Read Siyin Chin Mi Simna 18 Bible Online

Mi Simna 18 - Siyin Chin bible

Mi Simna 18

¹TOPA in Aaron tungah, “Nangma, na tapate le Levi te in ka ompuina Puanbuk sung nasepna taw kisai in sepkhialna khat pawpo taw kizomin a piangte na thuak uh kul a; ahizong thiampi nasepna taw kisai in a piangte sia, nangma le na tapate bek in thuak tu nu hi.

²Nangma le na tapate Puanbuk sungah nasep laitakin, na seppui tu le nasep hong hu tu in Levi nam na beete tumpui in.

³Amate in no atu in hong sepsak tu te le Puanbuk atu in a nasep tu te khuangkhim tu a, ahizong biaknatau taw ahibuale Mun Thiangtho ah a om a thiangtho vanhte peuma thutha ngawl tu hi. A thutha le amate le nangma hong kithisak khawm tu hi.

⁴Amate sia nangma taw na seam tu a, Puanbuk sungah sep tu a vaipuakte theampo khuangkhim tu hi. Ahizong a kiphu ngawl peuma nang taw seam khawm thei ngawl tu hi.

⁵Israel mite tungah ka thin uukna a puathap kik ngawl natu in nangma le na tapate bek in biaknatau le Mun Thiangtho vaipuak teng khuangkhim nanak tu nu hi.

⁶Israel te sung pan na beete ahi Levi te teal a, letsong in hong pia pa sia keima ka hi hi. Amate in Puanbuk sungah a nasepte a sep thei natu in kei tungah hong ki aap uh hi.

⁷Ahizong nangma le na tapate bek in biaknatau le Thiangthobel Mun ah a om sia taw kisai thiampi nasep teng theampo khuangkhim tu nu hi. Nang, thiampi za letsong in hong pia zo ka hikom hi teng nangma ii vaipuak tu ahi hi. Hi nasepte seam tu a kiphu ngawl khat pawpo hong pai in, vanh thiangthote a neak le kithisak tu hi,” ci hi.

⁸TOPA in Aaron tungah, “Kei hong kipia tuamte theampo sung pan biakpiakna sungah a kihaltumte simngawl po nangma kong piak sia ciamtee in. Hite nangma le na suan na paalte atu in a tawntung atu kong piak ahi hi.

⁹Biaknatau ah a kihal ngawl, a thiangthobel biakpiaknate panin a nuai a teng nangma aa ahi hi: antang biakpiakna, mawphel biakpiakna le khialphel biakpiakna te ahi hi. Kei tungah hong kipia a thiangtho biakpiakna te a vekpi in nangma le na tapate aa ahi hi.

¹⁰Hite mun thiangthona khat ah na neak uh kul hi, pa te bek in ne thei a; tua teng a thiangtho in ngaisun vun.

¹¹“Tua bek dom ngawlin, Israel te ii a tuamin hong piak dangte pawpo zongh noma atu ahi hi. Nangma, na tapate le na tanute atu in maisang hun theampo atu in kong pia hi. Na inn sung pan biakna taw kisai a thiang mite theampo in tuate ne thei tu uh hi.

¹²“Israel te ii kum simin keima hong piak a anpal sung pan a phabel theampo: olive thau, sapittui le antangte nangma kong pia hi.

¹³A vekpi in nangma aa ahi hi. Na innkuan sung pan biakna taw kisai in a thiang theampo in tuasia ne thei tu hi.

¹⁴“Israel ngam sungah kei tung hong ki aap thiang na theampo, nangma neisa hi.

¹⁵“Israel te ii keima hong piak mihing taciil, ahibuale nganhing nosuakciil theampo nangma aa ahi hi. Ahizong mihing taciil hikale, biakna taw kisai a thiang ngawl nganhing nosuakciil hikale a kitat kik ciang a tatna sumte saang nanak tu ni hi.

¹⁶Patangte tha khat a phak ciang, biakinn zakngei khaikhin taw kizui in ngunn dangkatang nga linlian taw kitan kik tu hi.

¹⁷Ahizong khui, tuu le keal nosuakciil ahile kitan kik ngawl tu hi; a vekpi in keima aa hi a, sangaw biakpiak na tu ahi hi. A chi te biaknatau ah the in a; an taw biakpiakna in a thau halin, tua ngimnam in kei hong lungkimsak tu hi.

¹⁸A tuam vilvel biakpiakna in a kizangh a awmsa le a ziatsang phei taw kibangin tuate ii a sa sia nangma aa ahi hi.

¹⁹“Israel te ii keima hong piaktuamte theampo maisang hun theampo atu in, nangma, na tapate le na tanute kong pia hi. Hi thu sia nangma le na suan na paalte taw ka vawt a kipaltan thei ngawl thuciamna ahi hi,” ci hi.

²⁰TOPA in Aaron tungah, “Nangma in a kilua thei na khat pawpo saang ngawl tu ni hi, Israel leitang khen khat zongh nang hong kipia ngawl tu hi. Keima, TOPA sia nangma ii na kisap buppi ka hi hi.” ci hi.

²¹TOPA in, “Israel mite ii kei tungah hong piak sawm a khat sumpi theampo Levi te ka pia zo hi. Hisia sia keima ompuina Puanbuk a kepcing hu in a nasep thaman ahi hi.

²²Israel dangte in Puanbuk neak nawn ngawl het tu uh a, tuabangin a neak a om le thina daan thuak tu uh hi.

²³Tu pan kipan Levi te bek in Puanbuk keamcing tu a, tua atu vaipuak theampo la siat tu uh hi. Hi thu na suan na paalte tung zongh ah a kizangh tu ngeina kip ahi hi. Levi te in Israel ngam sungah a kip a kho neisa bangma nei ngawl tu hi,

²⁴banghang ziam cile Israel te ii kei tungah a tuam vilvel a hong piak sawm a khat sumpi sia amate ii neisa tu in ka pia zo hi. Tua hu in Israel ngam sungah a kip a kho in a neisa bangma nei ngawl tu hi, ci in amate ka son hi,” ci hi.

²⁵TOPA in Levi te tungah a son tu in Moses thupia hi:

²⁶“TOPA in note neisa tu in hong piak sawm a khat sumpi sia Israel te tung pan na san uh ciang, sawm a khat a tuamin TOPA tungah pia tu nu hi.

²⁷Hi a tuam vilvel piakna sia lothote ii anthak le sapittui thak piakna taw kibangin kingaisun tu hi.

²⁸Hi bangin Israel te tung pan na nga uh sawm a khat sumpite theampo sung pan zongh a tuamin TOPA tungah pia tu nu hi. Hi bang a tuamin TOPA atu piakna sia thiampi Aaron tungah pia tu nu hi.

²⁹Tua sia a phabel na nga uh sung pan pia vun.

³⁰A phabel khen khat sia na piak zawk uh ciang a om lai teng, lothote ii biakpiakna a nei zawkciang a om lai teng a kepcing bangin keam thei nu hi.

³¹Puanbuk sungah na nasep thaman uh ahikom, noma le na innkuan puite in a taanglai teng na ukna mun pawpo ah ne thei tu nu hi.

³²TOPA tungah a phabel na piak zawk uh nungsang na neak uh ciang maw ngawl nu hi. Ahizong Israel te ii a piak letsong a thiangtho te a phabel khen khat sia TOPA tungah a piak ma in na neakna uh taw tua letsong ninsak heak vun; na ninsak uh le hong kithatlum tu hi,” ci hi.