Read Siyin Chin Mi Simna 28 Bible Online

Mi Simna 28 - Siyin Chin bible

Mi Simna 28

¹TOPA in Moses tungah,

²Israel te in a kisee hunin ama a lungkimsak ahi, a kitaangsamh an biakpiaknate Pathian tungah a piak natu a sawl natu in thupia hi.

³Hite sia TOPA tungah a kipia tu an piakkhiatnate ahi hi: ni sim meihal biakpiak natu in a mealhem ngawl kum khat a pha tuutalno nii hi tu hi.

⁴Tuuno a khatna sia zingsang in kipia tu a, a niina sia nitakin kipia tu hi.

⁵Tua tuuno khat sim taw antang piakkhiatna khat ahi a phabel olive thau litre khat a kihel anvui kilogramme khat kipia khawm tu hi.

⁶Hisia in Sinai Mual tungah a masabel an biakpiakna in a kipia sa, a kihaltum ni sim biakpiakna hi a, tua in TOPA a lungkimsak ngimnam ahi hi.

⁷A masa tuuno sia taw sapittui biakpiakna na piak uh bangin biaknatau ah sapittui litre khat buak vun.

⁸Sapittui taw zingsang biakpiakna a kipiak khop bangma in, nitakin a niina tuuno sia pia vun. Tuasia zongh a ngimnam taw TOPA a lungkimsak an taw biakpiakna ahi hi.

⁹Sabbath ni in a mealhem ngawl, kum khat a pha tuutal no nii, antang biakpiakna in olive thau taw a kihel anvui kilogramme 2 le sapittui biakpiakna pia vun.

¹⁰Hi meihal biakpiakna sia ni simin sapittui biakpiakna belapna in Sabbath ni simin piak tu ahi hi.

¹¹Tha sim a ni khat ni in, TOPA tungah meihal biakpiakna a nuai a bangin pia vun: khuitalno nii, tuutal khat, kum khat a pha tuutalno sali, a vekpi in a mealhem ngawl hi tu hi.

¹²Antang biakpiakna in olive thau taw a kihel anvui pia vun: khuital khat ciang anvui kilogramme 3 veu; tuutal sia anvui kilogramme 2

¹³le, tuuno khat ciang anvui kilogramme khat veu taw pia vun. Hi meihal biakpiaknate sia an biakpiakna hi a, TOPA a lungkimsak ngimnam khat ahi hi.

¹⁴Piak ngengei sapittui biakpiakna sia khuital khat ciang sapittui litre 2, tuutal sia sapittui litre khat le lang le tuuno khat ciang sapittui litre khat veu taw piak tu ahi hi. Hisia kum khat tawntung tha sim, a ni khat ni in meihal biakpiakna ah zui tu ngeina ahi hi.

¹⁵Tuaciang sapittui biakpiakna taw ni sim meihal biakpiakna belapna in, mawphel biakpiakna in kealtal khat pia vun.

¹⁶TOPA patoaina Paisan Poai sia tha masabel, ni sawm le ni li ni in, kivawt tu hi.

¹⁷A ni sawm le ni nga ni in, biakna poai kipan a, ni sali sung poai kikhaam tu hi, tua hunsung teng tol saw ngawl anluum bek kine tu hi.

¹⁸Poaikhaam a ni masabel ni in, biakna vawt tu in na kikhawm tu uh a, na kiseam ngawl tu hi.

¹⁹TOPA tungah an taw biakpiakna in meihal biakpiakna pia vun: khuitalno nii, tuutal khat le kum khat a pha tuutal sali, a vekpi in a mealhem ngawl hi tu hi.

²⁰Olive thau a kihel anvui taw piak ngei antang biakpiakna pia vun: Khuital khat ciang anvui kilogramme 3 veu, tuutal sia anvui kilogramme 2

²¹le tuutalno khat ciang anvui kilogramme khat veu taw pia tu nu hi.

²²Mawphel biakpiakna in keal tal khat zongh pia vun a, hi bangin mipite atu in a zeksa thiansuana vawt vun.

²³Hite sia zing simin meihal biakpiakna belapna in pia vun.

²⁴Tuabang ma in ni sali sung ama a lungkimsak ngimnam, an taw biakpiakna TOPA tungah pia vun. Hi biakpiakna sia ni sim meihal biakpiakna le sapittui biakpiakna belapna in pia thua vun.

²⁵A ni sali ni in, biakna vawt tu in kikhawm vun a, na seam heak vun.

²⁶Anlaak Poai a ni masabel ni in TOPA tungah anpal biakpiakna na piak uh ciang biak kikhopna nei in, bangma seam ngawl tu nu hi.

²⁷TOPA a lungkimsak ngimnam, meihal biakpiakna pia vun: khuital moi nii, tuutal khat le kum khat a pha tuutalno sali hi tu a, a vekpi in a mealhem ngawl hi tu hi.

²⁸Olive thau le anvui a kihel piak ngengei antang biakpiakna pia vun: khuital khat ciang anvui kilogramme 3 veu, tuutal sia anvui kilogramme 2,

²⁹le tuutalno khat ciang anvui kilogramme khat veu taw pia vun.

³⁰Mawphel biakpiakna in kealtal khat zongh pia vun a, hi bangin mipite atu in a zeksa thiansuana vawt vun.

³¹Ni sim meihal biakpiakna le antang biakpiakna belapna in hite le sapittui biakpiakna pia vun.