Read Siyin Chin Jonah 2 Bible Online

Jonah 2 - Siyin Chin bible

Jonah 2

¹Ngasa ngilsung tawngh pan Jonah in TOPA a Pathian tungah thungen a:

²“Ka ngim nga laitakin TOPA awng, nang kong biakpui a, nong zo hi. Mithi khua a thukna mun panin, hu ngenin ka au a, nong za hi.

³A thukna mun tuipi taw tatak ma, tuite ii hong uumcipna munah kei nong vawksuk a, a thahatna tuihual theampo in kei hong khunel hi.

⁴Na omna panin hawlkeak sa in, ka kingaisun a, na Biakinnpi thiangtho mu kik ngei nawn ngawl tu in ka kingaisun hi.

⁵Tui in hong khum a, hong haaksak hi; tuipi in hong khumcip a, tuaciang tuipi tuipaante in ka lu vialcip hi.

⁶Mualte ii bul, a tawntung a kikhakcip lei kongpite dong ka zuansuk hi. Ahizong TOPA ka Pathian awng, nangma in a thukna munte pan, a nungta in nong la kik hi.

⁷Ka nuntakna a kiam susuk ka phaw ciang TOPA awng, nang tungah thu kong ngen a, na Biakinnpi thiangtho pan nong za hi.

⁸Zak thei ngawl milim a biate in, nang tungah hong thumaan nawn ngawl uh hi.

⁹Ahihang kei ka hile pokna la kong sak tu hi; sangaw biakpiakna khat kong nei tu a, ka kamciamsa bangin ka seam tu hi. Ngupna in TOPA tung pan hong pai ahi hi!” ci hi.

¹⁰Tuasia ciang TOPA in vaalbo tungah Jonah a luak natu in ngasa tungah thupia a, tuabangin ngasa lua hi.