Read Siyin Chin Mi Simna 13 Bible Online

Mi Simna 13 - Siyin Chin bible

Mi Simna 13

¹TOPA in Moses tungah,

²“A minam sawm le niite ii lampuite sung pan khat tek veu teal in a, thudawpkute bangin Israel te ka piak Canaan ngam a vil tu in paisak in,” ci hi,

³Moses in a thu ni a, a nuai a lampuite Paran duisung panin paisak hi. [Anam] — [Lampui] Reuben — Zaccur ii tapa Shammua Simeon — Hori ii tapa Shaphat Judah — Jephunneh ii tapa Caleb Issachar — Joseph ii tapa Igal Ephraim — Nun ii tapa Hoshea Benjamin — Raphu ii tapa Palti Zebulun — Sodi ii tapa Gaddiel Manasseh — Susi ii tapa Gaddi Dan — Gemalli ii tapa Ammiel Asher — Michael ii tapa Sethur Naphtali — Vophsi ii tapa Nahbi Gad — Machi ii tapa Geuel

¹⁶Hi teng sia Moses ii a ngamvil tu in a sawl thudawpku teng ahi hi. Ama in Nun tapa Hoshea sia Joshua ci in a min laih hi.

¹⁷Moses in amate a paisak ciang, amate tungah, “Hi sung pan saksang zuanin Canaan ngam thang sangah pai tavun a, tuaciang mualtung ngam ah pai tavun.

¹⁸A ngam sia bangbang ngam hi a mihing bangza teang a, bangza thahat ziam cite hong tel tavun.

¹⁹A ngam pha ziam sia ziam, mite a dongdai khuate sungah teangzau ziam, a muanhuai a ki uum khuapite sungah teang ziam cite hong kantel tavun.

²⁰A lei pha ziam, thingkung tamna taamngam ahi ziam hong en tavun. Tualai ah a ciin thingno nga pawlkhat hong ciapui nanak tavun,” ci in vaitha hi. (Tua hun sia sapit min tu kipat laitak ahi hi.)

²¹Tuaciang, thangsang ngam Zin duisung ngampa pan, amate saksang zuanin, saksang ah a om Hamath Mualciangh nai Rehob dong ngamvil in pai uh hi.

²²Amate thangsang ngam tengah pai masa a, Anakim a kici mihing thatang lian nam ii suan le paal ahi, Ahiman, Sheshai le Talmai bee le phung teng teenna Hebron theng uh hi. (Hebron sia Egypt ngam Zoan khua saat ma kum 7 lai in kisaat hi.)

²³Amate Eshcol Kuam theng a, tua munah amate in sapit bom khat a nga sapitbaak khat saattan in, ngit mama ahikom mol thaakin mihing nii in zawng liang uh hi. Amate in talee nga le theinga pawlkhat zongh ciapui uh hi.

²⁴(Tua mun sia Israel te ii sapitnga bom a saattanna mun ahikom Eshcol Kuam kici hi.)

²⁵Ni sawmli sung ngam a vil zawkciang, thudawpkute sia,

²⁶Moses, Aaron le Israel taangpi bup omna Paran duisung ngampa Kadesh ah heak kik uh hi. Amate ii a mu bang teng son in, a thingnga puakte lak uh hi.

²⁷Amate in Moses tungah, “Kote in ngam ka vil uh a, a hauna le a lei phatnate ka mu uh hi; a thingnga pawlkhat zongh hilai ah kong ciapui uh hi.

²⁸Ahizong tualai ah a teang mite hat mama uh a, a khuapite lian mama in kul taw pha takin ki uum hi. Tua sangin zongh a poizaw sia thatang liante ii suan le paalte tua munah ka mu uh hi.

²⁹Thangsang ngam ah Amalek te teang a, Hit te, Jebus te, le Amor te mualtung ngam ah teang a; Canaan te ahile Mediterranean tuipi hui le Jordan ngundung ah teang uh hi,” ci in son uh hi.

³⁰Caleb in Moses langpanin a phunsan mipite thimsak a, “Tu in eite in simin a ngam la tawng; tua ngam a zo zo tu in ih tha hat khop hi,” ci hi.

³¹Ahizong Caleb taw a paikhawm pasalte in, “Hi ngawl hi, amate sim tu in ih thahat tham ngawl hi; eite sangin tualai ah a om mite thahat zaw hi,” ci uh hi.

³²Tua ahiciang amate in a ngam vilna thute ahi ngawl lamin Israel te sungah zelsak uh hi. Amate in, “Tua leitang pan tua munah a teang sa mihingte neakkhop tu ngawngawn zongh an piang ngawl hi. Ka mu uh mihingte theampo sia saang mama a,

³³Anak suan le paal, mihing thatang liante ngawngawn ka mu uh hi. Eite sia khaumaw bang lelin no ih kisa a, amate muna zongh ah tuabang lel ma ih hi tu hi,” ci uh hi.