Read Siyin Chin Mi Simna 32 Bible Online

Mi Simna 32 - Siyin Chin bible

Mi Simna 32

¹Reuben le Gad namte in nganno tam mama nei uh hi. A ngannote atu in Jazer le Gilead ngam le lei bangza pha ci in a mu ciang,

²Moses, Eleazar le taangpi lampui dangte kungah amate pai in,

³“TOPA huna taw Israel te ii laksa hi khuate — Ataroth, Dibon, Jazer, Nimrah, Heshbon, Elealeh, Sibmah, Nebo le Beon khuate — nganno khoai natu in pha a, nganno tam mama ka nei uh hi.

⁵Nong hesuakna in hi ngam le lei kote hong pia tavun a, tualai ngun ngalkhat ah a teang tu in Jordan Ngun hong kaantansak heak vun,” ci uh hi.

⁶Moses in, “Na Israel mipuite ngalsimin a kuan laitak note hi lai ah om nuam nu ziam?

⁷TOPA in amate a piaksa ngam sungah a tum tu Israel mite ii Jordan ngun a kaantan tu sia, bang bang thinkiamsak ngam zen nu ziam?

⁸Tuasia in na pate Kadesh Barnea pan ngamvil tu ka paisak lai in a ngamtat uh bang keak ahi hi.

⁹Amate Eshkol Kuam dongah pai in tua ngam mu uh a, ahizong a heak kik ciang TOPA piaksa ngam ah Israel te a tum nop ngawl natu in a thin kiamsak uh hi.

¹⁰Tua ni in TOPA thin uukin kamciam khat pia hi:

¹¹‘Kei tungah hong thumaan tan ngawl ahikom, Egypt ngam pan a pusuak mite sung pan kum kul pan a tungsia pa a minpiang kuama Abraham, Isaac le Jacob tungah ka khapsa Canaan ngam tum ngawl tu hi, ci in kiciamna ka vawt hi.’

¹²Hi sungah Keniz mi, Jephunneh tapa Caleb le Nun tapa Joshua simngawl, a dang teng kihel siat hi: amate hile TOPA tungah thumaanna nei uh hi.

¹³Mite tungah TOPA thin uuk a, ama a lungkimsak ngawlte a khang buppi in a thi siat dong, duisung ngampa ah kum sawmli sung vakthapsak hi.

¹⁴Tu in, mawnei khangthak note in na pate dinmun la in, Israel tungah a nasia mama TOPA thin uukna thengsak kik tu in kithoai nu hi.

¹⁵Tu in no Reuben le Gad mite in TOPA nungzui tu na nial uh le ama in hi mipi theampo duisung ah khatvei ma nusia kik tu a, amate a lalsak sia noma na hi tu uh hi,” ci in zo kik hi.

¹⁶Amate Moses kungah pai in, “A masa in, hi lai ah ka tuute atu in suang taw doituamte hong uumsak ta'n a, ko hong bealhte atu in a ki uum khuapite hong sasak ta'n.

¹⁷Tuasia ciang ko sia Israel mipuite taw ngalsimin a kuankhawm tu le, amate lua tu ngam le lei ah ka teensak zawk mateng in, koma lampui in a sim tu ka kinging tu uh hi. Tua hun sungin ko hong bealhte in hilai a ki uum khuapite sungah teang thei tu uh a, hi ngammite panin ngammuangin om tu uh hi.

¹⁸Israel dangte theampo in a nga tu ngam teng a laak zawk mateng in, ka cia buatu uh hi.

¹⁹Kote in hi lai Jordan nisuana sangah tel nga zo ka hi uh kom Jordan langkhat amate sungah tel dang ka la buatu uh hi,” ci uh hi.

²⁰Moses in, “Na ci uh sia a takpi ahile hi lai TOPA mai ah ngalsim tu in kithoai paih vun.

²¹Na ngalkapte theampo in Jordan ngun kaantan in, TOPA thupiakna nuai ah, TOPA in ngalte a zaw mateng,

²²le ngam le lei a laak zawk mateng ih ngalte sim tu uh hi. Tuasia zawkciang TOPA tung le Israel mipuite sungah na vaipuak teng zo siat zo tu na hikom na cia thei tu uh hi. Tua zawkciang TOPA in hi Jordan nisuana ngam sia note aa hi ci in hong tepteesak tu hi.

²³Ahizong, na kamciam na len bua uh le, TOPA langpanin mawnei na hi tu uh sia kong hesak hi. Hi thu taw kisai in khial tha heak vun; na mawna daan thuak tu nu hi.

²⁴Tua ahiciang khuapite le na tuute atu in doituamte na vawt vun, ahihang na kamciamsa uh bangin vawt vun!” ci in zo hi.

²⁵Gad le Reuben mite in, “Topa awng, nong thupiakna bangin ka seam tu uh hi.

²⁶Ka zite, ka tate, ka khui le ka tuute hi lai Gilead khuapite ah ka nusia tu uh hi.

²⁷Ahizong kote theampo TOPA thupiakna nuai ah ngalsim tu in ka kinging uh hi. Nangma ci bangin kote Jordan kaantan in ngal ka sim tu uh hi.” ci uh hi.

²⁸Tua ahiciang Moses in Eleazar, Joshua le Israel lampui dangte tungah hi bang thupia hi:

²⁹“Gad le Reuben mite in Jordan kaantan in TOPA thupiakna taw ngalsim tu in kinging a, amate huna taw note in ngam na la zo uh le, Gilead ngam sia amate atu in pia vun.

³⁰Ahizong amate in Jordan kan ngawlin, ngal hong simpui buale, noma bangin Canaan ngam ah amate ii tel nga tu uh hi,” ci hi.

³¹Gad le Reuben mite in, “Topa awng, TOPA thupiak bangin ka seam tu uh hi.

³²Kote in hi lai Jordan nisuana mun ka neisa ka nga kik thei natu uh in ama thupiakna nuai ah Canaan ngam kaantan in ngal ka sim tu uh hi,” ci in zo uh hi.

³³Tua ahiciang, Moses in Amor Kumpi Sihon, le Bashan Kumpi Og ngam theampo le a kiim a paam khua le ngamte Gad le Reuben namte tung le Manasseh ii nam a khenlang tungah ngam khen hi.

³⁴Gad namte in a ki uumcip khuapite ahi Dibon, Ataroth, Aroer,

³⁵Atroth Shophan, Jazer, Jogbehah,

³⁶Beth Nimrah le Beth Haran khuate luphung ciang kik uh hi.

³⁷Reuben namte in Heshbon, Elealeh, Kiriathaim,

³⁸Nebo, Baal Meon ( Hi min sia kilaih zo ), le Sibmah khuate sa kik uh hi. Amate in a sakkik uh khuate minthak pia uh hi.

³⁹Manasseh tapa Machir bee le phung in Gilead ngam simin a laak zawkciang tua ngam ah a teang Amor te hawlkeak uh hi.

⁴⁰Tua ahiciang Moses in Gilead ngam sia Machir bee le phungte pia a, tualai ah amate teang uh hi.

⁴¹Manasseh nam Jair in khuano pawlkhat simin la a, “Jair Khuanote” ci in a min vaw hi.

⁴²Nobah in Kenath le a kiim a khuanote simin la a, ama min tapin Nobah ci in min phuak kik hi.