Read Siyin Chin Mi Simna 22 Bible Online

Mi Simna 22 - Siyin Chin bible

Mi Simna 22

¹Israel te kikhiin kikin, Jericho ngalkhat Jordan nisuana sang Moab zaangtam ah ngiaphual saat uh hi.

²Israel te in Amor te tungah a vawtna teng le Israel te bangza tam ci sia Zippor tapa Balak, Moab kumpipa in a zaak ciang,

³ama le a mihingte theampo patau mama uh hi.

⁴Moab te in Midian lampuite tungah, “Khuital in a tatna ah lopa a neak bangin hi mihonpi in, ih kiim ih paam teng hai ngawlin lalcipsak siat tu hi,” ci uh hi. Tua ahiciang Balak Kumpipa in

⁵Amaw ngam Euphrates Ngun hui Pethor ah a om Beor tapa Balaam sam tu in kamtaite paisak hi. Amate in Balak ii kam vaithak hi teng Balaam puak hi: “Kong heaksak nop thu panin, Egypt pan minam bup khat hong pai a; a mite sia mun theampo ah kithethaang in, ih ngam hong laksak tu kithoai zo hi.

⁶Amate eite sangin tamzaw ahikom nong hesuakna in hong pai ta'n a, kei atu hong haamsiatsak ta'n. Tuasia ciang kote in amate zo in, ngamsung pan notkeak thei tha tu khu hi. Nangma ii thupha na piak ciang mihingte in thupha nga a, na haamsiat ciang amate haamsiatna khat thuak hi, ci in ka he hi.”

⁷Tua hi a, Moab te le Midian te ii lampuite in a haamsiat natu a thap man tu kengin Balaam kungah pai in, Balak kam vaithak teng son uh hi.

⁸Balaam in amate tungah, “Tu zan hi lai ah taam vun a, TOPA hong son pawpo, zing ciang kong son kik tu hi,” ci hi. Tua ahikom Moab lampuite Balaam kungah taam uh hi.

⁹Balaam kungah Pathian pai in, “Nang kungah hong ngiakte a kuate ziam?” ci in dongh hi.

¹⁰Balaam in, “Moab Kumpipa Balak ii kamtaite hi a,

¹¹Egypt pan hong pai mite ngamsung bup ah a kizelna thu hong sonsak hi. Ama in amate do in a nawkeak thei natu in haamsiatsak le hong oai hi,” ci in zo hi.

¹²Pathian in Balaam tungah, “Hi mite zui heak in a, Israel mite haamsiat heak in, banghang ziam cile amate sia ka thupha piakte ahi uh hi,” ci hi.

¹³A zingsang ciang Balaam sia Balak ii kamtaite kungah pai in, “Cia kik tavun; TOPA in note kong zui tu oai ngawl hi,” ci hi.

¹⁴Tua ahiciang amate Balak kungah cia kik a, Balaam ii zui nop ngawlna thu teng son uh hi.

¹⁵Tuasia ciang Balak in a masa lai sang a, a tamzaw le a thupi zaw lampuite thataak hi.

¹⁶Amate Balaam kungah pai in, “Nong hesuakna in ka kungah nong pai tu bangma peuma in khaksak heak in!

¹⁷Thaman tam mama kong pia tu a, nong son babang ka vawt tu hi. Nong hesuakna in hong pai ta'n a, kei atu hi mite hong haamsiatsak ta'n,” ci in Balak ii kam vaithak teng son uh hi.

¹⁸Ahizong Balaam in, “Balak in a kumpi inn sung a om ngunn le khamh theampo hong pia zong, TOPA ka Pathian ii thupiak a nobel zongh ka nial thei bua hi.

¹⁹Ahizong nong hesuakna in ngualdangte bangma, tu zan taam vun, tua hile TOPA in thudang son tu hong nei ziam hong nei bua ziam ka he tu hi,” ci in zo hi.

