Read Siyin Chin Daniel 2 Bible Online

Daniel 2 - Siyin Chin bible

Daniel 2

¹Nebuchadnezzar in kumpi a sua zawk a kum nii kumin mang khat man hi. Tua mang in ama thinngimsak mama a, mu thei ngawl hi,

²tua ahikom ama tungah a mang khiakna son tu in a aisaan theite, mitbum thiamte, bum toaite le ai toaite samsak hi. Amate hong pai in kumpipa mai ah a din uh ciang kumpipa in,

³amate tungah, “Mang khat ka mat huvau in ka thinngim hi. Tua ka mang ii a khiakna he nuam khi hi,” ci hi.

⁴Amate in Aramaic kam taw kumpipa tungah, “Kumpipa awng na khansau tawntung tahen! Na mang hong son ta'n, tua hile a khiakna kong sonthiang tu uh hi” ci in zo uh hi.

⁵Kumpipa in amate tungah, “Ka mang nong son kul tu a, tua zawkciang a khiakna nong son nanak natu uh in ka thin khensat zo khi hi. Nong son thei bua uh le, na khut le na peangte kong semthapsak tu a, na inn uh sia niinthuk ka suaksak tu hi.

⁶Ahizong ka mang le a khiakna nong son thei uh le letsong le min phatna lian kong pia tu hi. Tua ahiciang tu in, ka mang sia bang hi a, a khiakna bang ziam cisia hong son tavun,” ci hi.

⁷Amate in kumpipa tungah, “Kumpipa awng na mang hong son phot po lete, a khiakna kong sonthiang tu uh hi” ci kik uh hi.

⁸Tuaciang, kumpipa a nging in au a, “Ka ngaisut sa bangma hi nu hi! Hun haisaang thethei natu hanciam nu hi, banghang ziam cile ka mang nong son bua uh le,

⁹na vekpi a kibangin daan pia tu ci a ka khensat sia na heak uh hang ahi hi. Kei tungah leilot thu nong sawson uh sia na lungkim tek uh ma ahi hi, banghang ziam cile hun hong kilaih tu hi ci in na lamet uh hang ahi hi. Ka mang sia bang ziam hong son tavun, tua hile a khiakna zongh hong son thei si tu ci in ka he tu hi” ci hi.

¹⁰Kumpipa ii thudokte in, “Kumpipa awng, na heak nop bang sia hong son thei tu, hi leitung ah mihing khat beak om ngawl hi. Kumpipa dom ngawlin, milianbel le a vaanglianbel ngawngawn zongh khat beak in a aisaan theite, mitbum thiamte le bumtoai aitoaite tungah tuabang thute a dongh ngei kuama om ngawl lai hi.

¹¹Kumpipa ii nong thu dokna sia haksa mama ahikom pathiante simngawl hong son thei tu kuama om ngawl hi, tuaciang amate sia mihingte sungah teang ngawl hi” ci in zo uh hi.

¹²Tuasia ciang, kumpipa thin uuk mama a, Babylon ngamsung kumpi ii thudokte theampo thalup tu in thupia hi.

¹³Tua ahikom amate theampo thalup siat tu in thu kipia a, tuate sungah Daniel le a lawmte zongh kihel hi.

¹⁴Tuaciang Daniel sia mihing that tu a kisawl, kumpipa cingte a uk mangpa Arioch kungah pai hi. Kampau kidawm kawmin,

¹⁵ama in banghangin kumpipa in tuabang thupiak nasia mama khat suaksak ziam ci in, Arioch tungah dongh hi. Tuasia ciang Arioch in Daniel tungah thupiang teng son hi.

¹⁶Thakhat thu in Daniel pai a, kumpipa ii mang a khiak thei natu in kumpipa tung pan a hun nga thua hi.

¹⁷Tua zawkciang Daniel sia inn ah cia a, thupiang teng a lawmte Hananiah, Mishael le Azariah tungah son hi.

¹⁸Vantung Pathian in amate hesuak a, tua thu tumdang sia sonthiang thei in, Babylon ngamsung a kumpi thudok dangte taw a kithalup khop ngawl natu in, ama in a lawmte thungen tu in sawl hi.

¹⁹Tuasia ciang tua zanin tua thu tumdang sia Daniel mukholna sungah kipualaak hi, tuaciang ama in vantung Pathian a pok hi:

²⁰“Pathian sia ciim in vaanglian hi! Ama a tawntung a tawntungin pok vun.

²¹Ama in hunte le khua hunte uk hi; ama in kumpite panmun pia a, kumpite phiat hi; ciimna le pilna a pia pa sia ama ahi hi.

²²Ama in thuthukte le thukute pualaak hi; ama in khuazing sungah a kiphualte he a, ama mama sia khuavak in uumci hi.

²³Ka taanghpupite ii Pathian awng, nang kong pok a, kong zakta hi. Nangma in ciimna le thahatna nong pia zo hi; Ka thungetna nong zo a, kumpipa tungah ka son tu thute nong lak zo hi” ci hi.

²⁴Tua ahiciang Daniel sia kumpipa ii thudokte that tu in a sawl pa Arioch kungah pai hi. Daniel in Arioch tungah “Kumpipa ii thudokte that heak in. Kumpipa kungah hong paipui ta'n, a mang khiakna ka son tu hi” ci hi.

²⁵Thakhatin Arioch in Daniel sia Nebuchadnezzar kumpipa omna ah paipui in kumpipa tungah, “Kumpipa awng, Judah saltaangte sung panin na mang khiakna hong son thei tu khat mu zo khi hi” ci in son hi.

