Read Siyin Chin Hosea 6 Bible Online

Hosea 6 - Siyin Chin bible

Hosea 6

¹Mite in, “TOPA kungah heak kik tawng! Ama in ei hong liamsak zo a, ahihang ama in hong damsak kik nanak tu hi; ama in hong liamsua zo a, ahihang ama in ih liammate hong tuamsak tu hi ngawl ziam?

²Ni nii, ni thum sungin eite tha thak hong pia kik tu a, ama ompui na ah ih nungta tu hi.

³TOPA ih heak natu hanciam tawng. Khuapi ngua hong zu a, leitung tui a buak bang ahizong, a hun maan a, khua a vak bang ahizong ei kungah ama hong pai tatak tu hi,” ci uh hi.

⁴Ahihang TOPA in, “Israel le Judah awng, bang hong law tu khi ziam? Kei nong itna uh sia zingsang mokkaai bangin manlang tak bo a; ni vaisaang ciang a bo pai daaituite bang ahi hi.

⁵Tua hu in no kungah thukhenna le lalsakna thu puakin ka kamsaangte kong paisak zo hi. Note tung pan ka dei thu sia thiang a kitel sinsen hi:

⁶Tatsat ngawl nong itna ka dei a, na sangaw biakpiaknate hi ngawl hi. Ka mite ii meihal biakpiaknate hong piak sangin kei hong heak tu dei zaw khi hi.

⁷“Ahihang amate in Adam ngam sungah a tum po ciang amate taw thuciamna ka vawt sia paltan uh hi.

⁸Gilead sia mi siate le mithatte taw a kidim khuapi khat hi.

⁹Thiampite sia mihing khat suam nuamin a pang phalak honkhat taw kibang hi. A thiangtho mun Shechem paina lampi tung ngawngawn ah amate in mihing that uh hi. Tuaciang amate in hi siatna theampo vawt kaltang uh hi!

¹⁰Israel ngam sungah a cizat huai na khat ka mu zo hi: ka mite sia amate le amate milim biakna taw kininsak uh hi.

¹¹“Tuaciang no Judah mite na hi uh le, na sep na vawtte tungtaang ah daan piak tu hun khat zongh ka ciangtan zo hi.