Read Siyin Chin Daniel 7 Bible Online

Daniel 7 - Siyin Chin bible

Daniel 7

¹Belshazzar ii Babylon kumpi a sep kipat kumin keima in mang khat ka man a, zanin mukholna khat ka mu hi. Ka mang mat sia lai taw ka at a, tua zan a ka mu sia ka tepteena in

²hi bang ahi hi: Mun theampo pan vui hong va a, tuipi mai seam ngawp hi.

³Tuipi sung pan nganhing lian li pusuak a, khat le khat kibang ngawl hi.

⁴A masabel sia tawpi taw kibang a, ahizong muvanlai khat bangin tha nei hi. Ka et laitakin a thate tong hi. Tua nganhing sia kilaamto in mihing bangin kidingtosak hi. Tuaciang ama sia mihing ngaisutna kipia hi.

⁵A niina nganhing sia a nung peangte taw a ding vompui khat taw kibang hi. Tuasia in a hate taw telngu thum pu a, awnging khat in ama tungah, “Sa na neak zawk zaza ne tan lai in!” ci hi.

⁶Ka et laitakin nganhing khat kilangh hi. Tuasia pawlbeam taw kibang a, ahizong a nungzaang ah vacim tha taw a kibang tha li om in lutang li nei hi. Thu nei tuak khat in kimu hi.

⁷Ka et lalai le, nganhing a lina kilangh hi. Tuasia vaang nei a lauhuai in kiitakhuai hi. A mat sate sia a thik ha lian taw khimtham in tua zawkciang tuanhcil hi. Nganhing dangte taw kibang ngawlin, kii sawm nei hi.

⁸Tua kiite ka salh laitak a dang kiite sungah kiino khat hong poto ka mu hi. Tua kiino in tua munah a omsa kii thumte phulkeak hi. Hi kii in mihing mittangte le kiphatsak kam a pau kam khat nei hi.

⁹Ka et laitakin kumpi tokhumte a om natu san tek ah hong kikoi hi. A nungta tawntung mihing khat sia tua kumpi tokhumte khat tungah to hi. A puante vuuk bangin paak a, a sam sia tuumul taw kibang hi. A kuang muite tungah a kinga a kumpi tokhum sia, meikaang a,

¹⁰tua mun panin meikuang a kipee in hong pusuak hi. Ama ii naseam tu in mihing tul tam mama tua munah om a, ama mai ah mihing awn tam mama ding uh hi. Thukhen natu hun kipan a, laibute kihong hi.

¹¹Ka et laitakin tua kiino ii kiphatsakna kam a papau ka za thei lai hi. Ka et lalai ciang nganhing a lina sia kithatlum a, a luang sia meikuang sungah kivawkin kaanghtum hi.

¹²Nganhing dangte ahile a vaang kilaaksak a, ahizong a nuntak lai natu hun ciangtan khat kipia hi.

¹³Hi mukholna ka mu ni zanin mihing taw a kibang khat ka mu hi. Ama sia meeikaai in kiim uum in ka kung hong neak a, tuaciang a nungta tawntung pa kung zuanin tua pa taw kimu hi.

¹⁴Ngam theampo, minam theampo le paunam theampo pan mite in ama ii na a sep natu in ama sia thu neina, upatna le kumpi vaangletna kipia hi. A thuneina in a tawntungin kip tu a, a kumpi ngam bo ngeingawl tu hi.

¹⁵Ka mukholnate in hong patausak a, ka thin hong nawngkaisak mama hi.

¹⁶Tua munah a ding mihingte khat kungah ka paito a, hi sia ii khiakna hong son siat natu in ka dongh hi. Tua ahiciang ama in a khiakna hong son hi.

¹⁷Ama in, “Hi nganhing lian lite sia leitung ah a piang tu kumpi ngamlian lite ahi hi.

¹⁸Tuaciang Lianbel Pathian ii mihingte in kumpi vaangletna nga tu a, a tawntung a tawntungin keam tu uh hi,” hong ci hi.

¹⁹Tua zawkciang a dangte taw a kibang ngawl nganhing lina — a kiitakhuai mama, a mat sate sia a taau peangcin le a thik ha taw khimtham in a tuanhcil sia ii thu a tamzaw ka he nuam hi.

²⁰A lu tung a om kii sawmte ii thu le a zawkciang hong poto a, kii thumte a pukvawksak kii sia ii thu ka he nuam hi. Tuasia in mittangte le kam khat nei a, kiphatsak kam pau hi. Tuasia a dangte khat pawpo sangin kiitakhuai zaw hi.

²¹Ka et laitakin, tua kii in Pathian ii mihingte do in zothal hi.

²²Tuaciang a nungta tawntung mihingpa hong pai a, Lianbel Pathian ii mihingte ngumin thu khen hi. Pathian ii mihingte ii kumpi vaangletna a nga natu hun hong theng zo hi.

²³Hi sia keima tungah hong kison a khiakna ahi hi: “Nganhing lina sia leitung ah a om tu kumpi ngamlian lina hi a, kumpi ngamlian dangte theampo taw kilamdang tu hi. Tuasia in leitung buppi sutham in tuanhcil tu hi.

²⁴Kii sawmte sia tua kumpi ngamlian uk tu kumpi sawmte ahi hi. Tua zawkciang kumpi dang khat hong piang tu hi; ama sia a om masate taw kilamdang mama tu a, kumpi thumte lawnthal tu hi.

²⁵Ama in Lianbel Pathian sia sonsia tu a Pathian ii mihingte nengcip tu hi. Ama in amate ii biakna taw kipawl thukhamte le poai vawtnate khealsak tu in hanciam tu hi, Pathian ii mihingte sia ama ii khutnuai ah kum thum le kumlang om tu hi.

²⁶Tua zawkciang vantung thukhenna munah thu kikhen tu a, ama ii vaangletna kilaaksakin, kisusia dipdeap tu hi.

²⁷Leitung kumpi ngam theampo ii vaang le a letna sia Lianbel Pathian ii mihingte tungah kipia tu hi. Amate kumpi vaang sia bo ngeingawl tu a, leitung a ukte theampo in amate na sepsakin a thu ni tu uh hi,” ci hi.

²⁸Hi sia thu tepteena ii tawpna ahi hi. Ka lau mama hu in ka mai daang a, thu theampo keima thinsung bek ah ka koi hi.