi. A ngalkapte tam mama kithatlum tu a, kibosak tu hi.

²⁷Tua zawkciang tua kumpite ngeal sabuai khat ah an nekhawm tu uh hi, ahihang a ngaisutnate sia khawm uh a, khat le khat kitheam tu uh hi. A hun theng ngawl lai ahikom a dei bang nga ngawl tu uh hi.

²⁸Syria kumpipa sia Pathian mite ii biakna suksiat tu khensatna nei in ngal sungah a vanh laakte theampo taw a ngam zuan kik tu hi. Ama a uuk bang po in ngamta tu a, tua zawkciang a ngam ah cia kik tu hi.

²⁹“Tua zawkciang ama in Egypt ngam sim leleau tu a, ahihang hi hun ciang thutuam khat piang tu hi.

³⁰Rome mite ama nalh tu in, teambaw taw hong pai tu a, tuaciang ama a lau tu hi. “Tuasia ciang ama a thin uukin heak kik tu a, Pathian ii mite biakna susia tu in hanciam tu hi. Ama in tua biakna a taisan sate ii ngaisut piakna bang zui tu hi.

³¹A ngalkap pawlkhatte in Biakinnpi melsia tu uh hi. Amate in ni sim biakpiaknate tawpsak tu uh a, Kiihuai Lauhuai Tophala khat koi tu uh hi.

³²Theamna taw kumpipa in a biakna uh a nusia sa mihingte ii panpuina nga tu hi, ahihang Pathian nung a zuite in do kik tu uh hi.

³³Mihingte ii lampui ciimte in amate ii a ciimna midang tam mama hawm tu uh hi. Ahihang hun tawmvei sungah amate pawlkhat ngal sungah kithatlum tu a, ahibuale mei taw kihallum tu hi, tuaciang pawlkhatte sia kisuttol tu a, thong kitaaksak tu hi.

³⁴Tuabangin thalupna a thuak laitakin, Pathian mite in huna no khat nga tu uh a, ahizong amate a pawl pui mihing tam mama te sia amate phat tuam natu bekin a pawlpui hi tu uh hi.

³⁵Tua mihing ciim lampuite pawlkhat kithatlum tu a, ahihang hi sia hu in mihingte kithiansua tu hi. Hi sia Pathian ii ciangtan hun, a tawpna a thet dong kizom suak tu hi.

³⁶“Syria kumpipa in ama uuk babangin ngamta tu hi. Ama in pathian khat pawpo sangin ka lian zaw a, a Lianbel Pathian sang zongin lian zaw ing, ci in kisathei tu hi. Ama sia Pathian ii daan a piak matengin tubangin kiphasak thei tu hi. Pathian in ama ii ngeal sa bang vateak in vawt tu hi.

³⁷Kumpipa in a taanghpupite ii a biak pathian le numeite ii a it pathian zongh melsia tu hi. A tatakin ama in pathian theampo melsia tu hi, banghang ziam cile ama sia tuate sangin lian zaw kisa tu hi.

³⁸Tuate luangin ama in kulhte a cing pathian sia upat zaw tu hi. Ama in a taanghpupite ii a biak ngeingawl pathian khat tungah khamh, ngunn, suang manphate le a dang a manpha letsongte pia tu hi.

³⁹Ama ii kulhte cing tu in, ama in ngamdang pathian khat a bia mihingte zangh tu hi. Ama ukpa in a saangte sia ama in minphatna lian pia tu a, zalian pia hi, tuaciang a tel in leitang pia tu hi.

⁴⁰“Syria kumpipa ii hun a bo kuan ciang, Egypt kumpipa in ama sim tu hi, Syria kumpipa in a tha nei theampo taw, siphu ngalleangte, siphute le teambaw tam mama zanghin Egypt kumpipa do kik tu hi. Ama in namthuam tuikhang bangin ngam tam mama sim tu hi.

⁴¹Ama in Kamciamsa Ngam ngawngawn simin, mi tul tam mama that tu hi. Ahihang Edom ngam, Moab ngam le Ammon ngam sungah a taanglai sun teng suakta tu uh hi.

⁴²Ama in tua ngamte theampo a sim ciang, Egypt ngam ngawngawn kikhoaikhe ngawl tu hi.

⁴³Ama in Egypt ii a phual khamh le ngunn le a dang a neisa manpha teng laaksak tu hi. Ama in Libya le Ethiopia ngam zo tu hi.

⁴⁴Tuasia ciang, nisuana sang pan le saksang pan hong pai thuthak sia in ama patausak tu hi, tuaciang ama in thin uuk tatakin do tu a, mihing tam mama that tu hi.

⁴⁵Ama in a kumpi puanbuk liante ngawngawn sia Biakinnpi dinna mual le tuipi kilaklaw ah sa tu hi. Ahihang tua mun ah ama a hu tu om ngawlin thi tu hi,” ci hi.