Read Siyin Chin Daniel 4 Bible Online

Daniel 4 - Siyin Chin bible

Daniel 4

¹Nebuchadnezzar kumpipa in leitung ah a om ngam theampo, minam theampo le paunam theampo pan mihingte tungah a nuai a bang thu puak hi: “Kong nukset hi!

²Lianbel Pathian ii ka tungah hong lak a lamdangte le nalamdang laknate ngai vun.

³“Pathian ii eite hong lak nalamdangte lian lawlawm hi! A vawt nalamdang laknate vaang nei lawlawm hi! Pathian sia a tawntungin kumpi hi a; ama in a tawntungin uk tu hi.

⁴“Keima in kumpi inn sungah ka teang hiithiat a, nuamsa mama in ka om hi.

⁵Ahihang a patau huai mang khat ka man a, ka mut laitakin a lauhuai mu kholnate ka mu hi.

⁶Ka mang khiakna hong son thei tu in, Babylon ngamsung kumpi thudokte theampo ka kungah hong pai natu in thu ka pia hi.

⁷Tuaciang aisaan theite, mitbum thiamte, doaiai neite le aksi enthiamte theampo kisam a, amate tungah ka mang ka son hi, ahizong amate in a khiakna hong son thei bua uh hi.

⁸Tuaciang Daniel (a min dang Belteshazzar, ka pathian min a kitap pa) hong tum hi. A thiangtho pathiante ii thaa sia ama sungah om ahikom, ama tungah ka mang ka son hi. Ama tungah:

⁹Aisaan theite ukpi Belteshazzar awng, a thiangtho pathiante ii thaa sia na sungah om in thu telhak theampo na tel thei hunlam ka he hi. Hi sia keima mang hi. A khiakna hong son ta'n.

¹⁰“Ka mut laitakin leitung laizang ah thingkung lian mama khat mukholna khat ka nei hi.

¹¹Tua thingkung sia van a phak dongin lian vaial in khangto a, leitung mihing theampo in mu thei uh hi.

¹²A teete et hoi a, tuaciang a ngate taw tuaisuk in — leitung bup ii a neakkhop tu za in nga thiam hi. Ngamsate in a lim bealhin tawlnga a, vacimte sia a baakte tungah bu tom hi, tuaciang nuntakna nei a minpiang theampo in a nga ne uh hi.

¹³“Ka mukholna thu ka ngaisut laitakin khua a phawk vilvel, a mit pilvang vantunglalang khat sia vantung pan hong tuaksuk ka mu hi.

¹⁴Ama in nging takin, ‘Tua thingkung phuktan in a, a baak teng siiktan in; a tee teng heu thiang in a, a nga thethaang in. A nuai a nganhing teng le thingbaak tungah vacim teng bengkeak in.

¹⁵Ahizong a bul sia thik le taau kual taw khit in lei sungah nusia in. Tua mun lo sungah lopa taw nusia in. “ ‘Tu in hisia pa tungah daaitui kia tahen a, ama sia nganhingte le thingkungte taw teang khawm tahen.

¹⁶Ama in kum sali sung mihing ngaisutna nei ngawl tu a, ahizong nganhing ngaisutna nei tu hi.

¹⁷Hi thu sia a pilvang le a phawk vilvel vantunglalangte ii thukhenna ahi hi. Tua ahiciang mun theampo ah om mihing theampo in, Lianbel Pathian in mihing kumpi ngamte tungah vaang nei a, ama ii teal khat pawpo — mihing thupi ngawl belte ngawngawn tungah zongh kumpi ngamte pia thei hi ci thu he tahen, ci in thangsak hi.’

¹⁸“Ka mangmat sia hi bang hi,” Nebuchadnezzar kumpipa in ci hi. “Tu in Belteshazzar awng, a khiakna hong son ta'n. Ka kumpi thudokte kuama in hong son thei ngawl hi, ahizong nang sungah a thiangtho pathiante ii thaa om ahikom nong son thei tu hi,” ci hi.

¹⁹Tuaciang Belteshazzar zongh a kici Daniel patau mama ahikom bangma pau thei ngawl hi. Kumpipa in ama tungah, “Belteshazzar awng, tua mang le a thu in patausak heak in,” ci hi. Belteshazzar in, “Kumpipa awng, tua mang le a khiakna sia nang tungah hong tung ngawlin na ngalte tungah tung zaw le ka oai hi.

²⁰A saang mama van a ban thingkung sia leitung mihing theampo in mu thei uh hi.

