Read Siyin Chin Mi Simna 21 Bible Online

Mi Simna 21 - Siyin Chin bible

Mi Simna 21

¹Canaan ngam thangsang ah a om Canaan mi Arad ngam ii kumpipa in Israel te Atharim lam tawnin hong pai a zaak ciang amate simin pawlkhat man hi.

²Tuasia ciang Israel te in TOPA tungah kiciamna khat vawt a: “Hi mihingte nong zosak le amate le a khuapite nangma tungah kong aap tu a, tuate ka lalcipsak tu hi,” ci uh hi.

³Amate ii pauna TOPA in za a, Canaan te zosak hi. Tuaciang Israel te in Canaan te le a khuapite lalcipsak siat a, tua mun Hormah ci uh hi.

⁴Israel te Hor Mual nusia in Edom ngam kiimveal in Aqaba Tuipi sangah pai uh hi. Ahizong lampi ah amate a thin vei zo ngawlin,

⁵Pathian le Moses langpanin sonsia uh hi. Amate in, “An le tui om ngawlna hi mun sennealngam sungah a thi tu in banghang Egypt ngam pan hong pusuapui ni ziam? An lim ngawl hi bang te po ka ne zo buatu uh hi!” ci in phunsan uh hi.

⁶Tuasia ciang TOPA in amate sungah ngul ngu neite tha a, Israel te tam mama ngul tukin thi hi.

⁷Mite Moses kungah pai in, “TOPA le nang langpanin kong sonsiat uh sia maw khu hi. Tu in hi ngulte a laak natu in TOPA tungah thu ngen in,” ci uh hi. Tua ahiciang a mite atu in Moses in thungen hi.

⁸Tua zawkciang TOPA in Moses tungah, taau ngul khat vawt in a, ngul tuk thuak mihing khat pawpo in tuasia a et ciang damna a nga thei natu in, khuam tungah khai in ci hi.

⁹Tuaciang Moses in taau ngul khat vawtin khuam tungah khai hi. Ngul tuk thuak pawpo in tua taau ngul en a damna nga hi.

¹⁰Israel te kikhiin in Oboth ah ngiaphual saat uh hi.

¹¹Tua mun a nusiat zawkciang, Moab ngam nisuana sang a lalsa Abiram ngam duisung ah ngiaphual saat uh hi.

¹²Tua zawkciang Zered Kuam ah ngiaphual saat uh hi.

¹³Tua mun pan kikhiin kik leleau a, Arnon Ngun ii saksang Amor ngam dong a zai duisung ah ngiaphual saat uh hi. (Arnon sia Moab le Amor mite ngamngi ahi hi.)

¹⁴Tua ahi hu in TOPA ii Ngal donate Laibu sungah, “… Suphah huamsung Waheb khua, le a kuamte; Arnon Ngun,

¹⁵tuaciang Ar khua dong a ban ngamkuam dungsuk teng le Moab ngamngi sang dong in,” ci in son hi.

¹⁶Tua mun pan Tuikhuk kicina munah amate paitanin, tualai ah TOPA in Moses tungah, “Mipite kikhawmsak in, amate tui pia tu khi hi,” ci hi.

¹⁷Tua laitakin Israel mite in hi la sak uh hi: “Tuikhuk te awng, na tui phuulsak vun; Lasakna taw muak tu khu hi —

¹⁸Kumpi tate ii kumpi ciangkhut taw, Mipi lampuite ii a ciangkhut taw in a kito Tuikhuk na hi hi,” ci hi. Amate duisung panin Mattanah ah kikhiin uh a,

¹⁹tua mun pan Nahaliel zuanin, Nahaliel pan Bamoth ah,

²⁰Bamoth panin sennealngam a kimu theina Pisgah Mualdawn nuai Moab ngamkuam theng uh hi.

²¹Tua zawkciang Israel mite in Amor te kumpi Sihon kungah kamtaite paisak a:

²²“Na ngam hong kaantansak tavun. Kote le ngannote in lampial in na lote, ahibuale na sapithuante sungah pai ngawl tu khu hi. Na tuikhukte pan tui ka ne buatu uh hi; na ngam ka kaantan mateng, lamziikpi tung teng ka tawn tu uh hi,” cisak hi.

²³Ahizong Sihon in Israel mite ii a ngam a kaantan tu oai ngawl hi. Ama in a ngalkaphonpi khawm a, duisung Jahaz ah pai in Israel te sim hi.

²⁴Ahizong ngal kidona ah Israel te in a ngalte tam mama that a, Arnon ngun pan Jabbok saksang dong laaksak hi, banghang ziam cile tua mun sia Ammon ngam hi a, Ammon te in a ngamngi nasia takin hung uh hi.

²⁵Tuaciang Israel mite in Amor khuapi theampo la siat a, Heshbon le a kiim a om khuate zongh la in tua khua teng theampo sungah teang uh hi.

²⁶Heshbon sia Amor te kumpipa Sihon teenna khuapi hi a, Sihon sia Moab kumpi masa a do pa le Arnon Ngun dong a ngam theampo a laaksak pa ahi hi.

²⁷Tua hu in laphuakte in, “Kumpipa Sihon ii khuapi Heshbon ah hong pai tavun! Tua khuapi a kisa kik le a kipua kik mu nuam khu hi.

²⁸Khatvei lai, Heshbon khuapi panin Sihon ngalkaphonpi sia meikuang khat taw kibangin pai a; Moab ngamsung Ar khuapi lalcipsakin Arnon thunghsang mualte kaanghtum hi.

²⁹Moab mite awng, no atu bang zata lauhuai ziam! No Chemosh a bia te lal siat nu hi! Na pathian in pate ngaltaite suaksak a, Numeite Amor kumpipa ii ngalmatte suaksak hi.

³⁰Ahizong tu in a suan a paalte Heshbon pan Dibon lam tawntung Nashim pan Medeba khua nai Nophah dong kimon hi,” ci in phua uh hi.

³¹Tuabangin Israel mite Amor te ngam sungah teang a,

³²Moses in Jazer khuapi sim natu lampi phabel a zong tu in mihingte paisak hi. Israel te in tua khuapite le a kiim ah khuate la in tua mun ah a teang Amor te not keak uh hi.

³³Tua zawkciang Israel te Bashan lam tawnin heakkik a, Bashan Kumpi Og sia amate sim tu in a ngalkaphonpi taw Edrei ah kuan uh hi.

³⁴TOPA in Moses tungah, “Ama kiita heak in. Hi kumpipa, a mihing theampo le a ngam a lei kong zosak tu hi. Heshbon khua a uk Amor Kumpipa Sihon tungah na vawt bangin ama tungah vawt in,” ci hi.

³⁵Tua ahikom Israel te in Og, a tapate le a mite theampo khat zongh khoaikhe ngawlin thatlum siat a, tua zawkciang amate in a ngam lua uh hi.