Read Siyin Chin Mi Simna 8 Bible Online

Mi Simna 8 - Siyin Chin bible

Mi Simna 8

¹TOPA in Moses tungah,

²“Aaron in meiinn salite meikhuam tungah a koi ciang a maisang a taang tu in koi tahen ci in son in.” ci hi.

³Aaron in a thu ni a, meikhuam ii maisang maingatin meiinnte koi hi.

⁴TOPA in Moses tungah a laksa pianzia bangin tua meikhuam a dawn pan a bul dong a kiseak khamh taw kivawt hi.

⁵TOPA in Moses tungah,

⁶“Levi te sia Israel dangte taw khen in a, hi bangin thiansua in:

⁷thiansuana tui amate tungah the in a, a pum tung bup multe meet hen a, a puante a sawp natu sawl in. Tua sia ciang amate thiangtho tu uh hi.

⁸Tua zawkciang amate in khuital moi khat le antang biakpiak natu a, a kisamh olive thau taw kihel anvuite kengsak in a; nangma in mawphel biakpiak natu in a dang khuital khat na keng tu hi.

⁹Tuaciang Israel taangpi bup khawm in a, ka ompuina Puanbuk mai ah Levi te dingsak in.

¹⁰Israel mite in Levi te lu tungah a khut uh nga tu a,

¹¹tuaciang Levi te in ka na a sep thei natu in Israel te tung pan a tuam vilvel letsong bangin amate Aaron in keima tungah hong aap tu hi.

¹²Levi te in khuital niite lu tungah a khut uh nga tu uh a; Levi te atu a zeksa thiansuana vawt natu in, khui khat mawphel biakpiakna in kipia tu a, a dang khat sia meihal biakpiakna in kipia tu hi.

¹³“Levi te kei tungah a tuam vilvel letsong in hong aap ta'n a, Aaron le a tapate in amate uksak in.

¹⁴Levi te sia keima aa ahi tu in Israel dangte tu a bangin khen in.

¹⁵Levi te thiansua in aapna na vawt zawkciang, amate Puanbuk sungah naseam tu in a kiphu a kilawmte suak tu hi.

¹⁶Israel te tapa suakciil theampo ii dinmun ah amate ka laaksa hi a, amate keima bek ii neisa ahi hi.

¹⁷Egypt ah taciil theampo ka thalup lai in, Israel innkuan sim ii tapa lianbel tek le a nganhing suakciil theampo keima neisa in ka tuam koi hi.

¹⁸Tu in keima in Levi te sia Israel te taciil theampo taangin ka la hi,

¹⁹Puanbuk sungah Israel te atu in naseam tu le Mun Thiangtho ah Israel te in hong neak a, ngimna a thuak thaak ngawl natu a dal tu in, Israel te sung pan letsong bangin Levi te sia Aaron le a tapate tungah ka pia hi.” ci hi.

²⁰Tua ahiciang TOPA in Moses a thupiak bangin, Moses, Aaron le Israel mite theampo in Pathian tungah Levi te aap uh hi.

²¹Levi te amate le amate kithiansua in, a puante uh silthiang a, tua zawkciang Aaron in TOPA tungah amate a tuam vilvel letsong in aap hi. Aaron in amate atu in kithiansuana a zeksa teng zongh vawtsak hi.

²²Levi mite taw kisai, TOPA ii Moses tungah a thupiak theampo mipite in vawt siat hi. Tua hi a, Levi mite sia Aaron le a tapate khutnuai ah Puanbuk sung naseam tu in a kiphu a kilawm hong suak uh hi.

²³TOPA in Moses tungah,

²⁴“Levi te a mi simin kum 25 a phak pan kipan keima ompuina Puanbuk sungah a vaipuakte seam tu uh a,

²⁵kum 50 a phak ciang tawp tu uh hi.

²⁶Tua zawkciang ama in Puanbuk sungah a Levi mipuite ii nasep hu thei tu hi, ahizong ama tatakin seam ngawl het tu hi. Hi bangin Levi te ii nasep tu teng seesak tu ni hi.” ci hi.