Read Siyin Chin Jonah 1 Bible Online

Jonah 1 - Siyin Chin bible

Jonah 1

¹Ni khat ni in TOPA in Amittai tapa Jonah paupui hi.

²Ama in, “Khuapi lian ahi Nineveh khua ah va pai ta'n a, hi thu va son khe ta'n; a mite bangza in seksol ziam ka heak ahi hi,” ci hi.

³Ahihang Jonah in TOPA a pial thei natu in a kisawlna sangah pai ngawlin a leelam sangah pai hi. Ama Joppa ah pai in, tua munah Spain ngam ah a pai tu teambaw khat mu hi. Teambaw saapna sum a piak zawkciang TOPA taw a kikhuala natu mun Spain ngam ah pai tu in teambaw hawlte taw teambaw tungah kaa hi.

⁴Ahizong TOPA in vuipi khat tuipi tungah vasak a, vuipi suangval nasia mama ahikom teambaw a tapthap tu lauhuai hi.

⁵Teambaw naseamte patau mama ahikom amate khat simin a pathian tung tek ah huna ngenin au uh hi. Tua zawkciang, a lauhuai ngawl zawhiat natu in teambaw vanh puakte tui sungah vawk uh hi. Tua hun sungin Jonah sia a nuai ah tuak a, teambaw sungah lumin mutthip hi.

⁶Teambaw ukpipa in tua munah Jonah a mu ciangin, “Banghangin mu thong ni ziam? Tho in a, hong hu natu in na pathian tungah thungen in. Ama in eite hong mulkimin ih nuntakna hong khoaikhe tha tu hi,” ci hi.

⁷Teambaw naseamte khat le khat tungah, “Hi bang a lauhuai sung hong then sia akua mawna hi tu ziam, lai meetang sawkin zong tawng,” kici uh hi. Amate in a zon uh ciang Jonah min kisawk hi.

⁸Tuaciang ama tungah amate in, “Tua ahile tu in hong son ta'n! Hi thu huvau in akua mawsiat tu hi ziam? Hi lai ah nang bang vawt ni ziam? Koisung ngam pan hong pai ni ziam? Bang minam ni ziam?” ci uh hi.

⁹“Kei Hebrew mi khat khi hi,” ci in Jonah in zo hi. “Lei le tuipi a vawt, vantung Pathian, TOPA ka bia hi,” ci hi.

¹⁰Jonah in amate tungah, ama sia TOPA kung pan a taithap ahi hunlam son thua hi. Teambaw naseamte lau a, ama tungah, “Tuasia a lauhuai ngamtatna hi thong ngawl ziam!” ci uh hi.

¹¹Vuipi suangval nasia vaial ahiciang, teambaw hawlte in ama tungah, “Vuipi suangval a thim natu in bang hong law tu khu ziam?” ci in dongh uh hi.

¹²Jonah in, “Tuipi sungah hong khia tavun, tua hile vuipi suangval thim tu hi. Hi a lauhuai vuipi suangval na taw uh sia keima khialna hang a hina thu he khi hi,” ci in zo hi.

¹³Tuabang a vawt sangin teambaw naseamte in teambaw vaalbo a thet tu hanciamin a tha neiza uh taw hot uh hi. Ahihang vuipi suangval nasia vaial, nasia vaial a, amate koima theng meal ngawl uh hi.

¹⁴Tua ahiciang amate in TOPA biakpui a, “TOPA awng, thu hong ngen ung, hi sia pa ka thisak uh hu in thidaan hong pia heak in! TOPA awng, hite theampo ah vaipuak nei ni hi; nangma vawt hi,” ci uh hi.

¹⁵Tua zawkciang amate in Jonah toaito in tuipi sungah khiasuk uh a, thakhat thu in vuipi suangval thim hi.

¹⁶Hi thu hangin teambaw naseamte in TOPA kiita mama in, sangaw biakpiakna khat pia a, ama na a seam tu in kamciam pia uh hi.

¹⁷TOPA sawl bangin ngasa lian khat in Jonah valh a, ama sia ngasa ngil sungah sun thum le zan thum om hi.