Read Siyin Chin Mi Simna 20 Bible Online

Mi Simna 20 - Siyin Chin bible

Mi Simna 20

¹Tha masabel sungin Israel taangpi bup Zin duisung theng a, Kadesh ah ngiaphual saat uh hi. Tua munah Miriam thi in kiphum hi.

²Tua ngiaphual ah tui om ngawl ahikom Moses le Aaron kiim ah mite kikhawm in,

³“TOPA Puanbuk mai ah ih Israel mipuite taw thi khawm le ung phazaw tu hi.

⁴Banghangin hi duisung ngampa ah hong paipui nu ziam? Hi lai ah ka ngannote taw a thi khawm thei tu in hong paipui nu ziam?

⁵Banghangin bangma a po ngawl na ngam a thinkiam huaina hi munah pai tu in, Egypt pan hong pusuapuinu ziam? Hi lai ah taang, thei, sapit, talee ngate om ngawl hi. Tui neak tu ngawngawn zongh om ngawl hi!” ci in mawsiat uh hi.

⁶Mipite kung pan Moses le Aaron pai vingveng in, Puanbuk kongbiang ah ding uh hi. Amate lei ah kunin, TOPA ompuina khuavak taang velvol sia amate kungah kilangh hi.

⁷TOPA in Moses tungah,

⁸“Thuciamna Thingkuang mai ah a om ciangkhut la in a, nangma le Aaron in taangpi bup kikhawmsak vun. Tualai amate theampo mai ah a om suangpi sia paupui in, tuaciang tua ii sung pan tui phuulkeak tu hi. Hi bangin mipite le a ngannote neak tu in suangpi pan tui na suaksak tu hi,” ci hi.

⁹TOPA thupiak bangin Moses pai in, tua ciangkhut la hi.

¹⁰Moses le Aaron in tua suangpi mai ah taangpi bup kikhawmsak a, Moses in, “Ngai vun, ngual langpante awng! Note atu in hi suangpi pan tui kong suaksak tu uh ziam?” ci hi.

¹¹Tuaciang Moses in a ciangkhut laamin suangpi niivei saat a, tuaciang tui tam mama hong luang vahe in, mite le ngannote theampo in dawn uh hi.

¹²Ahizong TOPA in Moses le Aaron teih zazaan hi. Ama in, “A thiangtho ka vaangletna Israel mite mai ah na telsak natu in upna a kicing nei ngawl na hi uh komin amate ka khapsa ngam ah note in amate lampui in na tumpui buatu uh hi,” ci hi.

¹³Israel mite ii TOPA langpanin a phutsatna mun le ama thianthona a lakna mun ahi, Meribah ah hi thu teng piang hi.

¹⁴Moses in Kadesh pan Edom kumpipa tungah kamtaite paisak hi. Amate in, “Na mealheak uh ahi Israel minamte in hi bangin thu kong puak uh hi. Haksatna ka thuak uhte le,

¹⁵ih taanghpupite bangbangin Egypt ah pai a, kote kum tam mama ka teenna uh thu na heak ahi hi. Egypt te in ih taanghpupite le kote hong vawtsia a,

¹⁶TOPA tungah hu ngenin ka kiko uh hi. Ama in kote ngetna aw za a, vantunglalang khat hong puak in Egypt pan hong pusua pui hi. Tu in, na ngamngi Kadesh khua ah ka om uh hi.

¹⁷Nong hesuakna in na ngam hong kaantansak ta'n. Kote le ka ngannote in lampial ngawlin, na lote le na sapithuante sungah pai ngawlin, na tuikhuk tuite kong neaksak buatu uh hi. Na ngamsung ka kaantan mateng, lamziikpi tung teng ka tawn tu uh hi,” ci uh hi.

¹⁸Ahizong Edom te in, “Koma ii ngam kong kaantansak buatu uh hi! Nong kaantan uh le kuanin kong sim tu uh hi,” ci in zo uh hi.

¹⁹Israel mite in, “Lamziikpi tung ka tawn tu uh a, kote, ahibuale ka ngannote in na tui kong neaksak uh le a man kong pia tu uh hi — ko a paitan nuam ka hi bek uh hi,” ci in zo uh hi.

²⁰Edom te in, “Oai ngawl khu hi!” ci kik a, amate Israel te sim tu in a thahat ngalkaphonpi taw kuan uh hi.

²¹Edom te in Israel te ii a ngam a kaantan tu oai ngawl ahikom Israel te heak kikin lamdang tawn uh hi.

²²Israel taangpi bup in Kadesh nusia a, Edom ngamngi Hor Mual theng uh hi.

²³Tualai ah TOPA in Moses le Aaron tungah,

²⁴“Israel te piak tu in ka ciamsa ngam ah Aaron tum ngawl tu hi; banghang ziam cile no nii in Meribah ah kong thupiak sia hong langpan na hi uh ciang Aaron thi tu hi.

²⁵Hor Mual ah, Aaron le a tapa Eleazar paipui to in a,

²⁶tualai ah Aaron ii a thiampi puante sutin Eleazar silhsak in. Aaron sia tualai ah thi tu hi,” ci hi.

²⁷TOPA thupiak bangin Moses in seam hi. Taangpi bup muna ah amate Hor Mual ah paito uh a,

²⁸Moses in Aaron ii thiampi puante sutin Eleazar silhsak hi. Tua Mualdawn ah Aaron thi a, Moses le Eleazar ciasuk kik hi.

²⁹Tangpi bup in Aaron thina thu he a, amate theampo ni sawmthum sung khuangai in om uh hi.