Read Siyin Chin Mi Simna 17 Bible Online

Mi Simna 17 - Siyin Chin bible

Mi Simna 17

¹TOPA in Moses tungah,

²“Israel mite tungah anam sim ii lampui sia tung pan ciangkhut khat tek, ciangkhut sawm le nii nang tungah hong piak natu in son in. A ciangkhut tungah a min tek at in,

³Levi nam ii a piak ciangkhut tungah Aaron min at in. A nam lampui khat ciang, ciangkhut khat tek hi tu hi.

⁴Ka ompuina Puanbuk ah tuate paipui in a, kong kisik puina mun, Thuciamna Thingkuang mai ah koi in.

⁵Tuasia ciang ka teal pa ii ciangkhut sia meang tu hi. Hi bangin Israel te ii nangma hong langpanin a phuphunna ka thimsak tu hi,” ci hi.

⁶Tuabangin Moses in Israel te tungah son a, a nam sim pan ciangkhut khat tek, a lampuite in ama tungah pia a, a vekpi ciangkhut sawm le nii pha hi, tuate taw Aaron ciangkhut kikoi khawm hi.

⁷Tua zawkciang Moses in ciangkhut teng TOPA ii Thuciamna Thingkuang mai Puanbuk sungah koi siat hi.

⁸A zing ciang Puanbuk sungah Moses a tum ciang Levi nam ii a piak Aaron ciangkhut a meang sa in mu hi. Tuasia in mom zo, a paak palh zo a, almond nga minte piangsak hi!

⁹Moses in ciangkhut theampo la in Israel te lak hi. Amate in thupiang teng mu a, a lampui sim in a ciangkhut tek la kik hi.

¹⁰TOPA in Moses tungah, “Thuciamna Thingkuang mai ah Aaron ciangkhut koi kik in. Hi ciangkhut sia, a leedo nuam Israel te ii phunna a tawp buale amate thi tu a hisia a kidop natu in kepcing tu ahi hi,” ci hi.

¹¹TOPA thupiak bangin Moses in vawt hi.

¹²Israel mite in Moses tungah, “Ko ka hi uh le man sa hi zo ung!

¹³Puanbuk nai a neak te ngawngawn thi hamtang tu ahile, ko teng theampo zong a thi bang ka hi zo uh hi!” ci uh hi.