Read Siyin Chin Hosea 7 Bible Online

Hosea 7 - Siyin Chin bible

Hosea 7

¹“Israel ka mite a ciidam in a nopsak, a khanto kik tu ka vawtsak nop simin, amate seksolna le a ngamtatsiatna te bebek ka mu thei bek hi. Amate khat le khat kitheam a; inn phuulin vanh ngu hi, tuaciang lampi ah ngual neisa suttol uh hi.

²Hi a ngamtat siatna theampo ciamtee tu ka hi hunlam amate in ngaisun ngeingawl uh hi; ahihang a mawnate in amate kiim uum a, tuate mu ngawlin ka om thei bua hi,” ci hi.

³TOPA in, “Mihingte in thusia vawt a sawmnate taw kumpipa le a uliante theam uh hi.

⁴Amate a vekpi thutuum ngawlin citakna nei ngawl uh hi. Anluum em pa in anvui thau in, a em thei hun mateng anluum emna mei sawk ngawlin a mei a khep bangin a ki etsatna iip phot hi.

⁵Kumpipa ii poai vawt ni in amate in kumpipa le a uliante sapittui khamsakin mawmawsak hi.

⁶Hi hi, amate ii a sawmna uh taw amate moh emna meisa bang hi. Amate thin uukna sia zankhuateakin dai a, zingsang in meileng bangin puaktham hi.

⁷Amate in a thin uuk saan laitakin a ukte thatlum uh hi. A kumpipate khat zawkciang khat kisuamlum ahihang kei tungah huu na dei in thu hong ngen om ngawl hi,” ci hi.

⁸TOPA in, “Israel mite anluum minphang khat taw kibang hi. Amate in a kiimkot ngamte suang a,

⁹hi ngamdangte a suanna in amate thahatna kisut ahi hunlam phawk ngawl uh hi. Amate ii ni hunte kiciangtan hi, ahihang amate in tua ngawngawn zongh he ngawl uh hi.

¹⁰Israel mite kiphatsak na in amate langpanin ausan uh hi. Hi bang a piang tu theampo piang zo kazu in amate sia keima, TOPA a Pathian kungah hong zuan kik ngawl uh hi.

¹¹Inn vakhu mawmaw khat bangin Israel te leang kawkoai hi; amate in Egypt te tungah huna ngen masa uh hi, tua zawkciang Assyria ah tai uh hi!

¹²Ahihang keima in amate paina po ah ngeen khakin vacimte mat bangin ka man tu hi. A ngamtat siatnate hu in amate daan ka pia tu hi.

¹³“Amate a lal hi zo hi! Amate in kei hong taisan a, hong langpan hi. Amate kisusia tu hi. Amate suatak nuam ka hihang amate ii kei hong biakna maan ngawl hi.

¹⁴Amate in thin tak taw thu ngen ngawl uh hi, tua sangin amate lei ah kisepin lawkite ngamtat bangin kapin mau uh hi. Sapittui le antang atu thu a nget ciang doaibiate bangin amate le amate kikuikeak uh hi. Bangza in hong langpan ziam!

¹⁵Keima in amate khangtosakin, a thahatsak pa hi napi, amate in kei langpan hong sawm uh hi.

¹⁶Amate kei kung pan kiheak tawntungin vang nei ngawl pathian khat tuu uh hi. Amate sia thalkawng telh khat bangin muanhuai ngawl hi. A lampuite in kisak theina kampau ahikom amate thi ngamin thi tu a, tuaciang Egypt te nui tu uh hi,” ci hi.