Read Siyin Chin Hosea 4 Bible Online

Hosea 4 - Siyin Chin bible

Hosea 4

¹Hi ngam sungah a teang mite tungah TOPA in mawsakna khat nei hi. Israel awng, ama pauna ngai vun: “Hi ngam sungah thumaanna hikale ki itna hikale om ngawl a, mite in keima Pathian in hong saang ngawl hi.

²Amate in kamciamte pia a, paltan hi; amate leilot in, mihing that a, nguta in, kipalngul uh hi. Khialna liante khang a kithalupna khat zawkciang khat om hi.

³Tua ahiciang a ngam kaanghko tu a, ngam sungah nuntakna nei theampo thi tu hi. Nganhingte, vacimte theampo le ngasate ngawngawn thi tu hi,” ci hi.

⁴TOPA in, “Kuama in mite mawsak ahibuale, teih heak hen — ka lungkim ngawlna sia noma thiampite tung hi.

⁵Sun taw zan taw note khial tan nu hi, tuaciang kamsaangte no sangin phazaw tuan ngawl hi. Na nu, Israel susia tu khi hi.

⁶Ka mite in kei hong saang ngawl ahikom a lal hi zo hi. No thiampite in kei hong saang ngawlin kong hilnate hong nial nu hi, tua ahikom no kong nial a, na tapate ka thiampi tu in ka saang buatu hi.

⁷“No thiampite na tam vaial uh ciang, ka tungah nong khial vaial uh hi, tua ahikom na minphatna uh sia minsiatna ka suaksak tu hi.

⁸Ka mite mawna khialna te tung pan hau law na hi uh kom amate khial vaial le na oai uh hi.

⁹Tua mite daan thuak bangma in na thuak tu uh hi! Siatna na vawt hu in kong liausak tu a, daan kong pia tu hi.

¹⁰Note in sangaw biakpiakna pan, na satel te ne tu na hi uh hang na ngil uh kial veve tu hi. Ta nei theina pathiante bia tu na hi uh hang ta na nei tuan buatu uh hi, banghang ziam cile note in pathian dangte nungzui tu in kei nong nung ngat zo uh hi,” ci hi.

¹¹TOPA in, “Sapittui in, a lui ahizong, a thak ahizong, ka mite ii khua phawna laksak hi!

¹²Amate in thingbek khat tung pan thupualaakna dongh hi! Ciangkang khat in amate heak nopte son hi! Amate in kei hong nusia zo uh hi. Pumpi zuak a suak numei khat bangin amate le amate ii pathian dangte tungah ki aap zo hi.

¹³Amate in mualpi dawn mun thiangthote ah sangaw biakpiaknate pia in, mualnote tung thingkung a saang, a boaite nuai ah ngimnamtui hal uh hi, banghang ziam cile tua thinglim te nuam mama hi! “Tua hu in, na tanute sia pumpi zuakte suak a, na mote in palngul mawna vawt uh hi.

¹⁴Ahitazong, hi sia hu in amate daan pia ngawl tu khi hi, banghang ziam cile noma mama zongh biakinn a pumpi zuak numeite omkhop pui in, amate taw lawki sangaw biakpiaknate na pia khawm uh hi. Paunak khat sungah, ‘Ngaisutna nei ngawl mihingte kilalsak tu hi,’ a ci bang ahi hi.

¹⁵“No Israel mite in kei tungah hong thumaan ngawl na hi uh hang Judah te in tuabang in mawna nei heak tahen. Gilgal ah ahibuale Bethaven ah biakpiakna vawt heak vun, tua ahibuale tua munah a nungta TOPA min taw kamciam vawt heak vun.

¹⁶Israel mite sia laate bangin thinpui hi. Bangbangin amate lopa hingna sungah tuuno bangin taasak thei tu khi ziam?

¹⁷Israel mite sia milimte ii ngau tawk hi. Amate lampi tek tawn lel tahen.

¹⁸Sapittui tam mama a neak zawkciang amate pumpi zuakna taw nuamsa in, minphatna saang in minsiatna dei zaw uh hi.

¹⁹Amate vuipi seam bangin kiseamkeak tu a, a lawki sangaw biakpiaknate hangin amate maizum nga tu hi.