Read Siyin Chin Hosea 12 Bible Online

Hosea 12 - Siyin Chin bible

Hosea 12

¹Zingsang pan nitak dong Israel mite ngamtatnate theampo kimanna om ngawl a, siatna vive hi. Ciampealna le ngoltol ngamtatna sia amate sungah khangto vaial hi. Amate in Assyria taw ngal kilemna thukimnate vawtin Egypt taw sum vawt khawm uh hi,” ci hi.

²Judah mite tungah TOPA in mawsakna khat nei hi; Israel zongh a mite ngamtatna bangin daan pia tu hi. Amate ngamtatna sate bangin ama in thuk kik tu hi.

³A taanghpupi Jacob sia apeang a suapuipa Esau taw a nu ngil sungah a omkhop lai ma in kilaai hi; Jacob hong khan ciang ama in Pathian langpan hi —

⁴ama in vantunglalang khat buanin zo hi. Ama kapin thupha ngen hi. Tuaciang Bethel ah ih taanghpupi Jacob kungah Pathian pai in paupui hi.

⁵Hisia in Vaanglianbelpa TOPA Pathian ahi hi — TOPA sia ama ih biak natu min ahi hi.

⁶Tua ahikom tu in Jacob suan le paalte awng, na Pathian muang vun a, ama kungah heak kik vun. Pathian tungah citakin thutang vun, tuaciang na Pathian ii note atu hong sep tu sia thinsau takin ngak vun.

⁷TOPA in, “Israel mite sia Canaan mite bangza ma in thumaan ngawl uh hi; amate in vanh leite toaisuang maan ngawl taw theam thanuam uh hi.

⁸Amate in ‘Ko hau khu hi, nei le lamh khol zo khu hi. Kuama in thimthelna taw hau hi ci in, ko hong mawsak thei ngawl hi,’ ci hi.

⁹Ahihang, Egypt ngam pan hong pusua pui keima, TOPA na Pathian in, senneal ngamsung noma kungah kong pai lai bangma in tuipuan buk sungah kong teangsak kik tu hi.

¹⁰“Kamsaangte ka paupui a, mukholna tam mama ka pia hi, tuaciang kamsaangte tungtawnin ka mite kidop natu thu ka pia hi.

¹¹Tua hi napi Gilead ah milimte kibia a, a biate thi tu hi. Gilgal ah khuitalte sangaw biakpiakna in kipia a, tua munah biaknataute zong lozau sungah suang kholte suak tu hi,” ci hi.

¹²Ih taanghpupi Jacob sia Mesopotamia ah tai a, zi khat a nga natu in tua munah midang khat ii na seamin a tuute cing hi.

¹³Egypt a saltanna pan Israel mite a suatak tu le a keam tu in TOPA in kamsaang khat puak hi.

¹⁴Israel mite in TOPA nasia takin thin uuksak hi; amate khialna liante hangin a thi tu in kilawm hi. Ama min a daisak uh hu in TOPA in amate daan pia tu hi.