Read Siyin Chin Micah 4 Bible Online

Micah 4 - Siyin Chin bible

Micah 4

¹Mailam hun ah Biakinnpi dinna mual sia a saangbel mual khat hi tu a, mualnote theampo tungah dokto tu hi. Minam tam mamate tua munah tuiluang bangin hong pai tu a,

²tuaciang a mite in, “TOPA ii mual, Israel ii Pathian Biakinnpi ah kaato tawng. Banghang ziam cile seam a hong oaite ama in hong hil tu hi; ama tealsa lampi ih zui tu hi. Banghang ziam cile TOPA hilcianna in Jerusalem pan hong pai hi; ama in Zion panin a mite paupui hi,” ci tu hi.

³Ama in minamte sung ahizong, a nai a khuala a vaanglian ngamte sungah ahizong, ama in a kituu uh thute lemtua tu hi. Amate in a namsaute lothawna in seak tu a, a teipite thingbaak heuna nam sua tu uh hi. Ngamte ngal kido kik ngei nawn ngawl tu a, ngal kido kik tu in kithoai ngei nawn ngawl tu hi.

⁴A neisa sapithuante le a theikungte sungah mi theampo kilemin teang tu hi, tuaciang kuama in ama lausak ngawl tu hi. TOPA Vaanglianbelpa in hi kamciam pia zo hi.

⁵Minam simin amate tek ii pathian bia in a thu ni hi, ahihang eite in TOPA, ih Pathian a tawntung, a tawntungin ih bia tu a, a thu ih ni tu hi.

⁶TOPA in, “Daan ka piak mite, sal taang in ngim a thuak mite ka khoptua kik tu hun hong theng tu hi.

⁷Amate liamin bai a, inn panin kikhuala hi, ahihang a taanglaite atu kipat kikna thak khat ka vawtsak tu a, amate minam lian khat suak tu hi. Amate tua hun pan kipan Zion Mual tung pan a tawntungin ka uk tu hi,” ci hi.

⁸Tuaciang nang Jerusalem, tuucing khat bangin Pathian ii a mite a etcikna mun sia, khatvei ma noma neisa kumpi ngam khuapi suak kik tu hi.

⁹Banghang a nging tatakin kap nu ziam? Nausuak tun numei khat bangin banghang thuak nu ziam? Kumpi na nei ngawl uh hang le na thu kikuppuite a thi uh hang ziam?

¹⁰Jerusalem mite awng, nausuak tu numei bangin kisaan in tau vun, banghang ziam cile tu in khuapi na nusia tu uh a, ngam taanzau sungah na teang tu uh hi. Babylon ah na pai uh kul tu hi, ahizong tua munah TOPA in na ngalte khut sung pan hong hun tu hi.

¹¹Minam tam mamate note sim tu in kikhawm zo hi. Amate in, “Jerusalem kisusia nanak tu hi! Hi khuapi a zaancip in ih mu tu hi!” ci uh hi.

¹²Ahihang hi minamte in TOPA ngaisutna sungah a om sia he ngawl uh hi. Lo ante cil tu in a paipui bangin amate daan piak tu in a kikaikhop ahi hunlam amate in phawk ngawl uh hi.

¹³TOPA in, “Jerusalem mite awng, pai vun a, na ngalte daan pia vun! Thikkii a nei le taau peangcin a nei khuital khat za in kong hatsak tu hi. Note in minam tam mamate tuanhpeak in, ngongtatna taw a nga, nei le lamhte keima, leitung buppi ii TOPA nong pia tu uh hi,” ci hi.