Read Siyin Chin Mi Simna 11 Bible Online

Mi Simna 11 - Siyin Chin bible

Mi Simna 11

¹Mipite in amate ngimnate TOPA tungah phun uh hi. Tua thu a zaak ciang TOPA thin uuk a, amate tungah meikuang khiak hi. Amate sungah tua mei kuang a, ngiaphual mong khat kaanghtum hi.

²Mipite in Moses tungah huna ngenin au a; Moses in TOPA tungah thungen in tua mei mit hi.

³Tua ahikom tua mun Taberah kici hi, banghang ziam cile tua mun amate sungah TOPA ii mei kuang hi.

⁴Israel te taw khual a haw khawm ngamdang mite pawlkhat om hi. Amate in sa lungngul mama uh a, Israel te ngawngawn zongh phun kipan in: “Neak tu sa tawm beak nei thei thong leang maw!

⁵Egypt ah man piak ngawlin ngasa theampo ih du bang po ih ne hi. Ih neak tawntung tangmaite, tangmaisante, lonamsiate, kaisonsante, kaisonkaangte phawk kik vun.

⁶Ahizong tu in ih tha bo zo hi. Neak tu bangma om ngawl a — ni sim ni simin manna bebek hi!” ci uh hi.

⁷(Manna sia thaicii no taw kibang a, a meal a kaang le a eng kithua bang ahi hi.

⁸Tua mannate zan lai in ngiaphual tungah daaitui taw taak khawm hi. A zingsang ciang a mipite pai in tawm a, ngoaivui in ahibuale sum sungah suuvui hi, tua zawkciang huanin muhphaang in vawt uh hi. A limna olive thau taw a ki em anluum bangin lim hi.)

¹⁰Mipite theampo a ngiaphual kongbiangte tek ah a hon a hon in ding in, a phun uh sia Moses in za hi. Amate tungah TOPA thin uuk ahikom Moses a thinngim a,

¹¹ama in TOPA tungah, “Banghangin kei hong vawtsia mama ni ziam? Banghangin kei tungah lungkim ngawl ni ziam? Banghangin hi mihingte theampo kei ii vaipuak laak tu in hong pia ni ziam?

¹²Amate kei bitphua hi ngawl a, kei piansak le hi ngawl hi. Amate ii taanghpupite tungah na kamciamsa ngam sang paina lam tawntung ah nau omh khat bang ahi tu le amate nausen te bangin ka baan taw a toai tu in banghang kei hong sawl ni ziam?

¹³Hi mihingte theampo khamkhop tu sa sia koisung pan nga thei tu khi ziam? Amate in sa hong ngenin phiing tawntung hi.

¹⁴Keima nguak in hi mihingte theampo atu vaipuak ka la thei bua hi; Kei atu in nasia leih hi!

¹⁵Hi bangin nong vawt tu ahile nong ngitlona ka thuak nawn ngawl natu in hong hesuak ta'n a kei hong that heu ta'n,” ci hi.

¹⁶TOPA in Moses tungah, “Mipite lampui in a kiciamtee a zatak huai mihing sawmsali khawm in a, ka ompuina Puanbuk ah hong paipui ta'n, tua munah nangma kiim ah dingsak in.

¹⁷Kong paisuk tu a, tualai ah kong paupui tu hi. Nang kong piaksa thaa pawlkhat la in, amate ka pia tu hi. Tuasia ciang amate in hi mihingte atu vaipuak teng hong hu thei tu a, nangma bek in tua vaipuak na la buatu hi.

¹⁸Tu in, mipite tungah son in, ‘Zing ciang atu in kithiansua tavun; neak tu sa na nei tu uh hi. Note phiingin sa tawm ne nuam ung ci in, Egypt ma nuamsa in na lungngulna thu uh TOPA in za zo hi. Tu in, TOPA in sa hong pia tu a, na ne tu uh hi.

¹⁹Note in sa na ne tu uh a ni khat, ni nii, ni nga, ni sawm ahibuale ni kul sung bek zongh hi ngawlin,

²⁰tha khat bup na zaknop ngawl liang uh dong, na nim uh dongin na ne tu uh hi. Banghang hi bang hi tu ziam na ci uh le hilai note sungah a om TOPA na nial uh a, Egypt ngam pan pusuak bualeang ci in na phunsan uh hang hi,’ ci in son in” ci hi.

²¹Moses in TOPA tungah, “Hi sungah mihing 600,000 ka lampui a, tha khat sung a kham tu sa a kicing ka pia tu, ci ni ziam?

²²Khui le tuute amate kham tu in ngo zo tu hi ziam? Tuipi sungah ngasa theampo amate atu in kicing tu ziam?” ci hi.

²³TOPA in, “Ka vaangletna a kiciangtan ziam? Ka ci bangin a pian le a pian ngawl hai ngawlin na mu tu hi!” ci in zo hi.

²⁴Tuaciang Moses pusuak in TOPA ci teng mite tungah son hi. Ama in lampui 70 te kaikhawm in Puanbuk kiim ah omsak hi.

²⁵Tuaciang TOPA meei sungah tuaksuk in Moses paupui hi. Ama in Moses tungah a piaksa thaa pawlkhat la in, lampui 70 te tungah pia hi. Amate tungah tua thaa a pai ciang kamsaangte bangin amate au uh a, ahizong khuangei au ngawl uh hi.

²⁶Lampui sawmsalite sung pan niite ahi, Eldad le Medad in Puanbuk ah pai ngawlin ngiaphual ah om uh hi. Tua ngiaphual ah amate tungah thaa pai a, amate zongh kamsaangte bangma in a au uh hi.

²⁷Tangvalno khat sia, Eldad le Medad omdan teng Moses tungah son tu in tai hi.

²⁸Tuaciang a no lai panin Moses a hu tawntung pa Nun tapa Joshua pau in Moses tungah, “Topa awng, amate tawlngasak in!” ci hi.

²⁹Moses in, “Kei ngaisut tu teng hong thinnuammaw ni ziam? TOPA in a mite theampo tungah a thaa pia in, kamsaangte bangin amate theampo ausak le ka uuk hi,” ci in zo hi.

³⁰Tuaciang Moses le Israel lampui 70 te ngiaphual ah cia kik uh hi.

³¹TOPA in thakhat thu in tuipi pan vamimte a puak vui vasak a, tua vamimte lei pan meter khat sangin a niamzaw in leang hi. Vamimte ngiaphual tung le a kiim a paam kilometre tam mama sung teng ah om uh hi.

³²Tua hi a, mipite in tua ni bup, zankhuateak le a zing ciang sunkhua in vamim man uh a; kilogramme tulkhat nuaisia a man om ngawl hi. Amate in vamimte ngiaphual kiimkot theampo ah a ngeam tu in pho uh hi.

³³Vamim sa neak tu tam mama a nei lai hun sung ma in, mipite tungah TOPA thin uuk ahikom amate sungah a kilaw thei natna tungsak hi.

³⁴Tua munah sa du in a longthak mi tam mama phum ahikom tua mun sia Kibroth Hattaavah (a khiakna “Longthakte Thaan”) kici hi.

³⁵Mipite tua mun pan Hazeroth ah kikhiin a, tualai ah ngiaphual saat uh hi.