Read Siyin Chin Mi Simna 15 Bible Online

Mi Simna 15 - Siyin Chin bible

Mi Simna 15

¹TOPA in Moses tungah, a piak tu ngamsung ah

²Israel mite ii zui tu in a nuai a ngeinate pia hi.

³Meihal biakpiakna, kiciamna taangtutna biakpiakna, thinzaw biakpiakna ahibuale a hun zui a na vawt biakna poaite biakpiakna ah ngaw tu in khuital khat, tuutal khat, tuu khat ahibuale keal khat TOPA tungah kipia thei tu hi; hi an taw biakpiaknate ii ngimnamtui sia in TOPA lungkimsak hi.

⁴Meihal biakpiakna in tuu ahizong keal ahizong TOPA mai ah a pia pawpo in antang biakpiakna ah nganno khat ciang olive thau litre khat taw a kihel anvui kilogramme khat, sapittui litre khat taw paipui khawm tu hi.

⁶Tuutal khat a kipiak ciang, antang biakpiakna in olive thau litre khat le lang taw a kihel anvui kilogramme nii

⁷le sapittui litre khat le lang taw pia khawm tu hi. Hi sangaw biakpiaknate ii ngimnam in TOPA lungkimsak hi.

⁸Meihal biakpiakna ahibuale, kiciamna taangtunna biakpiakna ahibuale pawlkhop biakpiakna in Topa tungah khuital khat a kipiak ciang

⁹antang biakpiakna in olive thau litre nii taw a kihel anvui kilogramme thum,

¹⁰le sapittui litre nii taw kipia khawm tu hi. Hi sangaw biakpiakna ngimnam sia in TOPA lungkimsak hi.

¹¹Biakpiakna in khuital khat, tuutal khat, tuu ahibuale keal khat taw tuabangin piakhawm tu hi.

¹²Nganhing khat sang a tamzaw a kipiak ciang nganhing a phaza zui in vanh dangte zongh kikhan to tu hi.

¹³Israel mi tatak theampo in a ngimnam taw TOPA lungkim na ahi, an taw biakpiakna a nei ciang tuabangin seam tu hi.

¹⁴Ngamdangmi khat note sungah tawmvei sung ahizong a tawntung ahizong a teang pa in hun khat pawpo ah TOPA ii a ngim dik a sak an taw biakpiakna a nei le tua ngeinate ma zui tu hi.

¹⁵Noma na hi uh zong, note sungah hong teang ngamdangmite ahizong, hi ngeinate ma maisang hun theampo ah zui tu hi. Note le amate TOPA muna ah a kibang na hi uh a;

¹⁶thukhamte le ngeinate a kibang ma in note le amate zui tu ahi hi.

¹⁷TOPA ii a piak tu ngamah

¹⁸Israel mite ii zui tu a nuai a ngeinate TOPA in Moses tungah pia hi.

¹⁹Tua ngam pan a piang ante a neak uh ciang pawlkhat sia TOPA aituam atu in kikoituam tu hi.

²⁰Anthak na laak uh ciang anluum na em maksakbel uh sia TOPA tungah a tuamin kipia tu hi. Na ancilna sung pan antang na piaktuam bangin hisia kipia tu hi.

²¹Na anluum emte sung pan hi a tuam vilvel letsong sia TOPA tungah maisang hun theampo ah kipia tu hi.

²²Ahihang TOPA in Moses tungah a piak zui tu ngeina pawlkhat sia, mihing khat po in a zui ngawl thaak ciang ahizong,

²³TOPA ii Moses tungtawn a, a thupiak theampo sia maisang ah Israel taangpi taangta te in a zui ngawl hun om tu in ngaisun tawng,

²⁴taangpite ii a heak ngawlna hu in, tuabang khial tha ahile amate in meihal biakpiakna, TOPA a lungkimsak ngimnamtui, antang biakpiakna le sapittui biakpiakna taw in khuital khat pia tu hi. Amate in mawphel biakpiakna in kealtal khat pia thua tu hi.

²⁵Thiampipa in taangpite atu in a zeksa thiansuana vawt tu a, amate khialna kimaisak tu hi, banghang ziam cile vawt thaak khialna hi a, amate in TOPA tungah an taw biakpiakna khat bangin mawphel biakpiakna hong paipui hi.

²⁶Israel taangpi bup le amate sungah a teang ngamdangmite a vekpi in a khialna kimaisak tu hi, banghang ziam cile tua vawt thaak khialna sungah mihing theampo kihel siat hi.

²⁷Mihing khat in ama aituamin mawna khialna a vawt tha ahile, ama in mawphel biakpiakna in kum khat a pha kealla khat pia tu hi.

²⁸Thiampipa in biaknatau ah tua pa a mawna a khialna pan thiansua natu in a zeksa thiansuana teng vawt tu a, tuaciang ama ii mawna khialna kimaisak tu hi.

²⁹Hi ngeina sia Israel mi tatak te ahizong, ngam sungah a teang ngamdangmite ahizong, a kuama po in mawna khialna khat a vawt thaak ciang zui tu ahi hi.

³⁰Ahizong ngammi ahizong, ngamdangmi ahizong mawna khialna a vawt kaltangte sia TOPA a thusim ngawl mawna a nei hi a, kithatlum tu hi,

³¹banghang ziam cile ama in TOPA ci bang nialin a thupiakte khat a palsat kaltang hang ahi hi. A thina in ama kivawt ahi hi.

³²Khatvei, Israel te duisung ngampa ah a om lai in pasal khat Sabbath ni in thingtom kimu hi.

³³Ama sia Moses, Aaron le taangpi bup mai ah kipaipui a,

³⁴ama bangbang vawt tu ci, kihe thiang ngawl ahikom thong sungah kikoi hi.

³⁵Tuasia ciang TOPA in Moses tungah, “Hi sia pa thisak kul tu hi; ama ngiaphual pua sangah taangpi bup in suang taw deanglum tu hi,” ci hi.

³⁶TOPA thupiak bangin taangpite in ama sia ngiaphual pua sangah pusuapui in suang taw deanglum uh hi.

³⁷TOPA in Israel mite tungah a son tu in Moses thupia hi:

³⁸“Na puante ii mong a king teng ah puanteap kaai vawt vun a, puanteap kaai sim ah vancii khauhual khat veu koi thua vun. Hite maisang hun theampo ah na vawt tu uh ahi hi.

³⁹Puanteapkaaite in nung thu hong phawksak kik tu a, tuate na mu simin, ka thupiakte theampo phawk kikin na zui tu uh hi; tua sia ciang note deinate le uuknate zui nuam ngawlin, kei nong taisan buatu uh hi.

⁴⁰Puanteapkaaite in kong thupiakte theampo na zui tu hong phawksak tu a, tuaciang note keima aa na hi siat tu uh hi.

⁴¹Keima in TOPA na Pathian ka hi hi; na Pathian hi tu in Egypt ngam pan kong pusua hi. Keima in TOPA ka hi hi,” ci hi.