Read Siyin Chin Mi Simna 12 Bible Online

Mi Simna 12 - Siyin Chin bible

Mi Simna 12

¹Moses in Cush mite numei khat teenpui a, tua hu in Miriam le Aaron in sonsia hi.

²Amate in, “TOPA in Moses tungtawn bekin thuson ziam? Eite tungtawn zong thuson hi ngawl ziam?” ci uh hi. Amate cisia TOPA in za hi.

³(Moses sia a kiniamkhiak mihing hi a, leitung ah a om midang khat pawpo sangin kiniamkhiak zaw hi.)

⁴Thakhat thu in TOPA in, Moses, Aaron le Miriam paupui a, “Note thum keima ompuina Puanbuk ah hong pai tavun,” ci hi. Amate pai a,

⁵tuaciang TOPA sia meeikhuam khat sungah tuaksuk a, Puanbuk kongbiang ah dingin, “Aaron awng! Miriam awng!” ci in sam hi. Amate nii mai sangah pai a,

⁶tuaciang TOPA in, “Tu in kong thuson tu te ngai vun! Note sungah kamsaangte a om ciang, keima le keima amate kungah mukholnate sung pan ka kilangh a, mangte sung pan amate ka paupui hi.

⁷Ka naseampa Moses taw ka kipaupui ciang sia a tuamdang khat ahi hi; Israel ka mite theampo ama in ka uksak hi.

⁸Tua ahikom ama taw kimaingat in kam soaiheamte zangh ngawlin thiang takin ka paupui hi; a ma in ka pianlim ngawngawn hong mu hi! Ka naseampa Moses langpanin bangbang pau ngam nu ziam?” ci hi.

⁹Amate tungah TOPA thin uuk hi; tua hi a ama in a paisat po ciang,

¹⁰Puanbuk pan meei in nusia a, Miriam vun tungah thakhat thu in a kiitakhuai natna theng in, vuuk bangin hong kaang hi. Miriam sia hi natna taw a kituamcip Aaron in a mu ciang,

¹¹ama in Moses tungah, “Ka topa awng, a mawmawthuai ka mawna uh hangin hesuakna taw hi bang daan hong thuaksak heak in.

¹²A thisa in a suak, a taksa a lang a kine khawng khat bangin ama suaksak heak in” ci hi.

¹³Tua ahiciang Moses in TOPA biakpui a, “Pathian awng, Miriam damsak in!” ci hi.

¹⁴TOPA in, “Tua nu maitang ah a pa in cil a phii le ama in ni sali sung maizum thuak tu hi. Tua ahikom ama sia nipi khat sung ngiaphual pua sangah kikoi tu a, tuasia zawkciang ngiaphual sungah kitumpui kik thei tu hi,” ci in zo hi.

¹⁵Miriam sia ngiaphual pua sangah ni sali sung kikoi a, ama a kitumsak kik mateng mipite kikhiin ngawl hi.

¹⁶Tua zawkciang amate in Hazeroth nusia in, Paran duisung ngampa ah ngiaphual saat uh hi.