Read Siyin Chin Hosea 14 Bible Online

Hosea 14 - Siyin Chin bible

Hosea 14

¹Israel mite awng, TOPA na Pathian kungah heak kik vun. Noma mawna in hong lutusak a, hong puksak hi.

²TOPA kungah heak kik vun a, hi thungetna sia ama tungah na biakpiakna uh hisak vun: “Koma mawna theampo hong maisak ta'n a, ka thungetna uh hong saang ta'n. Tuaciang kong kamciam bangin nang hong pok tu khu hi.

³Assyria in ko hong hung thei ngeingawl a, ngal siphute in ko hong dal thei ngawl hi. Kote in milimte tungah ka Pathian hi ci kik ngei nawn bua vak ung. TOPA awng, nangma in belh tu dang a nei ngawlte hesuak ni hi.”

⁴TOPA in, “Ka mite ka kung ka then kik tu hi. Ka thin theampo taw amate ka it tu a; amate tungah ka thin uuk nawn ngawl hi.

⁵Keima in Israel mite tungah ngam kona ah nguatui bang ka hi tu hi. Amate in paakte bangin a palh tu hi; Lebanon thingkungte bangin a zung kho tu hi.

⁶Amate in khantona thak taw nungta tu a, olive kung hoi te bangin etlawm tu hi. Lebanon Cedar te bangin amate namtui tu hi.

⁷Khatvei ma amate sia keima angvanna sungah nungta tu uh hi. Amate in an ciing in, sapithuan bangin ngathiam tu hi. Amate sia Lebanon sapittui bangin minthang tu hi.

⁸Israel mite sia milimte taw kisai nawn ngawl tu hi. Amate ii thungetnate ka zo tu a, amate ka keam tu hi; A tee a hing tawntung thingkung bangin amate ka uap tu a; a thupha theampo ii naak ka hi hi,” ci hi.

⁹Miciimte in hi sung a, a ki atte tel tahen a, a thinsung uh ah ciing thei tahen. TOPA ii lampite maan a, thutang mite in tuate a zuina taw nungta uh hi, ahihang mimaw mikhial te lutu in puk uh hi, banghang ziam cile amate in tua thute awlmaw ngawl uh hi.