Read Siyin Chin Mi Simna 10 Bible Online

Mi Simna 10 - Siyin Chin bible

Mi Simna 10

¹TOPA in Moses tungah,

²“Mipite kikhop tu sapna le ngiaphual phel natu zaaksakna a zak tu in sek taw a kiseak ngunn taw lemle nii vawt in.

³Lemlete nii, awsau in a kitum ciang keima ompuina Puanbuk tumna kongbiang, nangma kiimkot ah taangpi bup kikhawm tu uh hi.

⁴Ahizong lemle khat bek a kitum le bee le phungte pan lampui teng bek nangma kiimkot ah kikhawm tu uh hi.

⁵Lemlete aw a tawngin a kitum ciang nisuana sangah ngiaphual a saat minamte kikhiin tu uh hi.

⁶Lemlete aw a tawngin nii veina a kitum ciang thangsang a om minamte kikhiin tu uh hi. Tua ahikom ngiaphual phel natu in lemle aw a tawngin kitum tu a,

⁷ahizong taangpi kikhop natu ahile aw sau in kitum tu hi.

⁸Aaron tapa thiampite in lemlete tum tu uh hi. “A nuai a ngeina sia maisang hun theampo ah zui tu ahi hi.

⁹Na ngam sungah ngal hong om ciang, no hong sim na ngalte do tu in ngal phawnna lemle na tum tu uh hi. Keima, TOPA na Pathian in kong hu tu a, na ngalte khut sung pan kong ngum tu hi.

¹⁰Lungnop hunte sung zongh ah — na Thadet Poaite le a dang na biakna poaite ah — meihal biakpiaknate le pawlkhop biakpiaknate na piak uh ciang lemlete tum tu nu hi. Tuasia ciang no kong hu tu hi. Keima in TOPA na Pathian ka hi hi.” ci hi.

¹¹A mipite Egypt ngam a nusiat zawk a kum nii a tha niina, a ni kul ni in, TOPA ompuina Puanbuk tung pan meei kilaamto a,

¹²Israel te a khualhawna kipanin Sinai Sennealngam pan pusuak uh hi. Tua meei sia Paran duisung ngampa ah tawlnga hi.

¹³Moses tungtawn a, TOPA thupiak bangin amate vaiding tu kipan a,

¹⁴a kikhiin simin, tua a kizui ngeina om bangin ngamta uh hi. Judah nam ii lampuina laandial nuai ah a om khen khat sia Amminadab tapa Nahshon in uk a, a hon a honin pai masa uh hi.

¹⁵Zuar ii tapa Nethanel in Issachar nam sia uk a,

¹⁶Helon ii tapa Eliab in Zebulun nam uk hi.

¹⁷Tuaciang Puanbuk phelin Gershon le Merari bee le phung in pua in pai uh hi.

¹⁸A zom ah, pawlkhenna laandial nuai ah a om Reuben namte sia Shedeur ii tapa Elizur in uk a, a hon a hon in pai uh hi.

¹⁹Zurishaddai ii tapa Shelumiel in Simeon nam uk a,

²⁰Deuel ii tapa Elisaph in Gad nam uk hi.

²¹Tuaciang Levi nam Kohath bee le phung in a thiangtho vanhte pua in ding uh hi. Amate a Ngiaphual saa kik natu a thet hunin, Puanbuk saksa in om kik zo hi.

²²A zom ah pawlkhenna laandial nuai ah a omte sia Ephraim nam in lampui a Ammihud ii tapa Elishama uk a, a hon a hon in pai uh hi.

²³Pedahzur ii tapa Gamaliel in Manasseh nam uk a,

²⁴Gideoni ii tapa Abidan in Benjamin nam uk hi.

²⁵A khakbel in pawlkhenna laandial nuai ah a omte Dan nam in lampui a, pawlkhen theampo ii a vaihuai seam a, Ammishaddai ii tapa Ahiezer in uk a, a hon a hon in pai uh hi.

²⁶Ochran ii tapa Pagiel in Asher nam uk a,

²⁷Enan ii tapa Ahira in Naphtali nam uk hi.

²⁸Tu a bang teng sia, Israel te ngiaphual phel in a kikhiin simin a hon a honin a paizia ahi hi.

²⁹Moses in Midian mi Jethro ii tapa, a zi ii suapuipa Hobab tungah, “TOPA ii piak tu hong cina munah kote a pai tu ka ahi uh hi. Ama in tu in Israel te a nuamsa tu in hong kamciam zo ahikom, hong zui ta'n, ka nopsaknate nang taw ih hawm khawm tu hi,” ci hi.

³⁰Hobab in, “Hingawl hi, ka pianna ngam ah ka heak kik tu hi.” ci in zo hi.

³¹Moses in, “Nong hesuakna taw kote hong nusia heak in. Duisung ngampa ah ko ngiaphual saat thei natu mun he na hi ciang kote lam hong lak thei tu ni hi.

³²Ko hong zui lete TOPA hong piak thupha theampo nang taw ih hawm tu hi.” ci hi.

³³Israel mite in mual thiangtho ahi Sinai nusia a, ni thum sung pai uh hi. TOPA Thuciamna Thingkuang sia ngiaphual mun tu a zong tu in amate mai ah paikhol tawntung hi.

³⁴Amate ngiaphual khat sim pan a kikhiin laitak, sun hunin TOPA ii meei amate tungah om hi.

³⁵Thuciamna Thingkuang a din pui hun simin Moses in, “TOPA awng, tho in a; na ngalte kithethaangsak in, nang hong ngaimawte taisak in!” ci bul hi.

³⁶A tawlngak hun simin ama in, “TOPA awng, Israel innkuan a tul sim te kungah hong heak kik ta'n,” ci bul hi.