Read Siyin Chin Jonah 4 Bible Online

Jonah 4 - Siyin Chin bible

Jonah 4

¹Jonah sia hi thu huvau in lungdam ngawl hetin thin uuk hi.

²Tua ahiciang ama in thungen a, “TOPA awng, ka inn pan ka din ma in tubang ngengei in ngamta tu ni hi hong ci hi ngawl khi ziam? Tuasia hu in Spain ngam ah ka hi thei za in tai tu hanciam khi hi! Nang in a it thei le a hesuak thei Pathian hi a, thinsau tawntung, cingh tawntung a, thin kheal tu le daan a pia ngawl tu in kinging tawntung ni hi, ci in kong he hi.

³Tu in TOPA awng hong thisak ta'n. Ka nuntak nial sang thi leng phazaw hi,” ci hi.

⁴TOPA in, “Na thin uuk thei natu in nang bang thu nei ni ziam?” ci hi.

⁵Khuapi nisuana sang mun khat ah Jonah pai in to hi. A kibeal thei bukno khat ama atu vawtin, a lim ah to a Nineveh bang tat tu ziam ngakin en hi.

⁶Tuaciang Jonah ii a nuamzaw in a lim a belh thei natu in TOPA Pathian in a kung hing khat potosak hi. Hi a kung hing sia hangin Jonah lungkim mama hi.

⁷Ahizong a zing ciang khuavak tuungin, Pathian thupiakna taw lung khat in tua a kung hing sia ne a thi hi.

⁸Nisua zawkciang Pathian in nisuana sang pan vuisa vasak in, nisa in a lu kap a Jonah butthi tu in kithoai hi. Tua ahikom ama thi nuam hi. Ama in, “Ka nuntak nial sang thi leng phazaw hi,” ci hi.

⁹Ahihang Pathian in ama tungah, “Hi a kung hing huvau in na thin uuk thei natu nang bang thu nei ni ziam?” ci hi. Jonah in, “Thi ngam natu in thin uuk na — ka thin uuk thei natu thu nei leilam khi hi!” ci in zo kik hi.

¹⁰TOPA in ama tungah, “Hi a kung hing sia zan khat thu in po a, a zing ciang bo hi; tuasia atu in nang ii sep bangma om ngawl hi, tuaciang nang ii posak hi ngawl hi — tua hi napi tuasia a tu in khuangai thawthong ni hi!

¹¹Tua ahile tua khuapi lian Nineveh tungah bangzata in hesuak zaw kan tu khi ziam. Tua son ngawlin tua khuapi sungah mawbaang ngawl patang mealmawl 120,000 vaal le nganhing tam mama zongh om hi!” ci hi.