Read Siyin Chin Jonah 3 Bible Online

Jonah 3 - Siyin Chin bible

Jonah 3

¹TOPA in Jonah khatvei paupui kik hi.

²Ama in, “Tua khuapi lian Nineveh ah va pai ta'n a, a mite tungah kong thupiak sa teng thangsak ta'n,” ci hi.

³Tua ahikom Jonah in TOPA thu ni in Nineveh khua ah pai a, tua khuapi lian mama ahiciang a kaantan natu in ni thum hai hi.

⁴Jonah sia khuapi sungah ni khat tangciing a pai zawkciang ama in, “Ni sawmli sungsang Nineveh khua kisiatham tu hi!” ci in thangsak hi.

⁵Nineveh khua mite in Pathian ii thupiak um uh hi. Tua ahiciang amate in mi theampo a lianbel pan a nobel dong kisiik kikna lakna in, antan tu le khau-ip puan silh tu in khensat uh hi.

⁶Nineveh kumpipa in hi thu a zaak ciang, a kumpi tokhum pan dingto in, a puantual suut a, khau-ip puan silhin vuttun sungah tosuk hi.

⁷Ama in Nineveh khua mite tungah thu thansakna khat puak a: “Hi thu in kumpipa le a uliante tung pan thu piak khat ahi hi: kuama in bangma ne ngawl tu hi; mi theampo, khuite le tuute an, ahibuale a tuidawn tu kikhaam hi.

⁸Mi theampo le nganhing theampo in khau-ip puan silh tu hi. Mi simin Pathian tungah nasia takin thungen tu a, ngitlo ngamtatna le a siathuai a tuk a diannate nusia tu hi.

⁹Pathian a thin kheal kik tha tu hi; a thin uukna thaisak tha tu a ih thi buatu hi!” ci hi.

¹⁰Pathian in amate vawt teng mu a; a ngitlo ngamtatna nusia zo hi ci in mu hi. Tua ahikom ama in a thin khealin daan pia tu a ci bangin pia ngawl hi.