Read Siyin Chin Amos 1 Bible Online

Amos 1 - Siyin Chin bible

Amos 1

¹Hite sia Tekoa khua pan tuu cingpa khat ahi Amos ii kammalte ahi hi. Judah kumpi in Uzziah maang a, Israel kumpi in Jehoash tapa Jeroboam a khan hun, zinliin ma kum nii lai in, Pathian in Amos tungah Israel huvau hi thute theampo lak hi.

²Amos in, “TOPA sia Zion mual pan hawk a; Jerusalem pan a aw sia hong nging keak hi. Ngan thana munte ko a, Carmel mual a lopate vul hi,” ci hi.

³TOPA in, “Damascus mite maw kikik khial kikik ahiciang amate daan pia tatak tu khi hi. Amate in Gilead mite tungah ngilo in vawtsia hi.

⁴Tua ahikom Kumpipa Hazael saksa kumpi inn sia meikuang khiakin Kumpi Benhadad ii kulhte haltham tu khi hi.

⁵Damascus khuapi kongpite sutham in, Aven Kuam a teang mihingte le Betheden a ukpa heam tu khi hi. Syria mite sia Kir ngam ah luangta tu hi,” ci hi.

⁶TOPA in “Gaza mite maw kikik khial kikik ahiciang amate daan ka pia tatak tu hi. Amate in minam bup paipui in Edom mite tungah salin zuak uh hi.

⁷Tua ahiciang Gaza khuapi luphung tungah meikuang ka khiak tu a, a kulhte ka haltum tu hi.

⁸Ashdod le Ashkelon khuapite a ukte ka heam tu hi. Ekron khuapi daan ka pia tu a, Philistine mite a taanglai theampo thi tu uh hi,” ci hi.

⁹TOPA in, “Tyre mite maw kikik, khial kikik ahiciang amate daan ka pia tatak tu hi. Amate in minam bup Edom ah sal tang tu in paisak a, kipawlmat natu thukimna a vawt sia len ngawl hi.

¹⁰Tua ahikom Tyre khuapi luphung tungah meikuang ka khiak tu a, a kulhpite ka haltham tu hi,” ci hi.

¹¹TOPA in, “Edom mite maw kikik khial kikik ahiciang daan ka pia tatak tu hi. Amate in a suapui Israel te savai bangin vai a, hesuak ngawl hi. Amate thin uukna sia ciangtan nei ngawl a, thaisak ngeingawl uh hi.

¹²Tua ahikom Teman khuapi tungah meikuang ka khiak tu a, Bozrah kulhpite ka haltum tu hi,” ci hi.

¹³TOPA in, “Ammon mite maw kikik khial kikik ahiciang amate daan ka pia tatak tu hi. Amate in ngamkeau ngal kisimna sung Gilead khua ah naupaai numeite ngawngawn ii ngil kuikeak uh hi.

¹⁴Tua ahikom Rabbah khuapi luphungte tungah meikuang ka khiak tu a, a kulhpite ka haltum tu hi. Tuasia ciang ngal kisim ni in auna awsa om ngawp tu a, kidona nasia in vuipi suangval bang phet ma hi tu hi.

¹⁵Amate kumpipa le a uliante saltaang in pai tu uh hi,” ci hi.