Read Siyin Chin Amos 2 Bible Online

Amos 2 - Siyin Chin bible

Amos 2

¹TOPA in, “Moab mite maw kikik khial kikik ahiciang amate daan ka pia tatak tu hi. Amate in Edom kumpipa ii ngute sia zawnsak vawtin haltham a, vut suaksak hi.

²Moab ngam ah meikuang ka khiak tu a, Kerioth kulhpite ka haltham tu hi. Ngal kisimna ah ngalkapte au in lemle tum a, tua awsa lialua sungah Moab mite thi tu hi.

³Moab ngamukpa le ngam lampuite theampo ka thatlum tu hi.” ci hi.

⁴TOPA in, “Judah mite maw kikik khial kikik ahiciang amate daan ka pia tatak tu hi. Amate in ka hilnate thusim ngawl a ka thupiakte zui ngawl uh hi. A taanghpupi ii biak a maan ngawl pathiante ma in amate lam pialsak hi.

⁵Tua ahikom Judah tungah meikuang ka khiak tu a, Jerusalem kulhpite ka haltum tu hi,” ci hi.

⁶TOPA in, “Israel mite maw kikik khial kikik ahiciang amate daan ka pia tatak tu hi. Amate in leiba a lo zo ngawl mi thumaante, peangdap kop khat ii man zongh a pia kik zo ngawl mizawng teng sal in zuak hi.

⁷Amate in a thazawm a cimawte tuanhpeak in mizawngte sawn vawk hi. Pasal khat le a ta in a sila nu luppui khawm a, tua bangin ka min thiangtho daisak hi.

⁸Biak kikhopna mun theampo ah, a zawngte ii leitoai natu a pon puante sia mite in luppha in nei uh hi. Amate in sum a bate tung pan a laak sapittui zongh, a Pathian biakinn sungah ne uh hi.

⁹“Tua ahitazong ka mite awng cedar thingkungte bangin saang a, oak thingkungte bangin a thakho, Amor te ka sukcipna sia noma kong khualna hi.

¹⁰Egypt ngam pan kong pusuaksak a, sennealngam kaantanin kum sawmli sung lam kong pui a, noma atu in Amor te ngam kong pia hi.

¹¹Na tapate pawlkhat kamsaang tu in ka teal a, na khangmoi tangval pawlkhat Nazirite tu in ka teal hi. [1] Hi thute thumaan hi kana ngawl ziam, Israel mite awng? Keima TOPA in ka ci zo hi.

¹²Ahihang tua Nazirite te sapittui na nesak uh a, ka thusonte a son kik ngawl natu in kamsaangte thu na pia uh hi.

¹³Tu in note lei ah kong henpeak tu a, antang a dimin a kiheang leang khat bangin na mau tu uh hi.

¹⁴Tai manlangte zongh suakta ngawl tu uh hi; mihing thakhote a tha bo tu a, tuaciang ngalkapte zongh in a nuntakna uh kihuu zo ngawl tu uh hi.

¹⁵Thal toaite in nalh zo ngawl tu a, tai manlangte suakta ngawl tu hi, siphu tung to mite in a nuntakna suatak ngawl tu uh hi.

¹⁶Tua ni in a hangbel ngalkapte zongh a ngalhiamte khia in tai tu uh hi,” ci hi. TOPA in ci zo hi.