Read Siyin Chin Mi Simna 23 Bible Online

Mi Simna 23 - Siyin Chin bible

Mi Simna 23

¹Balaam in Balak tungah, “Hi lai ah biaknatau sali kei atu in hong vawtsak ta'n a, khuital sali le tuutal sali hong paipui ta'n,” ci hi.

²A ci bangin Balak in seam a, ama le Balaam in biaknatau sim ah khuital khat le tuutal khat veu pia uh hi.

³Tua zawkciang Balaam in Balak tungah, “TOPA in kei hong mu nuam ziam hong mu nuam ngawl ziam, pai in ka na et laanin, nang na meihal biakpiakna hui ah na ding zii in. Ama ii kei tungah hong pualaakna babangin kong son kik tu hi,” ci hi. Tuaciang Balaam sia mualdawn ah ama nguak kaato a,

⁴Pathian taw kimu hi. Balaam in TOPA tungah, “Biaknatau sali ka vawt a tuate tungah khuital khat le tuutal khat veu biakpiakna in ka pia zo hi,” ci hi.

⁵TOPA in Balaam tungah, Balak atu a kam vaithak teng a son tu in heak kik sak hi.

⁶Tua ahiciang ama heak kik a Balak, a meihal biakpiakna hui ah Moab lampui theampo taw ding khawm lai sia mu hi.

⁷Balaam in hi kamsaanna pualaak hi: “Moab kumpipa Balak in Syria pan, nisuana mualte panin hong paipui hi. Balak in, ‘Hong pai ta'n a, kei atu in Israel mite haamsiat in’ hong ci hi,

⁸Pathian ii haamsiat ngawl sia bangbang haamsiat thei tu a, TOPA ii a ci ngawl po bangbang kei lalsak na thu son tu khi ziam?

⁹Suangpi saang tung pan amate ka mu thei a; Mualtung pan amate ka en thei hi. Amate minam khat in nungta bek a; Minam dangte sangin thupha a nga zawkna thu amate in he uh hi.

¹⁰Israel suan le paalte leivui bangma hi a — a phakza sim tu tamleih lawlawm hi. Pathian mite khat bangin ka ni ka hunte hong bosak ta'n a; Mihing thutakte bangin nuam takin hong thisak ta'n.”

¹¹Tua zawkciang Balak in Balaam tungah, “Kei tungah bang hong vawt ni ziam? Hi lai ah ka ngalte haamsiat tu in kong paipui a, ahizong amate thupha na pia pumsai hi,” ci hi.

¹²Ama in, “TOPA ii son tu a hong sawl teng bek son thei khi hi,” ci in zo hi.

¹³Tuasia zawkciang Balak in Balaam tungah, “Israel te pawlkhat bek na mu thei natu mundang khat ah hong zui ta'n. Tua mun pan amate hong haamsiatsak ta'n,” ci hi.

¹⁴Ama in Balaam sia Zophim lo sung Pisgah Mualdawn ah paipui hi. Tua mun zongh ah ama in biaknatau sali vawtin tua tungah khuital khat le tuutal khat veu biakpiakna in pia hi.

¹⁵Balaam in Balak tungah, “Na meihal biakpiakna hui hi sungah na ding in a, tua munah Pathian taw ka na kimu tu hi,” ci hi.

¹⁶TOPA sia Balaam taw kimu a, a kam vaithak teng a son zawkciang Balak tungah a son tu in ciasak kik hi.

¹⁷Tua ahiciang ama heak kik a, Balak meihal biakpiakna hui ah Moab lampuite taw dingkhawm lai sia mu hi. TOPA in bang hong ci ziam ci in Balak in dongh a,

¹⁸Balaam in hi kamsaanna pualaak hi: “Zippor ii tapa Balak awng hong pai ta'n, Kong son tu thute hong ngai ta'n.

¹⁹Pathian sia a leilot thei mihingte taw kibang ngawl a; Ama sia a thin a kheal papai mihing hi ngawl hi. A kamciamna babang seam a; A pau bangin taangtung hi.

²⁰Thupha pia tu in hong kisawl a, Pathian in thupha a piak ciang ka khealsak kik thei bua hi.

²¹Israel te mai sangah bangma kaamsiatna ahibuale ngimna a thuak tu ka mu kholsak bua hi. TOPA a Pathian in amate ompui a; Ama sia a kumpipa hi ci in thangsak uh hi.

²²Pathian in Egypt pan amate pusuapui a; Ama in ngam khuital khat bangin amate panpui hi.

²³Israel minam langpan natu a kizangh thei bum ahizong, ai ahizong om ngawl hi. Tu in mihingte in Israel te thu son tu a, ‘En vun Pathian nasepna paw!’ ci tu uh hi.

²⁴Israel minam sia a thahat tawpi khat taw kibang a: A sa matte ii sa, balneen in a valh mateng, A chi a dawn mateng in, tawlnga ngawl hi.”

²⁵Tua zawkciang Balak in Balaam tungah, “Israel mite haamsiat tu nong nial a, tua ahile amate thupha pia heak ka lam in!” ci hi.

²⁶Balaam in, “TOPA hong sawl theampo a seam tu ka hisia hong son zo hi ngawl khi ziam?” ci in zo hi.

²⁷Balak in, “Hong pai ta'n, mundang khat ah kong paipui tu hi. Tua mun pan kei atu in, amate na haamsiat tu Pathian in hong oai zongh hi thei tha tu hi,” ci hi.

²⁸Tua ahiciang Balak in sennealngam a ki ensuk theina Peor Mualdawn ah Balaam paipui hi.

²⁹Balaam in Balak tungah, “Hi lai ah biaknatau sali kei atu in sa in a, khuital sali le tuutal sali kei atu hong paipui ta'n,” ci hi.

³⁰Ama ci bangin Balak in seam a, khuital khat le tuutal khat veu biaknatau khat sim tungah biakpiakna in pia hi.