Read Siyin Chin Amos 5 Bible Online

Amos 5 - Siyin Chin bible

Amos 5

¹Israel mite awng, note atu in hi mithi vuina la kong sak sia ngai vun:

²Numei thiangtho Israel puk zo hi! Tho kik ngei nawn ngawl tu hi! Ama lei ah kinusia in lum hi, kuama in ama phongto ngawl hi.

³Vaanglianpipa TOPA in, “Israel khuapi khat in ngalkap tulkhat paisak ahihang, zakhat bek heak kik hi; khuapi dang khat in zakhat paisak ahihang, sawm bek heak kik hi,” ci hi.

⁴TOPA in Israel mite tungah, “Kei kungah hong pai tavun, tua hile na nungta tu uh hi.

⁵Biakkikhopna vawt tu in Beersheba ah pai heak vun. Bethel ah kei hong zong heak vun — Bethel sia a luithawthong suak tu hi. Gilgal ah pai heak vun — a mite saltaang in lal tu uh hi” ci hi.

⁶TOPA kungah pai vun, tua hile na nungta tu uh hi. Na pai bua uh le Israel mite tungah meikuang bangin TOPA hong tuaksuk tu hi. Bethel mite mei in kaanghtum tu hi, kuama in tua mei sumit zo ngawl tu hi.

⁷Thukhaikimte siatsua a, tuaciang mite ii nga tute a theam note a lalsa na hi uh hi!

⁸TOPA in siluk le zawlzawng aksite vawt hi. Ama in khuazing sia khuavak suaksak a, sun sia zan suaksak hi. Ama in tuipi tuite samin lei ah bunghkeak hi. Ama min in TOPA ahi hi.

⁹Ama in a thahatte le a kulh muanhuaite suksiatsak hi.

¹⁰Note in thukhenzum ah thutang khen ngawlna a nalhte le thumaan thutak vive a sonte na ensan uh hi.

¹¹A zawngte na nengniam uh a, a antangte na suttol uh hi. Tua hu in noma saksa suanginn phate sungah na teang buatu uh a, noma ciin sapithuan hoite pan sapittui na ne buatu uh hi.

¹²Na mawna uh bangza in kiitakhuai a, khialna lian bangza vawt zo nu ziam ci sia ka he hi. Mihing phate vawtsia in, sumnguk ne a, thukhenzum ah mizawngte atu in thukhaikim a kisep natu na khaam uh hi.

¹³Tua ahiciang hi bang hunsia laitakin thim khipkhep a om na in a pilvang ngamtatna ahi hi!

¹⁴Na nuntak thei natu in siatna vawt ngawlin a maan vawt sawm vun. Tua hile kote kungah Vaanglianbel TOPA Pathian om hi na ci uh bangin note taw om takpi tu hi.

¹⁵Thusia ngaimaw in thu man dei vun a, thukhenzumte ah thukhaikim omsak vun. Hi ngamte sungah a nungta lai mite TOPA in hesuak thei tha tu hi.

¹⁶Tua ahikom Vaanglianpipa TOPA Vaanglianbelpa in, “Khuapi lampite ah heena, kaana le tauna om tu hi. Lotho mite ngawngawn zongh a khuangaipui tu in a kicialte taw ma in mithi kaa tu kisam khawm tu hi.

¹⁷Sapit huan theampo sungah kaana om tu hi. Hite theampo hong theng tu hi, banghang ziam cile keima in note daan pia tu in kong pai hi,” ci hi. TOPA in ci zo hi.

¹⁸TOPA ni ngaingam in a ngakla note atu in bangza in lauhuai tu ziam! Tua ni in note bang phattuamna hong pia tu ziam? Note atu in tua sia khuavak ni hi ngawlin khuazin ni hi tu hi.

¹⁹Tua sia tawpi kung pan tai a, vompui taw a kisi pasal sia bang hi tu nu hi! Tua ahibuale pasal khat inn hong cia a, pang tung zawt napo kinei sia, ngul ii tuk taw kibang tu nu hi!

²⁰TOPA ni in khuazing hong paipui tu a khuavak hong paipui ngawl tu hi; tua ni sia maitaina om ngawlin lungzin ni khat hi tu hi.

²¹TOPA in, “Na biakna poaite ngaimaw khi hi; tuate sia kiihuai sa khi hi!

²²Meihal biakpiakna le antang biakpiakna nong piak uh ciang hong saang ngawl tu khi hi; kei biakpiakna in nong paipui, thau takin na vak nganhingte hong saang ngawl tu khi hi.

²³A nangonhuai na lasak uhte tawp vun; na tengtongh awte ngai nuam ngawl khi hi.

²⁴Tuate taangin thukhaikim sia luitui bangin luangsak vun a, thutang sia a kang ngeingawl ngun bangin luang tahen.

²⁵“Israel mite awng, sennealngam kaantan in kum sawmli sung kong lampui lai in sangaw biakpiaknate le piakkhiatnate kong ngen bua hi.

²⁶Ahihang tu in na pathian kumpi Sakkuth ii lim le na aksi pathian Kaiwan limte na biak uh ahikom tua milimte zongh

²⁷Damascus kalhin saltaang tu in kong lak ciang, na puak uh kul tu hi,” Vaanglianbelpa Pathian a kici TOPA in ci hi.