²⁶Kumpipa in (Belteshazzar zongh a kici) Daniel tungah, “Ka mangmat sia le a khiakna nong son thei tu ziam” ci hi.

²⁷Daniel in, “Kumpipa awng, tuasia hong son thei tu in, bum lei aitoai, mitbum thiam, aisaan thiam ahibuale aksi en thiam kuama om ngawl hi.

²⁸Ahihang thutumdangte a pualaak vantung ah Pathian khat om hi. Ama in maisang thupiang tute, Nangma Kumpipa tungah hong hil zo hi. Na mut laitak a na mu kholna, tua mang sia tu in kong son tu hi.

²⁹“Kumpipa awng, na mut laitakin, maisang hong piang tute mang in na man hi; thutumdangte a pualaak Pathian in a piang tu thu hong lak hi.

³⁰Tu in midangte saangin ka pil zawk man hi ngawl hi, ahizong Nangma kumpipa ii na mang khiakna le na ngaisut thute na heak natu in hi thu tumdang sia kei tungah hong kipualaak hi.

³¹“Kumpipa awng, na mukholna sungah a taang hemhom a kiitakhuai milim lian mama khat na mai ah a ding na mu hi.

³²Tua milim lutang sia khamh ciitak taw kivawt a; a awm le a baante sia ngunn taw kivawt in; a kawng le a khealte sia taau taw kivawt hi.

³³A peangte thik taw kivawt a, a peangpakte khen khat thik taw kivawt in, khen khat tungman taw kivawt hi.

³⁴Tua milim na et laitak, kuama ii thuthaak ngawl bulin, liang tung pan suangtum lian khat hong liiksuk a, thik le tungman taw a kivawt milim ii peangte kha in zaanthamsak hi.

³⁵Thakhatin thik, tungman, taau, ngunn le khamhte tamhneen ngawp a, khuakhaal lai ancilna mun a leivuite taw kibang hi. Vui in tuate seammang a, bangma taang nawn ngawl hi. Ahizong tua suangtum sia khang in mual cia pha a, leitung buppi huam hi.

³⁶“Na mangmat sia tu a bang teng hi. Tu in Nangma Kumpipa tungah a khiakna kong son tu hi.

³⁷Kumpipa awng, nangma in kumpi theampo sung panin a lianbel na hi hi. Vantung Pathian in nang sia kumpi lian in hong koi zo a, vaangletna, thahatna le upatna hong pia zo hi.

³⁸Ama in nang sia mihing teenna leitung theampo, nganhingte le vacimte theampo a ukpa in hong koi zo hi. Tua khamh lutang sia nangma na hi hi.

³⁹Nang zawkciang nangma ngam za in a lian ngawl kumpi ngamlian khat hong piang tu a, tua zawkciang leitung buppi a uk tu taau ahi kumpi ngamlian thumna piang tu hi.

⁴⁰Tua zawkciang na theampo sutham in a zaansak, thik bangin a kho, kumpi ngamlian lina hong piang tu hi. Thik in na theampo a sukthap bangin tua a ngam in kumpi ngamlian masa teng khen tham in sucip tu hi.

⁴¹A peangpak le a peangmete khen khat sia thik hi a, khen khat tungman a hina zongh na mu hi. Tuasia in a kikhen ngamlian khat hi tu hi, a cina hi. Tungman le thik kingawm ahikom tua in thik ii thahatna a khomkhat nei tu hi.

⁴²Peangmete — khen khat thik, khen khat tungman — a hina sia kumpi ngamlian khen khat thahat in khen khat thazawm tu, cinopna ahi hi.

⁴³Thik le tungman a kihel khawm zongh na mu hi. Tua kumpi ngamlian ukte in a innkuanpuite kiteensakna taw in ngawmtua tu hanciam tu a, ahihang thik le tungman a kihel thei ngawl bangma in kingawmtua thei ngawl tu uh hi.

⁴⁴Tua ngamukte hun sungin, vantung Pathian in a bo ngeingawl tu kumpi ngam khat phut tu hi. Tua ngam sia kuama in zo zo ngawl tu a, ahizong tua ngam in kumpi ngamliante theampo zo ngawpin kip tawntung tu hi.

⁴⁵Kuama ii thuthaak ngawl bulin liang tung pan hong liik suangtum khat in thik, taau, tungman, ngunn le khamh taw a kivawt milim sia a denthap na mu hi. A lian Pathian in mai sangah a piang tu thu, Nangma Kumpipa tungah hong son hi. Na mangmat sia ahi bang vateak in kong son zo a, a khiakna maan kong son zo hi” ci in zo kik hi.

⁴⁶Tuaciang Nebuchadnezzar kumpipa lei ah kunsuk in, sangaw biakpiaknate le biakpiaknate Daniel tungah vawt tu in thupia hi.

⁴⁷Kumpipa in, “Na Pathian sia pathian theampo sung pan a lianbel, kumpite tungah TOPA hi a, thu telhakte a pualaak pa ahi hi. Hi thu ka he hi, banghang ziam cile nangma in hi thu telhak sia na pualaak thei hang hi” ci hi.

⁴⁸Tua zawkciang kumpipa in Daniel sia letsong pha tam ma pia in a za khangsak a, Babylon ngamkhen uksakin, kumpi thudokte theampo ii lutang in koi hi.

⁴⁹Daniel ii ngetna bangma in kumpipa in Shadrach, Meshach le Abednego te sia Babylon ngamkhen sung vaite a uk tu in koi a, Daniel ahile kumpi inn sungah om suak hi.