Read Siyin Chin Hosea 2 Bible Online

Hosea 2 - Siyin Chin bible

Hosea 2

¹Tua ahikom na Israel mipuite sia, “Pathian ii mite” le “TOPA ii a it mite” ci vun.

²Ka tate awng, ama sia ka zi hi nawn ngawl a, keima a pasal ka hi nawn ngawl hang na nu tungah na thuum vun. Ama ii hong palngulna le pumpi kizuakna a kheal natu in thuum vun.

³A kheal buale a suani in a pumnguak a om bangin a nik a puan ka sutkeaksak tu hi. Leiko le lei kolhna mun taw kibangin ama ka vawt tu a, dangko in thi tu hi.

⁴A tate tungah hesuakna ka nei buatu hi; amate a maizum maw pumpi kizuak nu ii tate ahi hi. Ama mama in, “Ka lawmpate kungah ka pai tu a — amate in an le tui, samul puan le pat puan, olive thau le sapittui hong pia tu hi,” ci hi.

⁶Tua ahikom ama sia lingdai taw ka uum tu a, a lampi khaktan tu in luphung ka ciang tu hi.

⁷Ama in a lawmpate del tu hi, ahihang pha zo ngawl tu hi. Ama in amate zong ahihang mu ngawl tu hi. Tuasia ciang ama in, “Ka pasal phit sia kungah heak kik ka tong — tua ka kiteen hun lai sia tu a sang nuam zaw ka na ve” ci tu hi.

⁸Ama ii Baal biakna ah a zak ngunn le khamh theampo le olive thau, sapittui le antang a pia sia keima ka hi hunlam ama in kitelsak ngeingawl hi.

⁹Tua ahikom anlaak hun ciang ka piakthongsa antang le sapittui te tuaciang a silh tu ka piak samul le patpuan te ka la kik tu hi.

¹⁰A lawmpate mai ah a nguaktangin om tu in a puan a nikte ka suukeaksak tu a, kuama in ka khut sung pan ama hun zo ngawl tu hi.

¹¹Ama ii poai khaamnate theampo — kum sim le tha sim a poaite le Sabbath poaite — a biakna taw kisai kikhopna theampo ka bosak tu hi.

¹²A pumpi a kipiak ciang, a lawmpate ii saapna in hong piak hi a ci sapitkungte le theikungte ka siasak tu hi. Ama ii sapithuante le a thingnga huante duipui ka suaksak tu a; ngamsate in susia tu hi.

¹³Baal tungah ngimnamtui khat a hal ciang le a suangmanpha kizepnate taw kizeamin a lawmpate a del hun lai a kei hong makngil hu in ama daan ka pia tu hi. TOPA in son zo hi.

¹⁴Tua ahikom sennealngam sungah ama ka paipui kik tu a; tua munah ki itna kam taw ama ka zol kik tu hi.

¹⁵A sapithuante ama tungah ka piakik tu a, Ngimna Kuam sia lam etna kongpi ka suaksak tu hi. A khanmoi lai Egypt ngam pan hong pusua hun bangma in tua munah ka thu hong ngai kik tu hi.

¹⁶Tuasia ciang kei sia khatvei ka pasal hong ci kik tu a — ama ii Baal hong ci nawn ngawl tu hi.

¹⁷Baal min ka losak kik ngei nawn buatu hi.

¹⁸Tua hun ciang ka mite a liamsua ngawl natu in ngamsate le vacimte taw thuciamna ka vawt tu hi. Ngalhiam theampo ahi, namsaute le thalte zongh ngamsung panin ka sot siat tu a, ka mite sia a kilem a ngammuangin ka teangsak tu hi.

¹⁹Israel awng, ka zi kong suaksak tu a; a thumaan le a citak kong hi tu hi; Ki itna kip le hesuakna kong lak tu a, a tawntungin keima aa kong suaksak tu hi.

²⁰Ka kamciamte ka len tu a. keima aa kong hisak tu hi. tuaciang keima TOPA in nong saang tu hi.

²¹Tua hun ciang Israel ka mite ii thungetnate ka zo tu hi. Lei tungah ngua ka zusak tu a, tuaciang leitang in lo an, sapit le olive nga te piangsak tu hi.

²³Ka mite tua ngam ah ka khosak tu a, ka nuamsasak tu hi. “A ki it ngawl” a kicite tungah itna ka lak tu a, tuaciang “Ka mi hi ngawl” a kicite tungah, “Note ka mi nu hi,” ka ci tu hi, tuaciang amate in, “Nangma kote Pathian na hi hi,” ci in hong zo tu uh hi.