Read Siyin Chin Mi Simna 25 Bible Online

Mi Simna 25 - Siyin Chin bible

Mi Simna 25

¹Israel te Acacia Kuam ah ngiaphual a saat lai in, pate in tua munah a om Moab numeite khialpui uh hi.

²Tua numeite in Moab pathian a kibiakna mun sangaw biakpiakna poai ah amate sam uh hi. Israel te in an ne in,

³Peor ii Baal pathian bia uh hi. Tua ahikom amate tungah TOPA thin uuk a,

⁴Moses tungah, “Israel lampui theampo sam in a, ka thu nong nitna in suntangin amate thatlum siat in, tua hile a mite tungah ka thin uuk nawn ngawl tu hi,” ci hi.

⁵Moses in uliante tungah, “Note khat simin na nam sungah Peor ii Baal pathian a bia teng peuma thatlum tu nu hi,” ci hi.

⁶Moses le Israel taangpi bup khuangai in TOPA ompuina Puanbuk kongbiang ah kapin a om laitak, amate mu tangin Israel te khat in Midian numei khat ama puanbuk sungah tumpui hi.

⁷Tua thu Eleazar tapa, thiampi Aaron tupa, Phinehas in a mu ciang a kikhopna pan dingin pusuak hi. Ama in tei khat la a,

⁸tua pa le tua nu ii nung pan zui in Puanbuk sungah a nii in khawlet hi. Hi bangin Israel te tungah a tung natsiatna sia kivengsak a,

⁹ahizong mihing 24,000thisak zo hi.

¹⁰TOPA in Moses tungah,

¹¹“Phinehas ngamtatna hangin Israel mite tungah ka thin a uk nawn bua hi. Ama in keima simngawl Pathian dang biak tu peuma a dei ngawlpa hi a tua thu hangin thin uuk hi kaleng amate ka mon bua hi.

¹²Tua ahiciang maisang hun theampo ah a kip tu thuciamna khat Phinehas taw ka vawt tu sia ama tungah son in,

¹³Kei hong demte peuma saang ngawl a, Israel te ii mawmai sakna zongh piangsak ahikom ama le a suan a paalte thiampi kiseamsak top hi,” ci hi.

¹⁴Midian numei taw thalup a thuak khawm Israel sia pa ii min Zimri hi a, Simeon nam sung pan innkuan lutang sia Salu tapa ahi hi.

¹⁵Tua numei min sia Cozbi ahi hi. A pa sia Zur hi a, Midian bee le phung honkhat ii ukpi ahi hi.

¹⁶TOPA in Moses tungah,

¹⁷“Midian te sim in a, mon in,

¹⁸banghang ziam cile Peor ah note hong theamin a tatsiat uh hang le Peor ah natsiatna a tun lai in a kithatlum Cozbi hang ahi hi,” ci in thupia hi.