Read Siyin Chin Hosea 9 Bible Online

Hosea 9 - Siyin Chin bible

Hosea 9

¹Israel mite awng, na poaipite lawkite bangin khaam heak vun. Note in na Pathian nungngat in, ama tungah thumaan nawn ngawl zo nu hi. Ngamsung mun theampo ah pumpi kizuakte bangin Baal pathian tungah noma le noma kizuak in, ama ii hong kithapna hi na ci uh lo ante iip la nu hi!

²Ahihang hai ngawlin antang le olive thau a kicing nei nawn ngawlin, sapittui om ngawl tu hi.

³Israel mite sia TOPA ii leitang tungah taang ngawl tu ahihang, Egypt ah heak kikin Assyria ah a kikhaam ante ne tu uh hi.

⁴Amate in tua ngamdangte ah TOPA tungah sapittui biakpiakna ahibuale sangaw biakpiakna vawt thei ngawl tu uh hi. Amate ii an in a ne pawpo ninsak tu a, mithi ngalna ah anneak bang hi tu hi. Amate ii kiallap bekma hi tu a; TOPA Biakinn ah biakpiakna in khat zongh kipaipui ngawl tu hi.

⁵Tuaciang TOPA patoai natu poaipi khaam hunte a tun ciang, amate in bang law peuma tu ziam?

⁶Tuasiatna hong pai in, mihingte a kithethaang ciang Egypt te in amate khawmtua tu a — Memphis ah vui tu in khawmtua tu hi! A ngunn sumngumte le khatvei lai a, a innmunte sia lopa le lingkungte in khunel tu hi.

⁷Daan piak hun hong theng zo a, mite in amate ii nga tu a kilawm daan a nga tek tu hun hong theng hi. Tuasia hong pian ciang Israel in he tu hi! Nangma in, “Hi kamsaang pa sia a mawmaw khat hi. Hi Pathian ii thumop pa sia a thin amh hi,” ci nu hi. Na mawna a let lawlawm manin note in kei nong ensan uh hi.

⁸Pathian in Israel a mite kidop natu thupia tu in kamsaang khatin kei hong sawl hi. Tua hikasap ka paina po ah vacim khat bangin thaangsia tu nong sawm uh hi. Pathian Biakinnpi tung ngawngawn ah mihingte sia kamsaangpa ii ngalte suak hi.

⁹Gibeah ah a ngamtat bangin a sep a vawtna ah amate siat tawpin sia hi. Pathian in a mawna ciamtee tu a, tua hu in amate daan pia tu hi.

¹⁰TOPA in, “Israel ka mu phitin sennealngam sungah a po sapitngate mu bang ahi hi. Na taanghpupite ka mu phit hunin thei min hun a, a min masate mu bang ahi hi. Ahihang Peor mual ah hong pai uh ciang amate in Baal a biak hong kipan a, hai ngawlin a khiaklaak pathiante bangma in mu thada huai suak hi.

¹¹Israel letna sia vacim khat bangin leang tu hi, amate sung panin ta piang ngawl tu a, naupaai le naungil om numei om nawn ngawl tu hi.

¹²Ahihang patang a kep a om hial zong tuate ka laaksak tu a, a nungta in khat zongh ka nusiat buatu hi. Hi mite ka taisat ciang amate tungah a lauhuai nate piang tu hi,” ci hi.

¹³TOPA awng, a tate savai bangin kivai in, a kithalup ka mu thei hi.

¹⁴Tua mite bang law tu ci in nang tungah hong dongh tu khi ziam? A numeite ciingsak in! A nausente a op thei ngawl tu in vawt in!

¹⁵TOPA in, “Amate ngamtat siatnate theampo Gilgal pan kipan hi. Tua mun in amate ka etsat kipatna mun ahi hi. Amate ngamtat siatna hu in ka ngam panin amate ka notkeak tu hi. Amate ka it nawn buatu hi; a lampuite theampo in kei hong langpan zo uh hi.

¹⁶Israel mite sia a zungte ko in, a nga nga ngawl thingkung khat taw kibang hi. Amate in ta nei ngawl tu a, a nei hial zong a it mama a tate ka thatlum tu hi,” ci hi.

¹⁷A na ka sepsak Pathian in a mite nial tu hi, banghang ziam cile amate in a thu nangai ngawl uh hi. Amate sia minam tuatuamte kawmah a vakvaite suak tu uh hi.