Read Siyin Chin Mi Simna 19 Bible Online

Mi Simna 19 - Siyin Chin bible

Mi Simna 19

¹TOPA in Moses le Aaron tungah

²a nuai a ngeinate Israel te a piak tu in thupia hi. A mealhem ngawl le na a kiseamsak ngeingawl lai khuipui san khat paipui in,

³thiampi Eleazar tungah pia hen. Tua khui ngiaphual pua sangah kipusua pui in, ama omna ah kingo tu hi.

⁴Tuaciang Eleazar in a chi pawlkhat la in, Puanbuk sang ah a khutme taw salivei the tu hi.

⁵Tua nganhing buppi, a vun a kipan, a sa, a chi le a ngilzang te thiampipa omna ah kihal tu hi.

⁶Tuaciang thiampipa in cedar thing tawm, hyssop dawn le khauzeen san khat la in mei sungah lawn tu hi.

⁷Tua zawkciang ama in a puante sawp a, ama le ama tui a kibuak zawkciang ngiaphual ah tum thei tu hi; ahizong nitak dong biakna taw kisai in thiang ngawl lai tu hi.

⁸Khui a halpa zongh a puante sawp in ama le ama tui kibuak hamtang tu a, ahizong ama zongh nitak dong thiang ngawl tu hi.

⁹Tuaciang biakna taw kisai a thiang mihing khat in khuipui halna vaam teng luak tu a, ngiaphual puasang biakna taw kisai in a thiang na munah koi tu hi, tua te sia Israel taangpite a zeksa kithiansua na tui vawtna ah a hel tu in tualai ah kikeamcing tu hi. Hi a zeksa sia mawna silh natu in a kivawt ahi hi.

¹⁰Tua vaamte a luak pa in a puante sawp nanak tu a, ahizong ama nitak dong thiang ngawl lai tu hi. Hi ngeina sia Israel te le amate sung a teang ngamdangmite ii maisang hun theampo ah zui tu ngeina ahi hi.

¹¹Mithi luang a tham pawpo, ni sali sung biakna taw kisai in thiang ngawl hi.

¹²Ama sia ni thum ni le ni sali ni in kithiansuana tui taw kithiansua nanak tu a, tuaciang ama a thiang hi tu hi. Ahizong ni thum ni le ni sali ni te ngeal sung ah, a kithiansua bua ahile ama thiang ngawl tu hi.

¹³Mithi luang tham a, ama le ama a kithiansua ngawl pawpo sia a nin ahi hi, banghang ziam cile kithiansuana tui ama tungah kibuak ngawl hi. Ama in TOPA Puanbuk ninsak ahikom TOPA ii mi khat in kingaisun nawn ngawl tu hi.

¹⁴Mihing khat buk sungah a thi le, a thi laitak buk sung a om pa ahizong, buk sung a tum pa ahizong, ni sali sung biakna taw kisai in a thiang ngawl ahi hi.

¹⁵Sitna nei ngawl buk sungah a om bungte le bealte zongh a nin suak hi.

¹⁶Doipua sangah mihing khat a kithatlum ahibuale thi ngei in a thi khat sia mihing khat pawpo in a tham le, ahibuale mihing khat pawpo in mithi ngu ahibuale mithi thaan a tham le, ama ni sali sung thiang ngawl hi.

¹⁷Hi bang mihingte a thian natu in, mawphel natu in a kihal khuipui san ii vaamte tawm la tu a, beal sungah koi in, tuithiang pol thua tu hi.

¹⁸A masa in biakna taw kisai a thiang mihing khat in, hyssop dawn khat la tu a, tua hyssop dawn tui sungah papin, Puanbuk le a sung a om na theampo le mite the tu hi. A niina in, biakna taw kisai a thiang mihing khat in, mithi ngu, mithi luang ahibuale thaan a tham pawpo tungah tua tui the tu hi.

¹⁹Biakna taw kisai a thiang mihing khat in ni thum ni le ni sali ni in mihing a thiang ngawl pa sia tua tui the tu hi. Ni sali ni in ama in tua pa thiansua tu hi, tua pa sia a puan sawp a, ama le ama tui a kibuak zawkciang, nitum ciangin biakna taw kisai a thiang suak hi.

²⁰Mihing khat pawpo biakna taw kisai thiang ngawlin, ama le ama a kithiansua buale thiang ngawl veve hi, banghang ziam cile kithiansuana tui ama kibuak ngawl lai hi. Ama in TOPA ii Puanbuk ninsak a, Pathian ii mi khat in kingaisun nawn ngawl tu hi.

²¹Hi zui tu thu sia maisang hun theampo ah na zui tu ahi hi. Kithiansuana tui a the pa in zongh a puante sawp nanak tu hi; tua tui a tham peuma nitak dongin biakna taw kisai in thiang ngawl lai hi.

²²A thiang ngawl mi khat ii a tham na khat pawpo sia thiang ngawl a, tua na a tham peuma nitak dongin thiang ngawl lai hi.