²⁰Tua zanin Balaam kungah Pathian pai a, “Nangma sam tu in hi mite hong pai ahile, kithoai in zui ta'n, ahizong kong son teng bek vawt in,” ci hi.

²¹Tua hi a, a zingsang ciang Balaam in a laa tung to in Moab lampuite zui hi.

²²Tuabang Balaam in zui ahikom Pathian thin uuk hi. Balaam sia a naseam niite tonpui a, a laa tung to in a pai laitak a lampi khak tu in TOPA vantunglalang khat lamlai ah ding hi.

²³Tua laa in namsau khat a toai vantunglalang tua munah ding a mu ciang lampial in lo sung zuan hi. Balaam in a laa saatin lampi ah hawl kik hi.

²⁴Tuaciang lamciakna sapithuan nii kilaklaw, a lang le a lang suangpang omna munah vantunglalang sia ding hi.

²⁵A laa in vantunglalang a mu ciang leangin suangpang phul a, Balaam ii peang suangpang taw kingoai hi. Balaam in a laa saat kik hi.

²⁶Khatvei ma vantunglalang a mai ah kiin leleau a; paitan natu a om ngawl het lampi ciakna mun khat ah ding hi.

²⁷Tu ciang, laa sia vantunglalang a mu ciang boksuk hi. Balaam a thin vei zo ngawlin, a ciang taw a laa saat hi.

²⁸Tuasia ciang TOPA in laa sia kampau theina vaang pia a, laa in Balaam tungah, “Nang bang hong law na khi ziam? Banghangin thumvei hong saat ni ziam?” ci hi.

²⁹Balaam in, “Banghang ziam cile kei nong mawmawt vawt hang hi! Namsau nei leng hong thatlum tu khi hi,” ci in zo hi.

³⁰Laa in, “Na khan tawntung, nong tona laa sia ma hi ngawl kana khi ziam? Nidangin hi bangin hong vawt ngei na khi ziam?” ci in zo kik hi. Balaam in, “Nong vawt ngei bua hi,” ci in zo hi.

³¹Tuaciang, TOPA in Balaam, tua munah namsau taw a ding vantunglalang sia musak a; Balaam lei ah boksuk hi.

³²Vantunglalang in, “Banghang hi bang na laa thumvei saat ni ziam? Hi bang a pai tu hi ngawl na hikom, na mai khak tu in kong pai zo hi.

³³Ahizong na laa in kei hong mu a, thumvei hong pial hi. Tuabang hong pial buale nangma hong thatin, na laa a khoaikhe tu ka hi hi,” ci hi.

³⁴Balaam in, “Maw zo khi hi. Kei hong pangin lampi ah na din hunlam ka he bua hi; ahizong tu in ka paisuak tu khial nong sa ahile ka heak kik tu hi,” ci in zo kik hi.

³⁵Ahizong vantunglalang in, “Hi mite taw paisuak in a, ahizong son a kong sawl teng bek son in,” ci hi. Tuabangin Balaam in amate zui suak hi.

³⁶Balak in Balaam a pai hunlam a zaak ciang Moab ngamngi Arnon Ngun tung a om Ar khuapi ah muak hi.

³⁷Balak in Balaam tungah, “Kong samsak maksak lai in banghangin hong pai ngawl ni ziam? A kicing thaman pia zo ngawl tu in hong um ni ziam?” ci hi.

³⁸Balaam in, “Hong pai zo hi ngawl khi ziam? Ahizong tu in a bang vaang nei na khi ziam? Pathian ii son a hong sawl teng bekma son thei khi hi,” ci in zo hi.

³⁹Tuaciang Balaam sia Balak taw Huzoth khua ah pai in,

⁴⁰tualai ah Balak in khui le tuu ngoin, a sa pawlkhat Balaam le a tonpui lampuite pia hi.

⁴¹A zingsang ciang Balak in Balaam sia Bamoth Baal ah paipui to hi, tua mun panin Balaam in Israel mite khen khat mu thei hi.