Read Siyin Chin Micah 1 Bible Online

Micah 1 - Siyin Chin bible

Micah 1

¹Judah kumpite ahi Jotham, Ahaz le Hezekiah te ii maan laitakin Moresheth khua mi Micah tungah TOPA in hi thupuak pia hi. Samaria le Jerusalem taw kisai in Micah tungah TOPA in hi thu teng pualaak hi.

²No minamte theampo awng, hi thu za tek vun; simlei tungah a teang theampo awng, hi thu ngai vun! Vaanglianpipa TOPA in note langkhat panin tetti pang tu hi. Ngai vun! Ama in a vantung biakinn panin son hi.

³TOPA in ama ii mun thiangtho pan hong pai tu hi; ama hong tuaksuk tu a, mualte dawn ah vak tu hi.

⁴Tuasia ciang meikhuk khat ii sungah khuainun a tuithap bangin mualpite ama ii nuai ah tuitham tu hi; mualno khat tungah tui buaksuk bangin ngamkuamte sungah buaksuk tu hi.

⁵Hite theampo piang tu hi, banghang ziam cile Israel mite maw in, Pathian langpan uh hi. Israel ii langpanna sia akua mawsiat tu ziam? Ngam bup khuapi mama ahi Samaria hi! Akua in Judah ah milim biakna taw maw ahi ziam? Jerusalem ama mama hi!

⁶Tua ahiciang TOPA in, “Samaria sia ngam taanzauna sung a siasa teng kholna mun, sapitkung ciin natu mun ka suaksak tu hi. A khuapi sungah suangte zongh kuam sungah ka sungsuk tu a, a khuapi tawphate ka lawtsak tu hi.

⁷A milim manpha theampo a bebekin kisunen tu a, biakinn sungah pumpi zuak numeite a kipia nate theampo mei taw kihaltum tu hi, tuaciang a milimte theampo sia a kinusia vuumthuk khat suak tu hi. Samaria in hi nate sia a pungto a sua natu poai vawt natu in a nga uh hi a, tu in a ngalte in tuate sia biakinn sung pumpi kizuakte atu in mundang ah puak tu uh hi,” ci hi.

⁸Tuasia ciang Micah in, “Hi sia hu in khuangai in ka kap tu hi. Ka heena ka lakna in peangnguak le pumnguakin ka vak kawkoai tu hi. Ngam ui bangin ka au tu a, kalaoh vacim bangin ka tau tu hi.

⁹Samaria ii liammate kidamsak thei ngawl tu hi, tuaciang Judah zongh tuabang ma in thuak nai tu hi; suksiatna in ka mite teenna Jerusalem kongpite mama ah hong theng zo hi,” ci hi.

¹⁰Gath a om ih ngalte tungah ih ngallelna thu son heak vun; na kaa uh musak heak vun. Beth Leaphrah mite awng, na thinkiamna lakna in leivui sungah kilumliik vun!

¹¹No, Shaphir mite awng, na pumnguak om in maizumin ngamdang ah saltaang tu in pai tavun. Zaanan ah a teangte a khuapi sung pan pusuak ngam ngawl uh hi. Bethezel mite mauna na zaak uh ciang tua munah bukna a om ngawl hunlam na he tu uh hi.

¹²Maroth mite in huna noptuam a nga natu thinngimin ngak uh hi, banghang ziam cile TOPA in Jerusalem nai na ah tuasiatna thengsak zo hi.

¹³No, Lachish ah a teangte awng, na siphute ngalleangte tungah khit vun. Note in Israel mawna khialna na zui uh a, tuabangin Jerusalem khialsak nu hi.

¹⁴Tua ciang tu in Judah mite awng, Moresheth Gath khua mangpha thaak tavun. Israel kumpite in Achzib khua pan huna nga ngawl tu hi.

¹⁵Mareshah mite awng, na khua hong la tu ngalte khut sungah TOPA in no hong aap tu hi. Israel lampuite pai in Adullam suanghawng sungah buu tu uh hi.

¹⁶Judah mite awng, na it patangnote atu in khuangai in na sam uh meet vun. Vaciik bangin lutolin om vun, banghang ziam cile na patangnote sia ngamdang ah salin no kung pan kila tu hi.