Read Siyin Chin Mi Simna 6 Bible Online

Mi Simna 6 - Siyin Chin bible

Mi Simna 6

¹TOPA in Moses tungah,

²a nuai a kihilnate Israel mite a piak tu in thupia hi. Pa ahizong numei ahizong Nazirite mi suak tu khi hi, ci in kiciamna nei a, TOPA tungah a ki aap sia in

³sapittui le kham thei ngui theite ten tu hi. Ama in sapitnga taw dawn tu a kivawt bangma dawn ngawl tu a, sapitnga sia a hingin ahizong a ko in ahizong ne ngawl tu hi.

⁴Ama in Nazirite te ahi hun sungin sapitkung pan a piang peuma, sapit mu le a haw dong ciangin ne ngawl tu hi.

⁵Ama in Nazirite kiciamna nuai ah a om hun sung theampo a sam meet ngawl tu a, a mul meet ngawl tu hi. Ama TOPA tungah a kipiak hun a cin dong kiciamna in heencip ahikom a sam le a khamul hoai tu hi.

⁶Ama sam sia Pathian tungah ki aapna lim hi a, tua ahiciang mithi luang kung, a nu a pa, a suapuite luang ahi hial zong a neak na taw in ama le ama kininsak ngawl het tu hi.

⁸Ama in Nazirite te ahi laiteng TOPA tungah a kipum aap ahi hi.

⁹Thakhat thu in a thi pa khat ii kungah a om hu in Nazirite pa in a kipum aap sa, a sam a ninsak le ni sali sung ngak nanak tu a, tua zawkciangin a sam le a khamul meet tu hi; tuabangin ama biakna taw kisai a thiang suak tu hi.

¹⁰Ni liat ni in ama in TOPA ompuina Puanbuk sung tumna ah a om thiampipa kungah inn vakhu nii ahi buale ngam vakhu nii paipui tu hi.

¹¹Thiampipa in khat sia mawphel biakpiakna in, a dang khat sia meihal biakpiakna in nei tu a, mithi luang tham ahikom ama thiansua natu in a zeksa teng vawtsak tu hi. Tua ni ma in, ama in a sam pum aap kik tu a,

¹²Nazirite ahi na bangin TOPA tungah amate hun sia aap kik tu hi. A masa hun teng kisimsak ngawl tu hi, banghang ziam cile a aapsa ama ii sam sia ninsak hi. Ama in khialphel biakpiakna in kum khat a pha tuu khat keng tu hi.

¹³Nazirite khat a kiciam hun a cin ciang ama in a zeksa teng vawt tu hi. Ama in Puanbuk tumna ah pai in,

¹⁴a mealhem ngawl nganhing thum TOPA pia tu hi: meihal biakpiakna in kum khat a pha tuutalno khat, mawphel biakpiakna in kum khat a pha tuula khat, pawlkhop biakpiakna in tuutal khat hi tu hi.

¹⁵Ama in tol saw ngawl anluum law khat : olive thau taw hel in a vawt, anluum saate, olive thau noai in a paa in a vawt anluumte le a kisamh antang le sapittui taw biakpiaknate zongh pia lai tu hi.

¹⁶Thiampipa in hi teng theampo TOPA kungah paipui tu a, mawphel biakpiakna le meihal biakpiakna pia tu hi.

¹⁷Ama in pawlkhop biakpiakna in tuutal khat sia TOPA tungah anluum law khat taw pia tu hi; ama in antang le sapittui biakpiakna zongh pia tu hi.

¹⁸Puanbuk tumna ah tua nazirite in a sam meet tu a, pawlkhop biakpiakna a kihalna mei tungah tuasia hal tu hi.

¹⁹Tuaciang thiampipa in a kihuan tuutal liang la tu a, anluum saa khat le law sung pan muhphaang khat taw Nazirite ii khut sungah piakhawm tu hi.

²⁰Tuasia zawkciang thiampipa in tua teng TOPA tungah a tuam vilvel letsong in pia tu hi; tuate thiampipa atu in a thiangtho biakpiakna hi a, thukham om bangin thiampipa ii neisa tuutal phei le a awmsa belapna ahi hi. Tua zawkciang Nazirite in sapittui ne thei tu hi.

²¹Hite Nazirite mite zui tu ngeina hi a; ahizong Nazirite khat in a kulza sangin a tamzaw piak tu in kiciamna a nei le ama kamciam piak bang linlian in cingsak hamtang tu hi.

²²TOPA in Moses tungah,

²³Aaron le a tapate in Israel mite thupha a piak ciang a nuai a kammalte a zak natu a sonsawn tu in thupia hi:

²⁴TOPA in note thupha hong pia in, hong keamcing tahen;

²⁵TOPA in no tungah dikna le cikna thiamna hong nei tahen;

²⁶TOPA in note maipha hong pia in, thinnopna hong pia tahen;

²⁷Tuaciang TOPA in, “Amate in Israel mite tungah thupha piakna in ka min a lo le, keima in amate thupha ka pia tu hi,” ci hi.