Read Siyin Chin Mi Simna 5 Bible Online

Mi Simna 5 - Siyin Chin bible

Mi Simna 5

¹TOPA in Moses tungah,

²“A kiitakhuai vun natna veite ahibuale pumtung meima naai neite le mithi luang thamna taw a thiang ngawl peuma, ngiaphual pan a hawlkhiat natu in Israel mite thupia in.

³Amate sungah ka teenna hi ngiaphual, a nitsak ngawl natu in biakna taw kisai a thiang ngawl hi mihingte theampo hawlkhia in,” ci hi.

⁴Israel te in thu ni a, tua mihingte ngiaphual pan hawlkhia uh hi.

⁵TOPA in Moses tungah,

⁶Israel te atu in a nuai a kihilnate pia hi. Mihing khat pawpo in TOPA tungah thumaan ngawlin khat pawpo tungah khialna a vawt ciang

⁷a thuak pa tungah a mawna pualaak hamtang in, a maw a khial man a cingin a liau zawkciang zakhat tungah kul veu belapin pia thua tu hi.

⁸Ahizong tua pa thi zo a, a liausum piak natu in mealheak nai a nei bua ahile, tua liausum sia thiampipa atu in TOPA tungah kipia tu hi. Hi liausum sia, a maw a khialpa biakna taw kisai in thiansua natu a kizangh tuutal belapna ahi hi.

⁹Israel te ii TOPA tungah a tuam vilvel in a piak letsongte zongh tua letsong a saang thiampipa ii neisa ahi hi.

¹⁰Thiampi khat simin ama tungah a kipia biakpiaknate keam tu hi.

¹¹TOPA in Moses tungah,

¹²Israel te tungah a nuai a kihilna teng a piak tu in sawl hi. Tua thu sia pasal khat in ama tungah a zi thumaan ngawl a, pasal dang khat taw khialin ama pumpi ninsak ci a, muang la hi. Ahizong a khial laitak a kiman hi ngawl, tetti om ngawl a — a zi zongh in iim thei ahikom a pasal in thiang takin tel ngawl hi. Tua ahibuale hi thu sia a zi in thumaan ngawlna nei ngeingawl napi, a pasal in muang la thawthong zongh hi thei hi.

¹⁵Hi bang thu khat sasang a piang le, a pasal in a zi sia thiampipa kungah paipui tu hi. A pasal in biakpiak natu in a kisamh mangtaang vui kilogramme khat keng tu a, ahizong olive thau ahibuale ngimnamtui khat pawpo a tungah buak ngawl tu hi, banghang ziam cile hi biakpiakna sia a muang la pasal in thumaan thutak a heak nop manin a piak biakpiakna ahi hi.

¹⁶Thiampipa in tua numei, mai ah paipui in biaknatau mai ah dingsak tu hi.

¹⁷Thiampipa in leibeal sungah tui thiangtho tawm sung tu a, TOPA ompui na Puanbuk sung suat tungah a om leivui tawm la in, tua tui a kha a sua natu a sungah tha tu hi.

¹⁸Tuaciang thiampipa in numei ii sam phelsak tu a, tua numei khut sungah biakpiakna anvui koi tu hi. Thiampipa in a khut sungah haamsiatna tuikhaa a om beal sia toai tu hi.

¹⁹Tuaciang thiampipa in tua numei ii thukimna la in, “Na pasal na palngul bua ahile hi haamsiatna tui neakna taw ngim na thuak buatu hi.

²⁰Ahizong na pasal na palngul ahile,

²¹TOPA in na min sia na mite sungah haamsiatna khat suaksak tahen. TOPA in na numei thilte kinsakin, na ngil puaksak tahen.

²²Hi tui na ngil sungah tum a, na ngil khangin, na numei thilte kinsak hen” ci in kiciamna vawtsak tu hi. Tua numei in, “Ka thukim hi; TOPA in tuabang vawt tahen,” ci kik tu hi.

²³Tuaciang thiampipa in hi haamsiatna teng lai taw at tu a, tua tuikhaa beal sungah sil tu hi.

²⁴Tua tui sia numeinu ngil sungah a bot mama natna a piangsak thei tu in a neaksak ma in,

²⁵thiampipa in numei nu khut sungah a om biakpiakna anvui sia la tu a, TOPA tungah aapin, biaknatau tungah koi tu hi.

²⁶Tuaciang biakpiakna khat hi a cina in thiampipa in anvui khutdim khat la tu a, biaknatau tungah hal tu hi. A khakbel in tua tui sia numei in nesak tu hi.

²⁷Tua numei in a pasal a palngul le tua tui in a bot mama natna piangsak tu a; a ngil khangin, a numei thilte kin tu hi. A min sia a mite sungah haamsiatna suak tu hi.

²⁸Ahizong tua nu a khial buale bangma tat ngawl tu a, nau nei thei tu hi.

²⁹Hi thu sia a zi in hong palngul hi ci in thuum a, a muang la pasal khat ii thute ah zui tu thukham ahi hi. Tua numei sia biaknatau mai ah kidingsak tu a, thiampipa in hi a zeksa teng seam tu hi.

³¹Hi khialna pan a pasal suakta tu a, ahizong tua numei a khial le a piang babang a thuak kul tu hi.