²¹A teete et hoi a, leitung bup a vaak khom zo tu in a nga nga thiam hi. Ngamsate a nuai ah tawlnga in, vacimte a baakte tungah bu tom uh hi.

²²“Kumpipa awng, nangma in a saang, a thahat thingkung sia na hi hi. Khangto in lian mama na hikom vantung na baan to a, na vaangletna sia leitung buppi ah kizel hi.

²³Kumpipa Nangma in na et laitakin, vantunglalang khat vantung panin hong tuaksuk a, ama in ‘Thingkung phuk in a, susia in, ahizong lei sungah a bul nusia in. A bul ah thik le taau kual vial in a, tua mun lo sungah lopate taw nusia in. Hisia pa tungah daaitui kia tahen a tua munah kum sali sung nganhingte taw teang tahen,’ ci hi.

²⁴“Kumpipa awng, a khiakna sia hi bang hi a, nang tungah hong tung tu in Lianbel Pathian ii ci sa ahi hi.

²⁵Mihing huamsung panin hong kihawlkeak tu a, ngamsate taw na teang khawm tu hi. Khuital khat bangin kum sali sung lopa ne in lozau sungah zan na ngiak tu a, na tungah daaitui hong kia tu hi. Tuaciang Lianbel Pathian in mihing kumpi ngamte uk a, tuate sia ama ii teal khat pawpo pia thei hi ci sia na saang tu hi.

²⁶Vantunglalang in lei sungah tua thingbul a kinusiat natu in thupia hi. Tu sia in leitung theampo Pathian ii uk ahi hunlam na tel tak ciang kumpi na sua kik tu hong sonna ahi hi.

²⁷Tua ahiciang kumpipa awng, kong thuhilna hong ni ta'n. Mawna na vawt kheal in a, a maan in seam in, tuaciang a zawngte hesuak in. Tua hile na nuamsa tawto tu hi,” ci in zo kik hi.

²⁸Hi thu theampo Nebuchadnezzar kumpipa tungah tung siat hi.

²⁹Tha sawm le tha nii bek zawkciang, ama ii Babylon kumpi inn khuvum tungah a va kawkoai kawmin,

³⁰ama in, “En vun, Babylon khua bangzata lian ziam! Ka vaangletna, ka thahatna, ka minthanna le ka letnate lak natu ka khuapi in ka sa hi,” ci hi.

³¹A kammalte zongh khuangkhim ngawl lai in, vantung pan pauna aw khat hong nging a, “Nebuchadnezzar kumpipa awng, ka thu son ngai in! Na kumpi vaangletna sia tu in na tung pan hong kilaaksak hi.

³²Nangma sia mihing huamsung pan hong kibeng tu a, ngamsate taw teang khawmin, khuital khat bangin kum sali sung lopa na ne tu hi. Tuaciang, Lianbel Pathian in mihing kumpi ngamte uk a, a teal khat pawpo tungah kumpi ngamte pia thei ahi hunlam na he tu hi,” ci hi.

³³A kammalte thakhat ma taangtung paih hi. Nebuchadnezzar sia mihing huamsung pan kibengkeak a, khuital khat bangin lopa ne hi. A pum tungah daaitui kia in, a sam sia muvanlai thate za in sau a, a khutcinte sia vacimte ii peangcin za in sau hi.

³⁴Kumpipa in, “Kum sali a cin zawkciang van ka ento a, ka thin hong ciim kik hi. Lianbel Pathian ka pok a, a nungta tawntung pa khat tungah zatakna le minthanna ka pia hi. “Ama in a tawntungin uk tu a, a kumpi ngam sia kip tawntung tu hi.

³⁵Ama in leitung mite bangma in a thusim bua a; vantung a om vantung mite le leitung a om mite ama in uk hi. Ama deina kuama in nalh thei ngawl a, ahibuale a sep a vawtte kuama in dongh kik thei ngawl hi.

³⁶“Ka thin a ciim kik ciang ka minphatna, ka kumpi za le ka kumpi ngam ukna vaang hong kipia kik hi. Ka uliante le ka nampi mite in hong muak uh a, nidang sangin a lianzaw minphatna le ka kumpi vaang hong kipia kik hi.

³⁷“Tu in keima Nebuchadnezzar in Vantung Kumpipa pok in, zatakna pia in, a min ka thangsak hi. Ama ii a sep a vawt theampo a maan le a thutang hi a, ama in kiphasak a, a ngamta pawpo kiniamkhiaksak thei hi,” ci hi.