Read Siyin Chin Amos 3 Bible Online

Amos 3 - Siyin Chin bible

Amos 3

¹Egypt ngam pan minam bup in ama ii hong pusuasak Israel mite awng, note huvau TOPA pauna hi thu ngai vun:

²“Leitung minam theampo sung pan kong heak le kong thin nop mawk sia noma bek na hi uh hi. Hi thu in noma mawna khialna nasiasak seseam a, tua hu in daan kong piak kul tu hi.”

³Kisiktua natu in vaihawmna omkhol ngawlin mihing nii khualhaw khawm thei tu ziam?

⁴Tawpi in sa mat tu khat mu ngawl bulin duisung ah hawk thawthong na ziam? Tawpi moi khat in mat khat nei buale a kua sungah thuum vangam na ziam?

⁵Thaang a kisia ciang aitaana khat om buale vacim awk ngei na ziam? Thaang keaksa sia a pealsak khat a om buale peal na ziam?

⁶Khuapi sungah khua mite a lausak ngawl tu ngal patau lemle a kitum om na ziam? TOPA in a puak buale khuapi khat ah tuasiatna theng tu ziam?

⁷Vaanglianpipa TOPA in a naseam kamsaangte tungah a tupna kilanghsak phot ngawlin bangma seam ngeingawl hi.

⁸Tawpi a hawk ciang akua lau ngawlin om thei tu ziam? Vaanglianpipa TOPA a pau ciang a thu thangsak ngawlin akua om thei tu ziam?

⁹Ashdod le Egypt kumpi innte sung a teangte munah hi bangin taangko vun: “Samaria kiimkot mualte tungah kikhawm vun a, tua munah a nasia mama buaina le khialna liante en vun.”

¹⁰TOPA in, “Hi mite in a innpite sia khialna lian le ngongtatna taw a laaksak vanhte taw dimh uh hi. Amate in thumaan natu zia ngawngawn he ngawl uh hi.

¹¹Tua ahikom ngal in a ngam kiim uum in, a kidalnate susia tu a, a innte phuulsak tu uh hi,” ci hi.

¹²TOPA in, “Tuucing khat in tawpi khat ii a neakmong tuu ii peang nii ahibuale tuu ii bil khat bekma a top kik vathiam bangma, tu in lupna nuam niknek tungah a nop om Samaria te tawm bek luhai tu nu hi.

¹³Tu in ngai vun, Jacob suan le paalte tungah kidopna tu zasak vun,” Vaanglianpipa TOPA in ci hi.

¹⁴Israel te a mawnate hu in daan ka piak ni ciang, Bethel a biaknataute ka susia tu hi. Biaknatau sim ii a taw king teng kisutan tu a, lei ah puk tu hi.

¹⁵Phalbi innte le khuakhaal innte ka susia tu hi. Saiha taw a kizeam innte siacip in, cimh tu hi; inn lian theampo kisusia tu hi,” ci hi.