Read Siyin Chin Daniel 9 Bible Online

Daniel 9 - Siyin Chin bible

Daniel 9

¹Xerxes ii tapa, Mede mi Darius in Babylon ngam uk hi.

²Ama kumpi sua a kum khat kumin keima in thubu thiangthote ka sim a TOPA ii kamsaang Jeremiah tungah a son kum sawmsali sung Jerusalem a lalsa in om tu hi, a ci sia thu ka ngaisun hi.

³An ka tang a, khau-ip puan silhin vut sungah to in, TOPA Pathian tungah hesuak ngenin nasia tak thu ka ngen hi.

⁴TOPA ka Pathian tungah thungen in ka mite ii mawna khialnate ka pualaak hi. Keima in, “TOPA Pathian awng, nang na lian a kong zakta uh hi. Na thuciamna tungah na thumaan a, nang hong it te le na thupiakna bang a seamte a tawntungin na it hi.

⁵“Kote khialna ka vawt zo uh a, ngilo in ka maw zo uh hi. Sep tu in nong thupiakte kong nial uh a, a maan nong lakna pan ka pial zo uh hi.

⁶Kote kumpite, hong ukte, taanghpupite le ko minam bup tungah na min taw thu a son na naseam kamsaangte ii thu ka ngai bua uh hi.

⁷TOPA awng, nangma in a tawntungin a maan na seam a, ahizong ko ka hi uh le koma le koma ka mai ka kimawlsak tawntung uh hi. Judea ngam le Jerusalem khua sungah a teang kote theampo le a nai le a khualana ngam tuatuam ah na thethaang Israel te theampo atu in hi thu sia maan hi, banghang ziam cile amate in nang tungah hong thumaan ngawl hi.

⁸Kote kumpite, hong ukte le taanghpupite in a maizumhuai in ngamta uh a, TOPA nang tungah hong maw zo uh hi.

⁹Kote in nang hong langpan zo ka hita uh zongin nang in nong hesuak a, nong maisak hi.

¹⁰Oh TOPA kote Pathian awng, na naseam kamsaangte tungtawnin nong piak thukhamte bangin nungta tu a nong sawl sia kong nadon bua uh hi.

¹¹Israel mite theampo in na thukhamte paltan in na son thute ngai nuam ngawl uh hi. Nang tungah kong maw uh hi, tua hu in na naseampa Moses ii thukham sungah a ki at haamsiatnate ko tungah nong tungsak hi.

¹²Kote tung le kote hong ukte tungah kong vawt tu hi nong ci sa bangma in nong vawt hi. Leitung a om khuapi dang khat po sangin Jerusalem khuapi sia a nasia zaw in daan na pia a,

¹³Moses thukham sungah a kison daan theampo nong thuaksak hi. Oh TOPA kote Pathian awng, ahihang tu ngawngawn zongin ka mawna ka khialna te kisiik in, ahibuale na thumaan thutak zuina taw nang hong lungdamsak tu in, ka hanciam bua uh hi. Oh

¹⁴TOPA kote Pathian awng, nangma in kote daan hong pia tu in na kithoai a, nong pia takpi hi, banghang ziam cile nangma in a maan bang na seam tawntung a, koma in nang kong nadon bua uh hi.

¹⁵Oh “TOPA kote Pathian awng, na mite Egypt ngam pan nong paipuina taw in na vaangletna nong lak a, na vaangletna kiciamtee lai hi. Ka maw zo uh hi; khialna ka vawt zo uh hi.

¹⁶Nidang in kote nong huu zo hi, tua ahikom Jerusalem tungah hong thin uuk nawn heak in. Tua in na khuapi, na mual thiangtho ahi hi. Kote ii mawna khialnate le ka taanghpupite ii tatsiatna hangin ka kiim ka paam ngamte theampo in Jerusalem le na mite hong nomu uh hi.

¹⁷Oh Pathian awng, ka thungetna le kong thuumna hong ngai ta'n. A kisia sa na Biakinnpi hong pua kik ta'n; mihing theampo in nangma Pathian na hi hunlam hong heak natu in puua kik in.

¹⁸Oh Pathian awng, ko thuson hong ngai ta'n; ko hong en ta'n a, ka ngim thuakna uh le na min a pu khuapi ii thuaknate hong mu ta'n. Ko ii sepna a maan hang hi ngawlin, nangma ii hesuakna suangin thu kong ngen uh hi.

¹⁹TOPA awng, hong za ta'n. TOPA awng, hong maisak ta'n. TOPA awng, hong ngai ta'n a, hong seam ta'n! Mihing theampo in Pathian na hi hunlam hong heak natu in haisaang heak in! Hi khuapi le hi mihingte sia nangma aa ahi hi,” ka ci hi.

²⁰Keima mawna khialna le Israel ka mite ii mawna khialna pualaak in thu ka ngen tan a, TOPA ka Pathian tungah a Biakinnpi thiangtho a ngeina bangin a pua kik natu tatsat ngawlin hesuak ka ngen hi.

²¹Thu ka nget laitakin, a masa ka mukhol lai a ka mu sa Gabriel sia ka omna munah hong leangsuk hi. Tua hun sia nitak sang biakpiak tu hun ahi hi.

²²Ama in, “Daniel awng, hi kamsaanna thu na tel thei natu in hong hu tu in kong pai hi.

²³Pathian tung hesuak ngen tu na kipat ciang ama in hong zo hi. Ama in nang hong it ahikom a deina thu son tu in kong pai hi. Tu in mukholna kong sonthiang laitak thudon in.

²⁴“Mawna le ngamtat siatna pan na mite le na khuapi thiangtho a suataksak natu in Pathian in kum sawmsali ii a salivei hunsung ciangtan zo hi. Mawna kimaisak tu a, tawntung thukhaikim thu om tu hi, tuasia ciang mukholna le kamsaanna taangtung takpi tu a, a Biakinnpi thiangtho sia aapna kinei kik tu hi.

²⁵Hi thu ciamtee in tel in: Jerusalem a kipua kik natu thupiakna a om hun pan kipan Pathian ii teal lampui pa hong thet dong kum sali mun salivei hun ngei tu hi. Jerusalem sia a lampite le a kidalna kulh khote taw kivawt kik tu a, kum sawmluk le kum nii ii a salivei kumte dong kho tu a, ahihang hi hun sia buaina hun hi tu hi.

²⁶Tua hun a bo ciang Pathian tealsa lampuipa sia thuak tuak ngawl bulin kithat tu hi. Tua khuapi le Biakinnpi sia ngal sim tu in hong kuan a thahat ngamukpa khat ii ngalkaphonpi in susia tu hi. A tawpna sia tuiliim bangin hong pai tu a, Pathian ii vawtkhol ahi ngal kisimna le suksiatna hong paipui tu hi.

²⁷Tua ukpa in mihing tam mama taw kum sali atu thukimna kho khat vawt tu hi; hi hun ii khenlang hong cin ciangin ama in sangaw biakpiakna le biakpiaknate bosak tu hi. Kiihuai Lau huai Tophala sia Biakinnpi ii a saang belna munah kikoi tu a, Pathian ii vawtkhol bangin a koi pa a bo mateng in tua munah om top tu hi,” ci in hong son hi.