Read Siyin Chin Amos 8 Bible Online

Amos 8 - Siyin Chin bible

Amos 8

¹Mukholna dang khat Vaanglianpipa TOPA tung pan ka nei hi. Tua ii sungah thingnga a dim khum khat ka mu hi.

²TOPA in, “Amos awng, bang mu ni ziam?” ci in hong dongh hi. “Thingnga a dim khum khat” ci in ka zo kik hi. TOPA in kei tungah, “Israel ka mite atu in a tawpna hong theng zo hi. Amate daan ka piak tu huvau ka thin ka kheal kik buatu hi.

³Tua ni ciang kumpi inn sungah a kisa late sia kaana le mauna aw suak tu hi. Mithi luangte mun theampo ah om tu hi. Tuate a thimtham in kivawk tu hi,” hong ci hi.

⁴Ngamsung a mizawngte susia in, a kitaangsamhte a tuanhpeak note awng, hi thu ngai vun.

⁵Noma le noma “ih antang ih zuak thei natu in ni thiangthote a bo tu ih ngak zo bua phial hi. Sumzuak ih kipat thei kik na tu in bang hun ciang Sabbath kiman tu ziam? Tuasia ciang, khaikhin maan ngawlte zanghin van leite a toai phaza theam a, na man ih khan thei tu hi.

⁶Zungtaang mannung ngawlte a man tamin ih zuak thei tu hi. A peangdap kop khat ii man zongh a pia zo ngawl, leiba a lo zo ngawl mizawng khat ih mu tu a, ama sal khatin ih lei tu hi,” na kici uh hi.

⁷TOPA, Israel te ii Pathian in, “Amate tatsiatnate ka mangil ngei buatu hi.

⁸Tua ahikom zinliing tu a, ngam sungah a om theampo ngim nga tu hi. Ngam bup liinglawng tu a, Nile ngun bangin khang tuak, kiam tuakin om tu hi.

⁹Sun kimlai in ni ka tumsak tu le suntangin leitung khua ka zinsak tu hun hong theng tu hi. Keima Vaanglianpipa TOPA ka pau zo hi.

¹⁰Na poaipite mithi vuinate ka suaksak tu a, na lungdamna late sia heena, kaanate taw ka laih tu hi. Na lu uh a tolin meetsak in, khau-ip puan kong silhsak tu hi, tapa khat bek a nei sun thi a, a nu le a pa a kaa bangin kong kapsak tu hi. Tua ni sia a tawp dongin thuak hak tu hi.

¹¹“Ngam sungah kialpi ka tunsak natu hun hong theng tu hi. Mihingte ngilkial tu ahihang andu ngilkial hi ngawl tu hi; a dangko tu ahihang tuidu dangtaak hi ngawl tu hi. Amate in TOPA kung pan thupuak khat a deina in ngilkial dangtaak hi tu hi. Keima, Vaanglianpipa TOPA ka pau zo hi.

¹²Mihingte sia Tuipi Thi pan Mediterranean ah, tuaciang saksang pan nisuana sangah vakvai tu uh hi. Amate in mun theampo ah TOPA ii thupuak kammal khat kan tu ahihang mu ngawl tu uh hi.

¹³Tua ni in ciidam khangmoi pasalte le numeite ngawngawn dangtaakin puk tu uh hi.

¹⁴Samaria milimte ahi, ‘Dan pathian min taw’ ahibuale ‘Beersheba pathian min taw’ a kiciam peuma — tua mite puk tu a, tho kik nawn ngawl tu uh hi.”