Read Siyin Chin Mi Simna 4 Bible Online

Mi Simna 4 - Siyin Chin bible

Mi Simna 4

¹TOPA in Moses tungah,

²Levi nam Kohath bee le phung ii a bawng le a innkuante zui in mi simna vawt tu le,

³TOPA ompui na Puanbuk sungah naseam thei tu kum sawmthum le kum sawmnga kilaklaw pa theampo sazian la tu in sawl hi.

⁴A nasep sia a thiangthobel nate kihel hi.

⁵TOPA in a nuai a bangin thuhilnate Moses tungah pia hi. Ngiaphual na phel tu uh hun a tun ciang Aaron le a tapate Puanbuk sungah tum tu a, Thuciamna Thingkuang mai ah a om puankhai la in tuasia taw tua Thingkuang siin tu uh hi.

⁶Amate in tuasia savun pha khat taw siin tu a, a tungbel ah vancii puan khat taw siinin, tua zawkciang a zawn natu thingpumte thun tu uh hi.

⁷TOPA tung anluum piakna sabuai tungah amate in vancii puan pha tu a tua tungah pakante, ngimnamtui bungte, biakpiakna kuangte le sapittui biakpiakna thawlte koi tu uh hi. Sabuai tungah anluum om tawntung tu hi.

⁸Amate in tuate theampo puansan khat taw siin tu a, savun pha khat taw tuate siin thua in, a zawn natu thingpumte thun tu uh hi.

⁹Amate in vancii puan khat la in, meiinnte taw meidetna khuam, taitee, kuangte le olive thau koina bung theampo siin tu uh hi.

¹⁰Amate in tuasia le a vanhte theampo savun pha khat sungah tunin puak natu thingzawl tungah koi tu hi.

¹¹Tua zawkciang amate in vancii puan khat taw khamh biaknatau siin tu a tua tungah savun pha khat koi in, tuaciang zawn natu thingpumte thun tu uh hi.

¹²Amate in Mun Thiangtho ah a kizangh vanh theampo la tu a vancii puan khat taw tunin savun pha khat a tungah koi in tuaciang puakna tu thingzawl sia tungah tuate koi tu uh hi.

¹³Amate in sathau a nel vutte biaknatau pan luak tu a, a tungah puan sandup khat pha tu hi.

¹⁴Amate in biaknatau nasepna ah a kizangh vanhte: meihalna kuangte, thikkoaite, kawkeaute le kisilna kuangte theampo tua tungah koi tu uh hi. Tuaciang amate in savun pha khat tua tungah koi tu uh hi, tuaciang a zawnna thingpumte thun tu uh hi.

¹⁵Ngiaphual kiphel tu hun a cin ciang a thiangtho nate le vanhzakte theampo Aaron le a tapate in a sit zawkciang a pua tu in Kohath bee le phung pan hong pai tu uh hi. Kohath bee le phung in a thiangtho nate thutha ngawl tu a, a thutha le amate thi tu uh hi. Puanbuk a kikhiin simin hite sia Kohath bee le phung ii vaipuak ahi hi.

¹⁶Puanbuk bup le meidet tu sathau, ngimnamtui, antang biakpiakna, noi sathaute le TOPA tungah a ki aapsa puanbuk sungah a om theampo thiampi Aaron tapa Eleazar ii vaipuak hi tu hi.

¹⁷TOPA in Moses le Aaron tungah,

¹⁸“Kohath ii bee le phung sia

¹⁹hi biakna taw kisai a thiangthobel nate nai ah a paina hu in thalup thuaksak heak in. Hisia a pian ngawl natu in Aaron le a tapate a sungah tumin, mi simin a sep tu te pia in, a vawt tu te son tu uh hi.

²⁰Ahizong Kohath mite puanbuk sungah tumin biakna taw kisai a thiangtho nate tua tu in a kithoai thiampite a mu le amate thi tu uh hi,” ci hi.

²¹TOPA in Moses tungah,

²²Levi nam Gershon bee le phungte a innkuan le a beete taw kizui in mihing simna vawt tu le,

²³TOPA ompui na Puanbuk sungah na a seam thei tu kum sawmthum pan kum sawmnga kilaklaw pa peuma sazian la in sawl hi.

²⁴Amate in a nuai a vanhte puak tu vaipuak nei uh hi:

²⁵Puanbuk, a sung sitna, a pua sitna, a tung sitna a kipha savun, a sung tumna puankhai,

²⁶biaknatau le puanbuk kiimkot ah a om kikhopna mun puankhakte le khauhualte, tuasia sung tumna puankhakte le tua nate thua natu vanhzakte theampo ahi hi. Amate in hi nate atu a kisamh theampo vawt tu uh hi.

²⁷Aaron le a tapate ii Gershon suante tungah puak tu le sep tu vaipuak a piak theampo a sep siat natu in Moses le Aaron in pha takin en tu hi.

²⁸Hite sia Puanbuk sungah a sep tu Gershon bee le phungte ii vaipuak ahi hi; amate in tua nasepte thiampi Aaron tapa Ithamar ii thupiakna bangin seam tu uh hi.

²⁹TOPA in Moses tungah Levi nam Merari bee le phung ii bawngte le innkuante zui in mihing simna nei tu le,

³⁰TOPA ompui na Puanbuk sungah na a seam thei tu kum sawmthum pan kum sawmnga kilaklaw, pa peuma sazian la in sawl hi.

³¹Amate in puanbuk ii thingpheakte, zawlte, khuamte, le tawdapte,

³²tuaciang khuamte, tawdapte, khetphinte le puanbuk kiim kikhop na munah khaute, tuate taw a kizom nate theampo puak tu vaipuak nei uh hi. A puak tu vanhte mi simin vaipuak tekin nei tu hi.

³³Hite sia Puanbuk sungah Merari bee le phungte ii vaipuak hi a: amate in thiampi Aaron tapa Ithamar thupiakna bangin seam tu uh hi.

³⁴TOPA thupiakna taw kizui in, Moses, Aaron, le taangpi lampuite in Levi mi nam thumte ahi, Kohath, Gershon, le Merari suan teng a mihing simna nei hi, amate in TOPA ompui na Puanbuk sungah na a seam thei tu kum sawmthum le kum sawmnga kilaklaw, pa peuma a bawngte le innkuante zui in sazian la a, a nuai a bang ahi hi. [Bee le phung] — [Mihing phaza] Kohath — 2,750 Gershon — 2,630 Merari — 3,200 A vekpi in: — 8,580

⁴⁹TOPA in Moses tungah a thupiak bangin mi simin min sazian kila hi; TOPA in Moses tungtawnin a thupiak bangin, a nasep tu le a puak tu vaipuakte mihing sim tungah kipia hi.