Read Siyin Chin Hosea 11 Bible Online

Hosea 11 - Siyin Chin bible

Hosea 11

¹TOPA in, “Israel sia patangno khat ahi lai in ama ka it a, ka tapa bangin Egypt ngam pan ka samkhia hi.

²Ahihang ama ka sap a tam vaial ciang hong nungngat san vaial hi. Ka mite in Baal tungah sangaw biakpiakna pia hi; amate in milimte atu in ngimnamtui hal uh hi.

³Ahitazong, Israel lampai tu a hil sia keima ka hi hi. Ka mite ka khut sungah ka toai hi, ahihang keima ii ka khoi hunlam amate in tel ngawl hi.

⁴Itna le deisakna taw keima sangah amate ka kai hi. Ka domto a ka biangkho taw ka kiphatosak hi; ka kunsuk a, amate an ka vaak hi.

⁵“Kei kungah hong heak kik nuam ngawl ahiciang, Egypt ma ah a heak kik uh kul tu a; tuaciang Assyria te in amate uk tu hi.

⁶Ngal in a khuapite phialmang tu a, a kongpite sutham siat tu hi. A uuk thu in phabel a sak bang po in ngamta ahikom tuasia in ka mite susia hi.

⁷Amate in kei kung pan puapial tu bebek ma sawm vatan uh hi. Amate tungah hakkol kisuanh ahi hu in kap tu ahihang kuama in a vanh dawn ngawl tu hi.

⁸“Israel awng, bangbangin hong thasua thei tu khi ziam? Bangbangin hong nusia thei tu khi ziam? Admah ka suksiat bangin hong susia ngei tu khi ziam? tua ahibuale Zeboiim tungah ka vawt ngei bangin nang hong vawt tu khi ziam? Ka lungtang in tuabang hong vawtsak ngawl tu hi! Nang kong itna sia nasia lei hi.

⁹Ka thin uuk hu in nang daan kong pia buatu hi; Israel ka susia kik buatu hi. Banghang ziam cile kei mihing hi ngawlin Pathian khi hi. Keima a Thiangtho Pa in note taw kong omkhawm hi. Thin uuksa in nang kung kong pai buatu hi.

¹⁰“A ngalte tawpi bangin ka hawksan ciang ka mite in kei hong zui tu hi. Amate in nitumna sang pan kei kung manlang takin hong zuan tu uh hi.

¹¹Amate Egypt pan vacim bangin, Assyria pan vakhute bangin manlang takin hong pai tu uh hi. Amate a inn tek ah ka ciasak kik tu hi. Keima TOPA in ka ci zo hi,” ci hi.

¹²TOPA in, “Israel mite in kei leilot thu le theamna taw hong kiim uum a, Judah mite in kei a thumaan le a thiangtho Pathian hong langpan lai uh hi.